دویه‌مین فه‌ستیڤالا خانی ل دهۆکێ ب ڕێ ڤه دچه
دویه‌مین فه‌ستیڤالا خانی ل دهۆکێ ڕۆژا (دوشه‌م، ۱٥.۰۷.۲۰۲٤) ب درووشمێ “جڤاکه‌که ڕه‌وشه‌نبیر ژ بۆ پاشه‌رۆژه‌که گه‌شتر” ل دهۆکێ هات ده‌ستپێکرن و ژ بۆ ده‌ما دو ڕۆژان به‌رده‌وام به. په‌نه‌لستێن فه‌ستیڤالێ ژی ڤێ پێنگاڤێ گرنگ دبینن و دو ژ وان دبێژن، “که‌لتوور و ڕه‌وشه‌نبیری جڤاکه‌که ساخله‌م چێ دکن.
سه‌رۆکێ ئاکاده‌میا کوردی ئه‌بدولره‌همان فه‌رهادی گۆت، “ئه‌ڤ تشته‌کی باش ئه، گرنگیا زێده‌تر دێ د وێ یه‌کێ ده به کو نها ئان ژی پشتی فه‌ستیڤالێ مژار و ڤه‌کۆلینێن وێ بێن چاپکرن. ئه‌ڤ ژ بۆ مامۆستایێن زانینگه‌هێ و ڤه‌کۆله‌ران دبه چاڤکانیه‌ک.”
سه‌رۆکێ ئاکاده‌میا کوردی هه‌روه‌سا گۆت، “ئه‌م دبینن کو دیدارێن ب ڤی ئاوایی ل باژارێ دهۆکێ به‌رده‌وام ئن، ئه‌ڤ ژی جهێ دلخوه‌شیێ یه.”
نڤیسه‌ر در. ئارف هیتۆ ژی ئاماژه دا، “مژارێن ڕه‌وشه‌نبیری د ڤێ فه‌ستیڤالێ ده تێن گه‌نگه‌شه‌کرن. ئه‌ز نابێژم کو ئه‌و تشتێن ل ڤێ ده‌رێ تێن گۆتن چ جاران نه‌هاتنه گۆتن، هاتنه گۆتن لێ ئازراندنا مژارێن ڕه‌وشه‌نبیری و جڤاکی و مژارێن ڤه‌بوونا ل سه‌ر جڤاکێ کا چاوا پێدڤی یه ده‌ستهلات ل سه‌ر جڤاکێ ڤه‌ببه، ئه‌ڤ دبن ئازرینه‌ر ئان ژی پالده‌ر ژ بۆ پێشکه‌فتنا جڤاکێ و یا ڕه‌وشه‌نبیری ژی.”
ڕێکخستنکه‌رێن فه‌ستیڤالێ ئاماژه‌یێ ددن کو مێڤان ژ هه‌ر چار پارجێن کوردستانێ ڤه‌خواندی نه و به‌رهه‌ڤ بوونه، هه‌روه‌سا ته‌که‌زێ دکن کو مه‌ره‌م ژ هه‌بوونا ڤێ چالاکیێ زێده‌تر خزمه‌تکرنا که‌لتوور و ڕه‌وشه‌نبیریا کوردستانێ یه.
ئه‌ندامێ لژنه‌یا فه‌ستیڤالا خانی ئه‌میر سه‌دیق ژی ته‌که‌ز کر، “ئه‌ڤ فه‌ستیڤاڵا خانی ڕاست ئه کو ب ناڤێ ڕه‌وشه‌نبیری و ڕاگه‌هاندنێ یه، لێ ژ هه‌می ته‌خێن جڤاکێ دگره کو ئیرۆ بێن و مفایی ژ ڤان په‌نه‌لان وه‌ربگرن کو دێ د ڤان دو ڕۆژان ده بێن پێشکێشکرن، خاسما ژی کو گه‌له‌ک که‌س ژ سه‌رناسه‌ری هه‌رێما کوردستانێ و ده‌رڤه‌یێ هه‌رێما کوردستانێ ژی دێ د ڤێ فه‌ستیڤالێ ده به‌رهه‌ڤ ببن.”
گه‌را دویێ یا فه‌ستیڤالا خانی نڤیسه‌ر و ڕه‌وشه‌نبیرێن هه‌ر چار پارێن کوردستانێ ل خوه کۆم کرنه و وان هه‌میان پێکڤه یه‌ک په‌یام هه‌یه، ئه‌و ژی زێده‌تر زه‌نگینکرن و ڕه‌وشه‌نبیرکرنا جڤاکا کوردستانێ یه
ک۲٤
- 238 خوێندنەوە
