دھۆک ب تری و سینەمایێ ناڤدار دبە....ھۆزان ئەمین

بەری چەند رۆژان و ل رۆژا کو سینەما کوردی یەک ژ دامەزرێنەرێ خوەیێ یەکەمین وندا کر د ٩-٩-١٩٨٤، ئەو ژی ناسکریە یولماز گونەی بوو، فەستیڤالا سینەمایێا ناڤنەتوی ل دھۆکێ ل دارکەت،

 و گەلەک ئەنجامێن باش ژێ ھاتن دەرخستن، ئەڤ فەستیڤال د بن چاڤدێریا سەرۆکێ حوکوومەتا ھەرێما کوردستانێ نێچیرڤان بارزانی و ژ ئالیێ رێڤەبەریا سینەمایا دھۆکێ کو سەر ب رێڤەبەریا گشتییا رەوشنەبیری و ھونەرییا و پارێزگەھا دھۆکێ دھات ب رێڤە برن  .

بێ گومان وەختا مرۆڤ ل سینەما وەک بەشەک ژ ھونەرا مرۆڤاتیێ دنێرە ، مرۆڤە گرنگیا وێ ژ مەلەتەکی مینا ملەتێ کورد کو ب حەزارێ سالان د بن زۆرا ستەمکاری و بندەستیێ دناسە، گۆرنگیا سینەما ژ کوردان رە پێوستیەک ژیانی، روحییە ، چما !؟ ژ بەر کو سینەما داھێنانەکە ھونەری و تکنۆلۆژی ب دەستێ مرۆڤان ھاتییە ھلبەرین، و مرۆڤان ئەو خستە د بن خزمەتا ھزر و کولتور و دانیسینا خوە و جڤاکا خوە، سینەما وەکوو ئالاڤەکە کو ب رێکا وێ مرۆڤ دکارە خزمەتا وەلات و خوەنێن ئاڤاکرنا وەلاتێ خوە بکە ، سینەما وەکوو یەکینەیەک ژ تەڤگەر و نیشانەیان پێکڤە دیمەنەک و چیرۆکەک د ناڤا خوە دە ھزرەک یان دیرۆکەک یان رەوشا ھن ئالیێن چەوت ددە خویاکرن، کو بکاربە بوغەرە یان ئێش و ئازارێن ملەتەکی ، ئان کێم و کورتی ل جھەکی دەستنیشان دکە ، ئەڤ تەڤدە تایبەتمەندیێ جڤاک و ئنسانان ددن نیشان دان و رویێن چاندا ملەتان و دابوونەریتێن وان ب رێکا وێنەیێ نیشان ددە ، رولا سینەما گەلەک گرینگە د ڤەکرنا پرسگرێکێن جڤاکێ و راخستنا وێ ل پێشیا بینەران، و ب ئاوایەکی رەحەت و سەناھی بینەر تێبگھێ ، و  شرۆڤە بکە ، سینەما دخوازە ب رێکا فلمان ناماکێ بگهینە مللەت و کەسێن ھەژار و وان ب حالێ وان بحسینە، و دەرباسی ھەر مالە دبە بێ ل دەری بدە وەختا کو ل سەر ئەکرانێ تەلەفزۆنا تێ نیشاندان.

ژ بەر وەھا وەختا رێڤەبەریا رەوشەنبیبری و ھونەری رادبە ب گێرانا فەستیڤلا فلمێن ناڤنەتەوی، ل باژارێ دوھۆکێ، بێ گومان ئەڤە گاڤەکە پیرۆزە و نە شاشە کو ب مەھان کار و ب کوژمێن زێدە ژ پەران لێ مەسرەفێ بکە ، ژ بەر ب پێشخستنا ڤێ ھونەرێ و داناسین وێ و ھاندانا جڤاکێ بەر ب ھەزکرنا سینەما دە و تەماشەکرنا فلمێن کوردی دە ئەرکەکە دکەڤە سەر ملێ وان، ژ بەر کو حەیا نھا فلمێن کوردی نەبوونە جھێ سرنجراکێشانا مرۆڤێن کورد ب قاسی کو بوونە جھێ دەستخوەشیا مرۆڤێن بیانی، ئەڤ فەستیڤال چ کاریبوو بکرا ؟ بەری ھەر تشتی لازمە مرۆڤ بزانبە کو ئەرمانجا سەرەکی بەر ب ناڤنەتەویکرنا ڤێ فەستڤال دە گاڤێن بنیاد وەرن ئاڤێتن، دوھۆک وەکی باژارەکی کوردستانی کو ب تری و جوورەیێن خوە ناسکری و ناڤدارە، و بەرگ یان پەلا مێوێ وەکە سەمبۆلا وێ فەستیڤالێ ھاتبوو دانین، دڤابوو کارەکی گەلەکی خورت ژ گەلەک ئالیان ڤە ( ئابووری- میدیا-رەکلام…ھود) وەرە کرن تا کو ئەڤ فەستیڤال وەرە ناسین د ھەرێم دە و پاشێ د جیھانێ دە، وەختا کو ئەم وەرن بنرخینن گەلۆ کا ئەڤ تشتانا ھاتن کرن، بێ گومان ئەمێ ببینن حەتا رادەیەکێ باش خەبات ژ گەلەک ئالییان پێک ئانین، ناسکرنا فەستڤالێ وێ د ناڤا سالەک و ددوان دە چێنەبە ئەڤ فەستیڤال ب سالانە خزمەت و کارەک بێ ھەمپا پێ دڤێ، ھەیا کو فەستیڤال بێتە ناسکرن.

ڤێ فەستیڤال دو رول لیستن، فلمێن کوردی ب بیانیان دا تەماشەکرن وێ بیانی ب کوردان رە دا تەماشەکرن، و مێڤانێن کو ژ سێ پەرچێن کوردستانێ بەشدار ببوون  ( ژ بلی پەرچێ رۆژاڤا، کو تو کەسی بەشداری تێدە نەکربوو) و ھەر وەھا ئەکتەر و دەرھێنەرێن بیانی ژی، بێ گومان ئەڤ فەستیڤال ببوو جھێ ھەڤدووناسینێ و پێوەندی د ناڤبەرا وان دە چێکر، و ژ سەرۆبۆریا ھەڤدوو سوودێ وەربگرتن و ب ھەڤرە پار کرن . ئەڤ تەڤدە وەک ئەنجامێن ڤێ فەستیڤالێ دەرکەتن، و ھەر وەھا خالاتکرنا فلمەکی درێژ و یەکی دیکۆمەنتی و سێ کورتەفلم، گرانیک ھین زێدە و جدیەتا وێ ھین بێتر كر، و راگھاندنا ل دارخستنا فەستیڤالا دوەم د سالا بێ دە ئەڤ ژی نیشانەیێ سەرکەفتنا ڤێ فەستیڤالێ بوو، ئەم ھێڤیدارن کو ئەڤ ئەنجامێن کو وەک مەرج ھاتبوون دانین بۆ سەرکەفتنا فەستیڤالێ، دە د خولێن وێیێ بێن دە ژی پێک بەن و دوھۆکا رەنگین ب ڤێ فەستیڤالێ ھین بەھتر رەنگین و ب خەملتر ببە، و ل گۆرا دیتنا من بەشداریبوونا خەلکێ د ڤێ فەستیڤالێ دە و راکێشانا جڤاکێ بەر ب ھەزکرنا تەماشەکرنا فمان دە، و ناسکرنا وان چێبوو کو ئەڤ فەستیڤال ژ بۆ وانە ژی نە تەنێ بۆ ئەکتەر و سازکارێن فلمانە باشترین ئەنجام بوو ژ فەستیڤالێ ھاتە وەرگرتن، و ئەم ھێڤیدارن کو دھۆک وەک ب تریێ خوە ناڤدارە ب فەستیڤالا فلمان دە ژی ناڤدار ببە، و جھەکی خوە د رێزە فەستیڤالێ دونیایێ دە بگرە .

روژناما وار