دووهەم خەڵاتی زارا بۆ خزمەتی زمانی کوردی، پێشکەشی ژنە نووسەرێکی رۆژئاوای کوردستان کرا

ڕۆژی یەکشەممە ڕێکەوتی ١٧ی بەفرانبار (٧ی ١ی ٢٠٢٤ی زایینی)، دووەمین ڕێوڕەسمی خەڵاتی "زارا بۆ زمانی کوردی" لەلایەن ڕێکخراوی "کوردشۆپ" و بە بەشداریی نووسەران، ڕۆشنبیران و کەسایەتییە سیاسییەکانی هەر چوار پارچەی کوردستان، لە هەولێری پایتەختی هەرێمی کوردستان بەڕێوە چوو و خەڵاتەکە پێشکەش بە خاتوو "ئەمینە عەمەر"، نووسەر و وەرگێڕی خەڵکی ڕۆژاوای کوردستان کرا.

ڕێوڕەسمەکە بە سروودی نەتەوەییی "ئەی ڕەقیب" و ڕاگرتنی ساتێک بێدەنگی بۆ ڕێزگرتن لە گیانی پاکی شەهیدانی کورد و کوردستان دەستی پێ کرد.

پاشان "وڵات قادری"، سەرۆکی ڕێکخراوی کوردشۆپ، وتاری خۆی سەبارەت بە گوتاری کوردایەتی، گرینگیی زمان، ئەدەب و کەلتووری کوردی و ئامانجی ڕێکخراوەکە پێشکەش کرد، هەروەها پەرژایە سەر ئامانج و مەبەستی بەخشینی خەڵاتی زارا بۆ زمانی کوردی.

لە درێژەدا ئینفۆگرافییەک لەسەر چالاکییەکانی کوردشۆپ لە دوو ساڵی ڕابردووی زایینیدا، بە زمانی کوردیی- سۆرانی بڵاو کرایەوە، پاشان چەند پارچە مۆسیقا و گۆرانی لەلایەن دوو هونەرمەندی خەڵکی ڕۆژاوای کوردستان، "نوورشین و پەروین" پێشکەش کران.

لە نێوئاخنی ڕێوڕەسمەکەدا مامۆستا "سوداد ڕەسووڵ"، وەک نوێنەری لێژنەی داوەرانی خەڵاتی زارا، ڕاپۆرتی لێژنەی داوەرانی خەڵاتەکەی خوێندەوە و ناوی خاتوو "ئامینە عەمەر"ی وەک براوەی ئەمساڵی خەڵاتی زارا ڕاگەیاند.

دواتر مامۆستا "عەبدوڵڵا حەسەنزادە"، کەسایەتیی سیاسی و ئەدەبیی ناسراوی ڕۆژهەڵاتی کوردستان، خەڵاتی زارای پێشکەش بە مامۆستا "خالید محەممەد" وەک نوێنەری خاتوو "ئەمینە عەمەر" لە ڕێوڕەسمەکەدا کرد. پاشان ڤیدیۆیەکی ئامادەکراو لەسەر ژیان و بەرهەمەکانی خاتوو "ئەمینە عەمەر" بڵاو کرایەوە.

لە بڕگەی کۆتاییی ڕێوڕەسمەکەدا، پەیامی ڤیدیۆییی مامۆستا "زارا محەممەدی" کە بۆ ڕێوڕەسمەکە هاتبوو، پێشکەش کرا.

kurdshop.net