Helîm Yûsiv Xelata Romana Kurdî stand

Li bajarê Silêmanî di Festîvala Çandî ya Endêşe de Xelata Romana Kurdî a îsal dan nivîskar Helîm Yûsiv.

Weşanxaneya Endêşe ku wekî mezintirîn weşanxaneya pirtûkên wêjeya kurdî ye (bi zaravayê Soranî, li başûrê Kurdistanê) ev 3'yemîn sal e ku festîvaleke rewşenbîrî û hunerî li dardixe. Festîval îsal di navbera 14-16'ê mehê de li dar ket û bi xelatdayînê bi dawî bû.

Festîval her sal nivîskar û xwendevanan tîne ba hev, bernameyên çandî li dar dixe û dûre jî romanivîskarek xelat dike. Di her du salên pêşî de bi navê Xelata Romana Kurdî xelat dabû Eta Nehayî (ji rojhilatê Kurdistanê) û Bextiyar Elî (ji başûrê Kurdistanê) vê carê ev xelat da nivîskar Helîm Yûsiv. Yûsiv roja dawî ya festîvalê bi merasimek xelata xwe ji destê romanivîskar Bextiyar Elî girt û sipasiya xwe ji bo amadekarên festîvalê kir.

Weşanxaneya Endêşa romana Helîm Yûsiv "Gava Ku Masî Tî Dibin" jî ji kurmancî kiribû soranî, çap kiribû û di festîvalê de pêşkêşî xwendevanan kiribû. Ji bo vê yekê di roja duyemîn a festîvalê de Helîm Yûsiv ji bo gelek mêvanên hatibûn festîvalê li ser roman û nivîskariyê axivîbû û dûre romana xwe ji bo xwendevanan îmze kiribû.

Festîvala Rewşenbîrî û Hunerî ya Endêşe bi awayekî serketî bi dawî bû û heta salek din xatir xwest.

Diyarname