![helbestvan: Ezîz Xemcivîn helbestvan: Ezîz Xemcivîn](http://semakurd.net/sites/default/files/imagecache/400xY/eziz-xemcivin_0.jpg)
Xameya xeman
bi ximava xewnên me xemilî!
Tîpên kedîgeha sawîrên "Ezîz Xemcivîn"
li ber bayê henaseya te bişkivîn!
Hesteka xurek e,
bi perwazan difire..
Her çendî dilekî gir û kulmezin e,
her kêlîk,
ji stema dûrbûna te bi gazin e!
Parzemîna dilîniya te zêrîn e,
çendî bi şêrîniya girnijîna xwe digirnije..
Bi tîp û temtêla kenok bêjesaz û bi hestên gulgulî,
sibeha min tu yî,
şev û xewna hiş her dîsa tu yî..
25.05.2024
********
Ezîz Xemcivîn - Çi Me Ez?
çi hêz im,
ko karibim ba û pêlê
ji hev cuda bikim?
çi dil im,
ko çav û nerînê
ji dûrbînê,
temaşeyê
rizgar bikim?
çi şoreş im,
ko nesrînê
ji evîna buharê,
ji geşbûna birûskên dil
koçbar bikim?
çi şiyarî me,
ko xewna zarokekî
bi {lîska diz û xanî}
ji {çavgirtinkê}
şiyar bikim?
çi me ez?
çi me
çi dar im
ko tenikbûna gula sor
di hêtûna biyaniyê de
bi çilmisînim?
û çi denekî dîn im,
ko meya kevnar,
di nêv nikilên
du kewên evîndar,
wek ba û avê
bikim kanî
û
bi herikînim?
*Ji dîwana wî "ZINDAN"
*******
Mirin e,
an jî xewn e,
ez nizanim!
Man e,
an jî neman e,
ez wê jî nizanim!
Çira ye,
bi hilmekê kêferatê dike,
bi hilmekê hiş divemirîne!
Dengvedana sawekê ye,
keldûmana hizira tunebûnê diferikîne..
Li pêşberî te nawestim û narawestim,
ji min ve tevdaneka kelegirîn e!
Li pey rewrewkê me,
ew ne av e,
na na ne mîrkutê hişyariyê ye
û ne tovê bişkuvîn e!
Sêdar e dem,
bi min û te yekpar e,
di gerdena azad de nan û xwê dicivîne!
Li pey te diçim,
hespê rewanê xwe ji şopê danagerînim..
De li hêviyê bimîne,
tehlîşka şîn vedibe,
dilê min jî her ew dilbijîn e!
23.04.2024
*************
Mihr roj e û rojgihiştin Mergeh e
Dilê min ji Şemsê ronak dibe,
ev baweriya min a kevnejîn û nuhîn e..
„Roj çavê Şêşims e“
Em miletê Mihrikî ne,
„Mihrika me bi çavekî”
wisa ye,
Mihrik çavê asîmanê şîn e!
Sibeha min bi rojê hilat e,
hilata hêza min rojîn e!
04.04.2024
***********
Di navbera kêstek û kevirî de
tayê bişkuvînekê nebirîne!
Di gerdena mirinê de jî,
ne bendewarê nixîska dawî be..
Evînê bike kolosê dil,
çavan li deriyan negerîne!
Bila Sibata te 29 be,
hêsiran li ser adara derengmayî nebarîne!
Bi xameya ronak hevokên derdê te vediçirînim,
aram be,
hezar dergeh li hêviya firîna te vekirî ne..
28.02.2024
**********
Jêder : rûpela Helbestvan