دهۆک ئیسماعیل تاهری ژبیر ناکەت .. بەلێ؟!... ئیبراهیم دێرگژنیکی

ئیسماعیل تاهر ژ وان رۆژنامەڤان و نڤیسەران بوو، یێ شیای ناڤەکی مەزن و بەرهەمەکێ ب بها ل پشت خۆ بهێلیت، ژ خاندەڤانێن باش بوو، لەو ڤەرێژا خاندنا وی هژمارەکا باش یا پەرتووکان نڤیسین، د ساخیا خۆ دا، ب تنێ شیا ٩ کتێبا بگەهینتە چاپێ و هژمارەکا کتێبان ژی ل پشت خۆ هێلان، هندەک ژ وان کتێبان نڤیسین بوون و هندەک ژی وەرگێران بوون. مخابن شیانێن دارایی ببونە ئەگەر پتریا بەرهەمێ خۆ د ساخیا خۆ دا نەبینیت، وەکی چەندین نڤیسەرێن دی بەرهەمێن وان روناهی نەدیتن.

 لێ خالا دلخوشکەر پشتی وەغەرا نڤیسەر ئیسماعیل تاهری، نەهــ کتێبێن وی یێن دی چاپ بوون، کو ئێک ژ وان ل چل رۆژیا وەغەرکرنا وی هاتبوو بەلاڤکرن ژ لایێ دەزگەهێ پالو و هەشتێن دی د رێورەسمەکی دا، ل ژێر ناڤێ (دهوک ئیسماعیل تاهری ژبیرناکەت) ژ لایێ رێکخراوا مەند بۆ یەکسانیێ بهەڤکاری دگەل رێڤەبەریا گشتی یا رەوشەنبیری و هونەری ل دهوکێ و زانکویا نەورۆز ل هۆلا زانکویا ناڤبری سازکرن، کو ئەو هەشت کتێبێن وی ل سەر ئەرکێ سەرۆکاتیا هەرێما کوردستانێ هاتینە چاپکرن،  ب هیڤیا وێ ئێکێ بەرهەمێ نڤیسەرێ رەحمەتی ئیسماعیل تاهری ببیتە هێڤێنێ ڤەکولینێن دەرچوونێ و نامەیێن ماستەر و دکتورایێ. و ئەو بەرهەمێن ماین ژی رۆناهیا چاپێ ببینن.

ئیسماعیل تاهر وەک میدیاکار هەر ژ سالا ١٩٩٣ ێ وەک دارێژەرێ دەنگ و باسان ل رادیویا دهوک کارکریە، هەروەسا ل تەلەڤزیونا دهوک ژی کار کریە وپەیامنێری بۆ چەندین رۆژنامە و کوڤاران کریە. وەک فەرمانبەرەکێ وەزارەتا رەوشەنبیری رۆلەکێ گرنگ د پەیکەرێ رێڤەبەریا گشتی یا رەوشەنبیری وهونەری ل پارێزگەها دهوکێ و رێڤەبەریێن ب سەر ڤە گێرایە، چەندین پوست وەرگرتینە و د کارێن خۆ دا هەردەم پێشەنگ بویە، ژ وانا رێڤەبەرێ سەنتەرێن رەوشەنبیری و تیپێن هونەری ٢٠٠٩ - ٢٠١٢ ێ، جێگرێ رێڤەبەریا چاپ و وەشانێ ل پارێزگەها دهوک ٢٠١٢ - ٢٠١٤ێ، رێڤەبەرێ گارگێری ل رێڤەبەریا گشتی یا رەوشەنبیری و هونەری ل پارێزگەها دهوکێ ٢٠١٤ - ٢٠١٥ێ، رێڤەبەرێ پەرتووکخانێن گشتی ل پارێزگەها دهوک (پەرتووکخانا بەدرخانیان) ٢٠١٥ - و هەتا وەغەرکرنا وی ل سالا ٢٠٢١ێ یێ بەردەوام بوو و پەرتووکخانیا بەدرخانیان ل سەر دەمێ وی ببو چالاکترین سازیا رەوشەنبیری ل پارێزگەها دهوکێ و بزاڤێن رەوشەنبیری و جڤینا نڤیسەران و گرنگیدانا ب کتێبان ل ئاستەکێ بەرز دا بوون، هیڤیە پەرتووکخانا بەدرخانیان پشتی وەغەرا وی ژی بمینیت ئەو مالا نڤیسەر و حەزژێکەرێن رەوشەنبیریێ و کتێبان کومڤەدکر و هەر یا ب بزاڤ بیت. دیسان ژ وێستگەهێن گرنگ یا کارکرنا ئیسماعیل تاهری، ئەو بوو دەما بوویە سکرتێرێ لقێ دهوک یێ سەندیکا رۆژنامەنڤیسێن کوردستانێ ٢٠٠٨ - ٢٠١٢ێ، کو بەری هنگێ ب سالەکێ ئانکو سالا ٢٠٠٧ێ ئەز ببومە ئەندامێ سەندیکایێ ب راستی شادەییێ بۆ ددەم، رەحمەتی ئیسماعیل تاهری سەندیکا رۆژنامەنڤیسان گەلەک ب باشی برێڤەدبر و شیابوو سەرەدەریەکا باش دگەل هەمی لایەنان بکەت و ب پیشەیی کار بکەت و بێی فەرق وجوداهی و دیر ژ بازنێن حزبی سەرەدەری دگەل هەمی رۆژنامەڤانا کریە و پشتەڤانیا وان کریە و شیانێن وان پێشئێخستینە.

ژ لایەکێ دیڤە گەلەک هاندانا گەنجان و ژنان دکر و هەردەم هاریکار و پشتەڤانێ وان و پرانیا نڤیسەر و میدیاکاران بوویە، ئؽک ژ بەرنامێن وی بەرنامێ پەرتووک ل تەلەڤزیونا دهوک، تێدا سەد نڤیسەر دانەنیاسین و بەرهەمێ وان بەرچاڤ کر، هەروەکی بەری وەغەرا خۆ جارەکێ وی بۆ من بەحسکری، وی ل بەربوو سیزنێ دووێ یێ بەرنامەی ب شێوازەکێ رەخنەیی بەرنامەی پێشکێش بکەت و ب مێڤانداریا کەسێن بسپور شرۆڤە و رەخنەیێ بێخیتە ل سەر بەرهەمێن نڤیسەران.

ئیسماعیل تاهر هەڤالەکێ وەفادار و دلسوز بۆ هەڤالینیێ، جارەکێ مە پێکڤە پیاسەک ل بازاری کر و چوینە سەندیکا هونەرمەندان وپاشی گوت دا بچینە دەف فلانی و فلانی، ئەو هەڤالێن من یێ کەڤنن و دڤێت مرۆڤ هەڤالێن خۆ ژبیر نەکەت و هەر دەم بۆ دەمی سەرەدانا وان بکەت.

ب وەغەرکرنا ئیسماعیل تاهری مە گەنجینەکا رەوشەنبیری یا پری گەوهەر ژ دەست دا و ڤالاهیەکا مەزن ئێخستە بزاڤا رەوشەنبیری ل دەڤەرێ.

لەوا دا ب کریار دهوک و کوردستان ئیسماعیل تاهری ژبیر نەکەت، فەرە خێزانا وی نەهێتە ژبیرکرن، کو مخابن هەتا نوکە ژی کرێدارن، بەرهەمێن وی یێن ماین نەهێنە ژبیرکرن وبهێنە چاپکرن و پەرتووکخانا بەدرخانیا نەهێتە ژبیرکرن و کا چەوا ب ساخیا وی سازیەکا ئەکتیف بوو و پر بزاڤ بوو، درێژە ب وێ خەباتێ بێتە دان و ل شوین پێنگاڤێن وی بچن.

Rewange  û raxne