بەربژێرێ نۆبەلێ عبدالله پەشێو ل ئامەدێ ھەلبەستێن خوە خوەندن

ھۆزان ئەمین

ب بەشداریا ژمارەک مەزن ژ رەوشەنبیر و نڤیسکارێن کورد و بەرپرسێن سازیێن جڤاکی ل ئامەدێ و کۆمەلەیا نڤیسکارێن کورد و رۆژنامەڤانێن گەلەک TVو رۆژانامەیان ل ئامەدێ چالاکیا ھەلبەستخوەندنێیا عبداللهپەشێو ل دارکەت.

ب مەرەما بالکشاندنا سەر ھەلبەستڤانێ کورد یێ ناڤدار عبدالله پەشێو کو وەک بەربژێرێ خەلاتا نۆبەلێیا وێژەیێ ھاتە دەستنیشانکرن ئەڤ چالاکی ل دارکەت د رۆژا یەکشەمبێ 17-گولانێ دە ل ناڤەندا چاندێیا جەگەرخوین د بن رێڤەبەریا پەنا کورد و مالۆڤانیا شارەداریا باژارێ مەزنا ئامەدێ ھات ل دارخستن.

د دەستپێکێ دە شێخمووس سەفەر سەرۆکێ پەنا کورد ئاخافتنەک کر و ب گەرمی بخێرھاتنا ھەموو مێڤانان کر و واتا ل دارخستنا ڤێ چالاکیێ ل ئامەدێ ئانی زمان و رەولا عبدالله پەشێو وەک ھەلبەستڤانەکی کورد د ناڤا وێژەیا کوردی دە بلند نرخاند و بال کشاند سەر ھن ئالی و واتەیا ھلبژارتنا پەشێو بۆ خەلاتا نۆبەلێ، و ب بیر خست کو ژ ھەلبەستێن وی بێھتر ئەو پەشێو ب ھەلوەستا خوەیا ل دژی براکوژیێ دناسن و  ھەلوەستێن خوەیێ نەتەوی و کوردستانی.  

پشتی ئاخافتنا سەفەر ھەلبەستڤانا ئەمریکی مارییا لابرۆسسە، ب زمانێ ئینگلیزی ھەلبەستێن پەشێو “یەکتی”، “گەنجینە”، “شەرڤانێ وندا” و “ئەز ژ تە ژی ھەز دکم ژ وێ” خوەندن.

و ل داوی عبدالله پەشێو دەرکەت پێشبەری حەسکریێن خوە و ب چەپکێن کەسێن بەشدارڤان کو جھ د ھۆلێ دە نەمابوو، کۆمەک ھەلبەستێن خوە خوەندن و ژ ئالیێ بێریڤان دۆسکی هاتن گوھەزتن سەر زاراڤایا کورمانجی، و ب ئمزەکرنا ھن دیوانێ خوە چالاکی ب داوی ھات.

ھێژایی گۆتنێیە کو ئەڤ چالاکی ل ھن دەڤەرێن دن ژی ل دارکەتن ل زانکۆیا ئارتوکلویا مێردینێ د 18 گولانێ دە و رۆژا 20 گولانێ ل سالۆنا ڤاتسۆیا وانێ وێ ل دار کەڤە.

عبدالله پەشێو:

د سالا 1946ێ ل گوندێ بێرکۆتێ ھەولێرێ ھاتە دنێ، د دو سالیا خوە باڤێ وی دمرە، ھەلبەستا وییا پێشین سالا 1963ێ د کۆڤارا ھەولێر دە ھاتە وەشاندن، ھەمان سالێ کەتە ناڤ رەفێن پێشمەرگا دە، پاشی ڤەدگەرە ھەولێرێ و ژ ئاکادەمیا مامۆستەیان دقەدینە، سالێن 1970-1973ێ ل ھەولێر و دەردۆرا مامۆستاتیێ دکە، پاشی بەرێ خوە دا وەلاتێ سۆڤیەتا بەرێ و ل مۆسکۆوێ خوەندنا خوەیا بلند تەمام دکە، و ژ ئەنستیتویا وەرگەرا زمانێن ئینگلیزی و رووسی دپلۆما خوە وەردگرە. 1984ێ لیسانسا بلند ل سەر پیرەمێرد کر. پەشێو دەمەکێ ل لیبیایێ ل زانینگەھا الفتح خوەندەواریا ب زمانێ عەرەبی دکە. و د سالا 1994ێ ڤەدگەرە ھەرێما باشوورێ کوردستانێ  وێ دەمێ  ژ بەر شەرێ براکوژی ھەلبەستا خوەیا براکوژی وەک ‘ھەلوەست نڤیساند و پشتی کو ئەو ل مەیدانەکە ھەولێرێ خوەند وەک پەنابەر بەرێ خوە دا فنلاندیایێ، پەشێو بەرھەمێن ژ پوشکن، لەرمۆنتۆڤ، یەسەنن و گۆرکی وەرگەراندنە کوردی و ھێ ژی ل ھەلسینکیێ ژیانا خوە ددۆمینە.