BUHIŞTA ROJHILATIM...HELBEST: MİHEMED XÊR BENGO

Rast e îro birîndar im bê sînor

Belê kurd im evîndarê welat im

Kes birînên di dilan de nabîne

Gelek caran hilatim û dahatim

Mirovim ez xwedî dîrok û al im

Lê mixabin bindest im bê welat im

Min çandî her bostekê pakrewanek

Ji bo jînê ez tovim kok û kat im

Pêşmerge me navê min al û nîşan

Li rû zemîn weke rojê hilatim

Bi xwîna xwe dinivîsim azadî

Sîpan im ez Cûdî û Erarart im

Ji bo gel ez buhar im gul û nêrgiz

Li dijmin ez pêt im ar im şewat im

Bi salane mame di tarîşevan

Îro ji nû heyv û roj im hilatim

Min di dil de veşartiye Kurdistan

Bakur, başûr, rojava rojhilat im

Alên reş tev pîs û xinizên dijmin

Didim ber xwe weke Zab û Ferat im

Divê pak be ev xaka min ya pîroz

Dibim gorî hawar û kêferat im

Ger rojekê serxwebûnê bibînim

Bawer bikin buhişta rojhilat im

Bawer bikin buhişta rojhilat im