فيسته‌ڤالاهه‌لبه‌ستا مللى يا عيراقى ل دهۆكێ هاته ئه‌نجامدان
ب گوره‌ى داخوازا ئێكه‌تيا هه‌لبه‌ستڤانێن مللى يێن عيراقى كو هه‌موو پارێزگه‌هێن عيراقێ ڤه‌دگرت، ئێكه‌م فيسته‌ڤالا هه‌لبه‌ستا مللى يا عيراقى، ب پشكداريا (45) ميڤان و هه‌لبه‌ستڤانان،دوهى 27/3 ل هولا ئێكه‌تيا نڤيسه‌رێن كورد/دهۆك هاته گێران و ئه‌ڤرۆ ژى دێ يا به‌رده‌وام بيت.
هه‌لبه‌ستڤان و رۆژنامه‌ڤان فدعه‌م ئه‌لحه‌يالى سه‌رۆكێ شاندێ ناڤبرى دياركر كو بۆ ده‌مه‌كێ درێژه وان ل به‌ربوو فيسته‌ڤاله‌كا ب ڤى ره‌نگى ل هه‌رێما كوردستانێ ب گێرن و بۆ ئه‌ڤرۆ گوت: پشتى مه ئه‌ڤ داخوازه پێشكێشكرى ب سوپاسيڤه ئێكه‌تيا نڤيسه‌رێن كورد/دهۆك خۆ ل پرۆژه‌يێ مه كره خودان و ب مێڤانداريا ڤيسته‌ڤالێ رابوون،ب راستى ئه‌م گه‌له‌ك ب ڤێ هاتنێ دلخوشين چونكو خه‌لكێ دهۆكێ ب مێڤانداريان يێ ناڤداره و زێده رێز ل مه و شاندێ مه هاته گرتن و هيڤيا من ئه‌وه ئه‌ڤ پرێن ره‌وشه‌نبيرى د ناڤبه‌را مه وه‌كو نڤيسه‌ر و هه‌لبه‌ستڤانێن عه‌ره‌ب ل گه‌ل برايێن مه نڤيسه‌ر و هه‌لبه‌ستڤانێن كورد دبه‌رده‌وام بن و هيڤيا من ئه‌وه سالانه ئه‌ڤ فيسته‌ڤاله بهێنه‌كرن، ئه‌ڤه دهۆك بوو ده‌ستپێك و هيڤى خوازين ل سالا بهێت ل هه‌ولێرێ، پاشان ل كه‌ركووك و مووسل و به‌غدا ژى نه‌به‌س ئه‌ڤ فيسته‌ڤاله به‌لكو فيسته‌ڤالێن ستران و موزيك و شانۆ و .... هتد بهێنه‌كرن.
حه‌سه‌ن سلێڤانه‌ى سه‌رۆكێ ئێكه‌تيا نڤيسه‌رێن كورد/دهۆك ژى دياركر كو ئه‌و ب گێرانا ڤێ فيسته‌ڤالێ ل دهۆكێ دلخوشن و بو ئه‌ڤرۆ گوت: ژ ئه‌نجامێ وێ ته‌ناهى و ئاراميا ل كوردستانێ هه‌ى ل سالێن بۆرى ئه‌م وه‌كو ئێكه‌تيا نڤيسه‌ران شياينه چه‌ندين تێكه‌ليێن ره‌وشه‌نبيرى ل گه‌ل پتريا نڤيسه‌ر و به‌هره‌مه‌ندێن عيراقى په‌يدا بكه‌ين و ده‌مێ ده‌ستپێشخه‌ريا ڤێ فيسته‌ڤالێ گه‌هشتيه مه ب سوپاسي ڤه ديوانا پارێزگه‌ها دهۆكێ و جڤاتا پارێزگه‌ها دهۆكێ داخوازا وان قه‌بوولكر و فيسته‌ڤال ل دهۆكێ هاته گێران. ل دۆر به‌رنامێ ئه‌ڤرۆ ژى 28/3 سلێڤانه‌ى گوت: دێ هه‌موو مێڤانێن فيسته‌ڤالێ به‌ينه سه‌يرانه‌كێ ل ده‌ڤه‌را زاويته و ئاشاوا و ئامێديێ.
- بۆچوونێکی نوێ بنووسه
- 2624 خوێندنەوە
