دوو هه‌لبه‌ستێن هه‌لبه‌ستڤانێ ئیرله‌ندى: توماس مۆر *

وه‌رگێران ژ ئینگلیزى: شه‌مال ئاكره‌یى

(1)

گولا دووماهیێ

ئه‌و گولا دووماهیێ یه‌ ژ هاڤینێ

بتنێ مایه‌ گه‌ش،

ته‌ڤ هوگرێن وێ یێن رند

سیسبوونه‌ و وه‌غه‌ركرینه‌

چ گوله‌ك ژ جۆرێ وێ و

چ بشكوژێن گولان بره‌خڤه‌ نه‌ماینه‌

داكو سوراتى یا شه‌رمنى یا وێ ره‌نگ بده‌ته‌ڤه‌

یان باوشكان ئێك ئێكه‌ لگه‌ل ڤه‌بگوهریت؛

هێ گولا بتنێ

ئه‌ز ته‌ ب بستیكێ ڤه‌ ناهێلم داكو بچرمسى،

گولێن رند درازایى نه‌

هه‌ره‌ لگه‌ل وان برازه‌،

ئه‌ز ژى به‌لگێن ته‌ برێك و پێكى

دێ لسه‌ر نڤینێن

هه‌ڤالێن ته‌ یێن بێ بێهن و گولاڤ

تێدا درازایى .. دمرى

به‌لاڤ كه‌م،

لڤان نیزیكان

ده‌ما هه‌ڤالینى و خۆشڤیان به‌ره‌ڤ وه‌ دهێن و..

گه‌وهه‌رێن بهادار

ژ بازنه‌یێ ئه‌ڤینا گه‌شدار درژیێن

دێ لدووڤ ته‌ هێم و گه‌همه‌ ته‌.

ده‌ما دلێن راستگو و دلسۆز زوها دبن،

ئاه، ل وى ده‌مى

كى دێ حه‌ز كه‌ت دڤێ جیهانا تارى دا بژیت.

(2)

ژ من باوه‌ربكه‌

هێ خۆشتڤییا گه‌نج

ژ من باوه‌ربكه‌!

ئه‌گه‌ر ئه‌ڤ شه‌نگیێن ته‌

ئه‌وێن ئه‌ز ئه‌ڤرۆ ب شه‌یدایى لێ دنێڕم

ل سوبه‌هییا خۆ

بهێنه‌ گوهوڕین و دنێڤ ده‌ستێن من دا

مینا خه‌لاتێن ئاشوپى

بله‌ز ببورن و ببهوژن.

ژ من باوه‌ربكه‌

تۆ دێ هه‌ر مینى

خۆشتڤییه‌كا په‌رستى!

بهێله‌ جانییا ته‌ سیس ببیت و

ڕندییا ته‌ ژى ببهوژیت

داكو ل هاویر شوپێن ته‌

سپه‌هییا به‌ژنا ته‌ یا هێژا

دلێ من گرێدایى بته‌ڤه‌ بمینیت و

لدوور شه‌پالییا ته‌ خۆ بئالینیت

روندك نزانن كا تۆ چه‌ندا رندى و

رووێن ته‌ بۆ وان حه‌لال دبن،

روندك نزانن كا روحێ

چه‌ند دلسۆزى و تێنا خه‌ریبوونا ته‌ هه‌یه‌،

لێ.. ده‌م و سال بوورین

تۆ هه‌ر ماى هه‌ژیتر و خۆشتڤیتر

نێ ئه‌و دلكێ ژدل تۆ ڤیاى

بێى ته‌

بێهن و هه‌دارا وى نینه‌

هه‌تا داوییێ دلسۆزێ ته‌ یه‌

هه‌ر مینا زێره‌ڤانێ رۆژێ

ل ئاڤابوون و هه‌لاتنان

دێ ل خوداڤه‌ندا خۆ نێڕیت.

* هه‌لبه‌ستڤانێ ئیرله‌ندى توماس مۆر Thomas Moore:

- ل 28 گولانا سالا 1779 ل ده‌بلن هاته‌ سه‌ر دونیایێ.

- ل 1799ێ ژ كولیژا ئایینى Trinity Collegeیا ده‌بلنێ ده‌رچوویه‌ وپشتى هنگى یاسا ل كولیژا Middle Templeیا له‌نده‌نێ خاندى یه‌.

- توماس مۆر نڤیسین دچه‌ندین بواران دا كریه‌ و هژماره‌كا كومێن هه‌لبه‌ستان به‌رهه‌م ئیناینه‌ و گه‌له‌ك هه‌لبه‌ستێن سترانێ ژى نڤیسینه‌.

- مۆر دهێته‌ هژمارتن ژ گرنگترین هه‌لبه‌ستڤانێن ئیرله‌ندى یێن رومانتیكى و ئێك بوو ژ هه‌ڤالێن هه‌ره‌ نیزیكێن هه‌لبه‌ستڤانان لورد بایرون و پێرسى شیللى.

- چه‌ندین به‌رهه‌م هه‌نه‌ و به‌رچاڤترین به‌رهه‌مێن وى: لالا رۆخ Lalla Rookhكو ل سالا 1817ێ چاپكریه‌ كو ژ چوار چامه‌یێن ئه‌فسانه‌یى تێدا هه‌نه‌ و تێدا داخبارییا وى ب ئه‌فسانه‌ و چیروكێن رۆژهه‌لاتێ خۆیا دبیت.

- دنێڤبه‌را سالێن 1807ێ – 1834ێ به‌رگێن په‌تووكا خۆ یا ناڤدار ( ئاوازێن ئیرله‌ندى) چاپكرینه‌.

- ل 25 سوباتا سالا 1825ێ وه‌غه‌ركریه‌.

ژێده‌ر: http://www.contemplator.com/ireland/believe.html