گاڤا کوو ماسی تی دبن ب سۆرانی دەرکەت

رۆمانا حەلیم یوسف "گاڤا کوو ماسی تی دبن" کو بەرێ ژ کوردی ژ بۆ ترکی، ئینگلیزی ئوو فارسی هاتبوو وەرگەراندن ئوو وەشاندن، نها ژ ئالیێ سەلاحەدین بایەزیدی ڤە ژ بۆ سۆرانی هات ئاداپتەکرن ئوو رۆمان ب سۆرانی دەرکەت. هەروها حەلیم یوسف ژ بۆ ڤێ یەکێ دێ لە سلێمانی بەشداری فەستیڤالێ ببە ئوو رۆمانا خوە ئیمزە بکە.
رۆمانا حەلیم یوسف "گاڤا کوو ماسی تی دبن" ژ ئالیێ وەشانخانەیا ئەندێشە ڤە هاتە چاپکرن. وەشانخانەیا ئەندێشە یەک ژ وەشانخانەیێن سەرەکە یێ باشوورێ کوردستانێ یە. هەتا نها ل سلێمانیێ ب سەدان پرتوکێن ب زمانێ کوردی (زاراڤەیا سۆرانی) وەشاندییە. هەر وسا ئەڤ سێ سالن کوو فەستیڤالەکە چاندی ب ناڤێ ئەندێشە لداردخە. ئیسال وێ فەستیڤال د رۆژێن ١٤ هەتا ١٦ێ مژدارێ دە بە. د فەستیڤالێ دە هەر سال رۆماننڤیسەک تێ خەلاتکرن. هەتا نەها بەختیار عەلی و عەتا نەهایی هاتنە خەلاتکرن. 
خوەدیێ ئەندێشە هەژار مەجید، د رۆژا ٢٧ێ مەهێ دە، د رووپەلا خوە یێ فەیسبووکێ دە، ئەشکەرە کر کوو ئەوێ رۆمانا "گاڤا کوو ماسی تی دبن" ب سۆرانی بوەشینن ئوو وێ ب ئامادەبوونا نڤیسکارێ وێ حەلیم یوسف د رۆژا ١٥ یێ مژدارێ دە، د چارچۆڤا چالاکییێن فەستیڤالێ دە، بێ بەلاڤکرن. هەر وسا وەشانگەر هەژار مەجید بەحسا قۆناخەکە نوو د رۆمانا کوردی دە دکە، بالێ دکشینە سەر گرنگییا رۆمانا "گاڤا کوو ماسی تی دبن" ئوو ئاوایێ هۆناندنا وێ ئوو ب گەرماییەکە مەزن خوەندەڤانان ڤەدخوینە خوەندنا ڤێ رۆمانا گرینگ.
نها ئەڤ رۆمانا حەلیم یوسف ل سۆرانی هاتە ئاداپتەکرن ئوو ب ناڤێ "کاتێک ماسییەکان تینوو دەبن" ژ ئالیێ وەشانێن ئەندێشە ڤە تێ وەشاندن. ئەڤ یەکەم رۆمانا نڤیسکار یوسفە کوو وێ ب زاراڤایێ سۆرانی بێ وەشاندن ئوو بەلاڤکرن. سەلاحەدین بایەزیدی رۆمان ئاداپتەیی سۆرانی کرییە. 
"ماسی" ب زمانێن بیانی ژی هات خوەندن
چاپا یەکەم ئا رۆمانا ''گاڤا کوو ماسی تی دبن" د سالا ٢٠٠٨ئان دە ژ ئالییێ وەشانێن لیسێ ڤە هات چاپکرن ئوو د سالا ٢٠١٤ئان دە وەشانێن پەیوەندێ چاپا وێ یا نوو پێشکەشی خوەندەڤانان کر. رۆمان هەتا نها ژ بۆ ترکی، ئینگلیزی ئوو فارسی هاتییە وەرگەراندن ئوو وەشاندن.

ديارنامه