ده‌رهێنه‌رێ :حسێن حه‌سه‌ن : ئه‌ز ستايلێ خۆ نا گوهۆڕم چونكو ئه‌ز حسێنم
ده‌رهێنه‌رێ ناڤدارێ باژێرێ دهۆكێ، حسێن حه‌سه‌ن، خودان ستايله‌كێ تايبه‌ته و ل هه‌موو كاران يێ نێزيكى ئێكه، و ل دووڤ
گۆتنێن وى ئه‌و ستايلێ خۆ ناگوهوريت چونكو ئه‌و حسێنه و نابيته كه‌سه‌كى دى.
حسێن حه‌سه‌ن بۆ رۆژنامه‌يا ئه‌ڤرۆ ديار كر كو وى گه‌له‌ك پرۆژه د سه‌رێ خۆ دا هه‌نه، لێ گه‌له‌ك ژ وان پرۆژه‌يان نه د وارێ
بجهئينانێ دانه و گۆت :ئه‌ز نه‌شيايمه د ڤى ده‌مى دا تشتێ من بڤێت بكه‌م، من ب تنێ كارێ چه‌ند كليپه‌كان يێ كرى، لێ من دڤێت بچمه د قۆناغه‌كا دى دا و فلمان دروستبكه‌م.
ناڤبرى زێده‌تر گۆت : من ل به‌ر و دبيت ژى من سێ فلم دروستكربان ل گه‌ل سێ كورته فلمان، ژ ئه‌نجامێ هنده‌ك كاودانان و ب تايبه‌ت يێن ب من ڤه گرێداى وه‌كو دارايى ئه‌ز هه‌تا نها نه‌شيايمه وان فلمان ئه‌نجامبده‌م،و يا پێدڤى بوو من دو ژ وان فلمان ئه‌نجام دابان.
ده‌باره‌ى زنجيره‌يێن نها دهێنه به‌لاڤكرن گۆت : من رێز بۆ هه‌ر كه‌سه‌كى هه‌يه.
هه‌ر كه‌سه‌ك د واره‌كى دا هزرا خۆ دده‌ته به‌ر چاڤ و هه‌موو تشت نه كارێ منن، ژ به‌ر كو ئه‌ز نا رابم سنوران بۆ كه‌سه‌كي دانم كو ب ره‌نگه‌كي چاره‌سه‌ركرنه‌كێ بۆ خۆ دكه‌ت).
د به‌رده‌واميا ئاخفتنا حسێنى گۆت :ب گشتى پێدڤيه خاله‌ك هه‌بيت و هه‌موو تێدا د هه‌ڤپشك بن و هونه‌ر ل سه‌ر كيستێ هونه‌رى ب تنێ نه‌هێته كرن.
هونه‌ر ئافراندنه و بازاره‌كێ گه‌له‌كێ كه‌فتى و بێ بها بووى.
ب راستى مخابن هنده‌ك جاران ل ڤێرێ هونه‌ر كه‌سێن كو هونه‌رمه‌ند ب تايبه‌ت ڤى دره‌گه‌هى ڤه دكه‌ن و مخابن ژى يێ بێ قيمه‌ته.
ل دۆر ئازاديا هزرى ژى حسێنێ ده‌رهێنه‌ر گۆت :مه ئازاديا هزرى نينه و ره‌وشه‌نبيريه‌ت نه ب تنێ ئه‌ڤه‌يه ره‌نگێ ته ب تنێ هاتبيته گوهوڕين.
هه‌كه ئازاديا ده‌ربڕينێ هاته پێش و خه‌لك ب ره‌نگه‌كێ دروست د هه‌موو تشتان گه‌هشت، ئاريشه نامينن نه بۆ كچێ و نه ژى بۆ كوڕى و نه‌ژى بۆ هه‌ر كه‌سه‌كى ژ به‌ر كو هه‌ر كه‌سه‌ك دێ كار د وى وارى دا كه‌ت يێ ئه‌و حه‌ز دكه‌ت و هه‌كه ئه‌و هزره دروست بوو دێ ب ساناهى بيت.
جاران د ناڤ مه دا يێ ب زه‌حمه‌ته ژ به‌ر كو مه بها نه‌دايێ و ب راستى ژى نه بها هه‌يه و نه‌ژى كولتوره‌ك كو سينه‌ما و ئه‌كته‌ر و فلم هه‌بن و ئه‌و كه‌سێن ڤى كارێ هونه‌رى دكه‌ن ئه‌ون يێن كو پێدڤيه ڤان ده‌رگه‌هان ڤه‌كه‌ن.
ده‌رهێنه‌رى ده‌رباره‌ى كێميا فلمان د ده‌زگه‌هێن كوردى دا گۆت : من گه‌له‌ك كار نه‌كريه كو ل سه‌ر ده‌زگه‌هان بهێنه نمايشكرن.
تا نها من ب تنێ دو فلمێن درێژ يێن به‌رهه‌مئيناين، ئانكو چوار كورته فلم.
ئه‌و كورته فلم هنده‌ك ژ وان بۆ جهه‌كێ تايبه‌تن ئێدى ئه‌و خودانن و ئه‌و دشێن به‌لاڤبكه‌ن يان به‌لاڤ نه‌كه‌ن.
حسێن حه‌سه‌ن يێ ژ دۆبلاژێ دوور كه‌فتى و ئه‌گه‌رێ وێ ژى ئه‌وه يێ كه‌فتيه د هنده‌ك قۆناغێن دى يێن كارى دا و گۆت : دبيت دۆبلاژ وه‌كو مودێله‌كێ لێ هات بيت، ئێدى نه‌يا پێدڤيه ئه‌ز بكه‌م.
ده‌رباره‌ى ستايلێ خۆ گۆت : دبيت ره‌نگێ من يێ هاتيه نياسين و ئه‌ز وى ستايلى ناگوهۆڕم ژ به‌ر كو ئه‌ز حسێنم و نابمه كه‌سه‌كێ دى.
ئه‌ز هه‌ر ئه‌ڤه مه و دێ ئه‌ڤه بم.
بۆ من تشته‌كێ خۆشه كو هه‌موو كه‌س ستايلێ من بزانن.
مه‌ره‌ما وێ ئه‌و نينه كو هه‌موو كارێن من وه‌كو ئێكن.
پتريا كارێن هونه‌رى يێن حسێن حه‌سه‌نى نه‌ته‌وه‌يى نه، ل دۆر ڤێ يه‌كێ گۆت : ئه‌ز كوردم، هه‌كه من خۆ ئينا پێش، ئه‌ركێ خه‌لكى يه ل سه‌ر من ئه‌ز وى كارى بكه‌م و من چ تشتێ مه‌زن نه‌كريه، هه‌ر كه‌سه‌كێ خزمه‌تا ملله‌تێ خۆ بكه‌ت تشته‌كێ پيرۆزه.
خولامينيا ملله‌تى تشته‌كێ پيرۆزه و نه شه‌رمه.
هه‌كه كولتور و كورده‌وارى ل نك هنده‌كان شه‌رم بيت، ئه‌و ب شه‌رم و زارن د ژيانێ دا.
هه‌تا نها ئارمانجا من دانه‌نياسنيا كوردايه بۆ خه‌لكه‌كى.
ئه‌ڤرۆ ل ڤێره به‌رزه‌بوونه‌ك يا هه‌ى، ئانكو هه‌كه مرۆڤ ب تنێ بۆ ناڤي كورد بيت نه‌يا پێدڤى يه.
دهۆك، نالين به‌روارى: رۆژنامه‌يا ئه‌ڤرۆ
- بۆچوونێکی نوێ بنووسه
- 2582 خوێندنەوە
