سه‌لاح محمه د : ئه‌ز مينا له‌شكرێ وندا مه د ناڤ ره‌وشه‌نبيرێن كورد دا... هۆزان ئه‌مين
ل سالا 1965ێ ل گونده‌كي نێزيكي قامشلۆ ژ دايكبوويه و خواندنا خوه يا ناڤنجي ل قامشلۆ خوانديه، لێ ژ به‌ر نه‌بوونا ده‌رفه‌تا خواندنا خوه ل جي هشتيه،
ژ به‌ر كۆ مرۆڤه‌كي بياني بوو، بێ ناسنامه بوو، دبێژت: هه‌تا نها ژي ناسناما من نينه، ل سالا 1982ێ ده‌ست ب كارێ وێژه‌يي كريه، ده‌مێ كۆ ل پايته‌ختێ سووريێ بوو، ل به‌ر ده‌ستێ نه‌مر ئۆسمان سه‌بري فێري زمانێ كوردي بوويه و د شه‌رت و مه‌رجێن تنه‌بوونا ده‌رفه‌ت و دبستانا و ب شيانێن خوه، خوه پێشخست، و دبێژت “ده‌ما ئه‌ز ڤه‌گه‌ريام باژارێ قامشلۆ و ب ئاليكاريا هن براده‌ران، من هه‌ست كر كۆ گه‌لێ مه پێدڤيا وي ب فێربوونا زمانێ كوردي هه‌يه، له‌وما من پرتووكا (فێركرنا زمانێ كورمانجي) نڤيساند و كۆرسێن زمانێ كوردي من ڤه‌كرن” و ل سالا 2006ێ ب فۆتۆكۆپي 1000 دانه چاپكرن، هه‌تا كۆ ب ئاوايه‌كي فه‌رمي رازيبوون ل سه‌ر چاپكرنا وێ هات و ل وه‌شانخانا ئه‌لزه‌مان ل شامێ ل سالا 2012ێ چاپ و به‌لاڤ بوو، گه‌له‌ك ده‌نگڤه‌دا و هه‌يا نها سێ چاپ ژێ ده‌ركه‌تينه، وه‌ك پرتووكا په‌روه‌ردێ ژ په‌نابه‌رێن كوردێن رۆژئاڤا ل قوتابخانێن جان تێ په‌روه‌رده كرن و نها ل باژارێ باتمانێ ل باكورێ كوردستانێ ژيانا خوه د دوومينه، من ئه‌و ل كۆنفرانسێ ره‌وشه‌نبێرێن رۆژئاڤايێ كوردستانێ ل ئامه‌دێ ديت و ب خه‌م و كه‌سه‌ر ل سه‌ر خوه و پرتووكێن خوه و كه‌د و وه‌ستيانا خوه دئاخڤي، مرۆڤه‌كي خه‌مخوه‌رێ زمان و وێژه‌يا كورديه، خودانێ گه‌له‌ك شيانانه و به‌حسێ وان بۆ مه كر، نه‌مازه ل سه‌ر زمانێ كوردي و د ڤێ ده‌رباري دا گۆت كۆ “د بن شه‌رت و مه‌رجێ قه‌ده‌غه‌بوونا زمان كوردي ل رۆژئاڤايێ كوردستانێ ل سه‌ر شيانێن خوه يێن كه‌سايه‌تي به‌ري 15 سالان من كۆرسێن زمانێ كوردي ڤه‌دكرن و ب سه‌دان گه‌نجێن كوردان ل سه‌ر ده‌ستێ من په‌روه‌رده بووينه و ل دووماهيا هه‌ر كۆرسه‌كێ من باوه‌رنامه ددانه شاگردان”
مامۆستا سه‌لاح نه ته‌نێ د وارێ زمان دا زيره‌كه نا؟ د وارێ رۆژنامه‌گه‌ريا كوردي دا ژي خودان ئه‌زموون و كه‌ده‌كا مه‌زنه و دبێژت كۆ من د گه‌له‌ك كۆڤارێن كوردي دا كار كريه مينا “گوليستان، رۆژ، ژين، ره‌وشه‌نبيرێ پێشكه‌تي (عه‌ره‌بي)، مه‌واسم، زانين، گوليزار تايبه‌ت ب زارۆكان.. هتد” و ته‌ڤدا د ناڤ شه‌رتێن بێ ده‌رفه‌ت و شيانان ژ ئاليێ ئابووري و يێ ئه‌وله‌يي دا دهاتن راوه‌ستاندن، ژ به‌ر وان سه‌ده‌مان من ب گه‌له‌ك ناڤان گۆتار و بابه‌ت نڤيسينه، و دبێژت: ئه‌ز مينا (له‌شكرێ وندا) مه كه‌س نزانه، ئه‌ز هه‌مه يان تونه مه، ب ده‌هان پرتووك من پێداچوون د وان دا كرينه و من سه‌ڕاست كرينه، لێ ناڤێ من نه ديار بوو، ئه‌م دبينن چقاس خه‌لات تێن به‌لاڤ كرن، گه‌لۆ هاتيه بيرا سازيه‌كێ يان فيسته‌ڤاله‌كێ كۆ بێژن ئه‌ڤ ژيكه‌د و وه‌ستيانا وي د به‌ر زمان و وێژه‌يا كوردي دا هه‌يه دا كا ئه‌م رێزلێنانه‌كێ لێ بگرن، نا مخابن!
به‌رهه‌مێن وي:
ب ته‌ڤايي خودانێ 22 به‌رهه‌مانه، پێكهاتينه ژ هه‌لبه‌ست و زمان يان وه‌رگێر ب كوردي و عه‌ره‌بي، و هه‌تا نها 4 چاپكرينه.
ديوانا نووبار سالا 1999
ئاگرێ سينه‌ما ئامووده يا مه‌لا ئه‌حمه‌د نامي (وه‌رگێران) ب فۆتۆكۆپي چاپ كريه سالا 2000
ديوانا هێڤيا من سالا 2003
فێري زمانێ كوردي ببه (فۆتۆكۆپي) سالا 2006
فێري زمانێ كوردي ببه وه‌شانخانا ئه‌لزه‌مان سالا 2012
و گه‌له‌ك به‌رهه‌مێن وه‌رگێراي و هه‌لبه‌ست هێشتا نه‌هاتنه چاپكرن.
پرتووكا وي يا گرنگ يا ب ناڤێ بوويه‌رێن ديرۆكێ كۆ هه‌يا نها 61 هه‌زار بوويه‌ر جڤاندنێ ژ به‌ريا زاينێ هه‌يا نها ل سه‌ر ئاستێ دونيايێ ته‌ڤي كێمبوونا چاڤكانيان خه‌بات به‌رده‌وامه.
ل سه‌ر پرتووكا ئاگرێ سينه‌ما ئاموودێ يا مه‌لا ئه‌حمه‌د نامي دبێژت “ من ل سه‌ر بهيستبوو، ئه‌ز لێگه‌ريام من په‌يدا كر و من وه‌رگێرا و مامۆستا ئيبراهيم ئه‌ليوسڤ پێداچوون كري، و پشتي ده‌ستوورا مالباتا وي، من ب ده‌ستێ خوه 1000 دانه ل مالێ ب فۆتۆكۆپي چاپ كرن، د ڤان سالێن دووماهيێ دا چاپه‌ك دي ژێ ده‌ركه‌ت ب وه‌رگێرا قادر عه‌گيد كۆ ده‌زگه‌هێ سه‌ما چاپ و به‌لاڤكريه.
مخابن ژ به‌ر شه‌رت و مه‌رجێن دژوار كۆ ئيرۆ رۆژئاڤايێ كوردستانێ تێدا ده‌رباس دبه مامۆستا سه‌لاح محه‌مه‌د نه‌جار بوويه مشه‌ختي باژێرێ باتمانێ بوويه، و دبێژت كۆ گه‌له‌ك زيان ل مه بوويه و ئه‌ز نه‌جارم كار بكم بۆ ده‌بارا مالا خوه، و ل وه‌لات ژي ره‌وشه‌نبيرێن كورد ئيرۆ دخوازن ببن خودان ده‌نگ و دخوازن ڤي تشتي ژي ب گه‌له‌ك ئاوايان پێك بينن و گه‌له‌ك گرۆپ و كۆمك چێبوونه، و دبێژت ئه‌ز ته‌ڤلي چو كۆمێ نه بوويمه و داخوازا وي هه‌ڤگرتنا ره‌وشه‌نبيرێن رۆژئاڤايێ كوردستانێيه، و ژ بن باندۆرا پارتيێن سياسي ده‌ركه‌ڤن، و هيڤيا وي ئه‌وه كۆ به‌رهه‌م و وه‌رگێرێن وي بێنه چاپ و به‌لاڤكرن.
روزناما ئه فرو
- 2470 خوێندنەوە
