دیلما سۆفی: هەولێر ماڵی دووەممە و هەرگیز هەستم بە پەنابەری نەکردووە

هونەرمەندی لاوی کورد، دیلما سۆفی، بە جۆش و خرۆشەوە خۆی ئامادە دەکات بۆ بڵاوکردنەوەی ئەلبوومێکی نوێ کە جوانترین میلۆدییەکانی لەخۆدەگرێت لە ساڵی نوێدا. دیلما پەیوەندیی قووڵی خۆی بە هەرێمی کوردستانەوە دەردەبڕێت و ئاماژە بەوە دەکات، شوێنی پەنابەران نییە، بەڵکو ماڵی دووەمی خۆیەتی.

دیلما سۆفی لە چاوپێکەوتنێکی تایبەتدا بۆ وڵات تیڤی، وردەکارییەکانی ژیانی خۆی و پڕۆژە هونەرییەکانی ئێستا و داهاتووی ئاشکرا کرد. ڕاشکاوانە و پڕ لە جۆش خرۆش دەردەکەوت، کاتێک بە هەموو ڕەهەندەکانییەوە باسی چیرۆکە هونەرییەکەی دەکرد.

دیلما سۆفی هەڵوێستی بێلایەنی بەرامبەر هێزی پێشمەرگە نەبوو، بەڵکو خۆشەویستی و ڕێزی گەورەی خۆی بۆ ئەو هێزە دەربڕی. جەختیشی لەوە کردەوە کە پێشمەرگە نوێنەرایەتیی ڕووناکییەک دەکات کە ئاسمانی ژیان و ڕێبازەکانیان ڕووناک دەکاتەوە، تیشکی خستە سەر ڕۆڵی کاریگەرییان لە بەرزکردنەوەی ئاسایش و سەقامگیری لە ناوچەکەدا.

دیلما سۆفی تیشک دەخاتە سەر ئەوەی کە هونەر بۆ ئەو تەنیا ئامرازێک نییە بۆ دەربڕینی هونەرەکەی، بەڵکو ئامرازێکە بۆ بەهێزکردنی ناسنامەی نیشتمانەکەی و هەمیشە هەوڵ دەدات هونەرێک پێشکەش بکات کە دڵی بینەرەکانی بخاتە ژێر کاریگەرییەوە و هەڵگری پەیامی ئەرێنی بێت بۆ کۆمەڵگە.

•    دەقی هەڤپەیڤینەکەی دیلما سۆفی لەگەڵ وڵات تیڤی

•  وەک هونەرمەندێکی گەنج ساڵی 2023 بۆ تۆ چۆن بوو، ئایا هیوا و پلانەکانت بەدیهات؟

-سەرەتا سڵاوی گەرمی خۆم ئاراستەی ستافی وڵات تیڤی دەکەم و هیوای سەرکەوتنتان بۆ دەخوازم، سەبارەت بە پرسیارەکەتان، ساڵی 2023 ساڵێکی پڕ لە ئاڵنگاری و دەستکەوت بوو، هیوادارم لە نوێ ساڵ خەون و هیوای زیاترم بەدی بێت، لە ماوەی ساڵی ڕابردوودا ڤیدیۆ کلیپێکم پێشکەش کرد بەناوی“Bûke” بە دڵنیاییەوە لە ساڵی نوێدا بەرهەمی نوێم دەبێت، بەمزووانە بەرهەمێکی نوێ بە هاوکاری میوزیکژەن سیداد قادری پێشکەش دەکەم.

• کاتێک منداڵ بوویت گۆرانیت بۆ هێزی پێشمەرگە دەگوت، ئەو کاتە هەستت چۆن بوو؟

- بەڵێ، من لە گەنجیدا سەردانی هێزی پێشمەرگەم کرد و سوپاسگوزار بووم بۆ ئەم ئەزموونە، خۆشحاڵ بووم کە سەردانی هێزی پێشمەرگەم کرد، ئەوکاتە لەگەڵ دوو پرۆفیسۆری گەورەکەدا چووم، محمد تەیب تاهر و مەحموود عەلی شاکر. بێگومان ئەم سەردانە دوو خۆشی هەبوو: یەکەمیان لەگەڵ هونەرمەندە گەورەکان بوو، دووەمیان ئەوە بوو کە لەنزیکەوە هێزی پێشمەرگەم بینی، بێگومان هێزی پێشمەرگە چرایەکن کە ژیانمان ڕۆشن دەکەنەوە، شانازی پێوە دەکەم پشتگیریان بکەم و لە ڕێگەی هونەرەکەمەوە گەورەییان بزانم. دەرفەتی گۆرانی گوتن بۆیان ساتێکی نایاب دەبێت.

•  بۆچی دیلما سۆفی گۆرانی گوتنی بە زمانی دایکی هەڵبژارد؟

-چەندین هونەرمەندی کورد هەن کە بە زمانی عەرەبی یان تورکی گۆرانی دەڵێن، منیش یەکێک نیم لەوانە، باوەڕم وایە دەبێت زمانەکەمان زیندوو بکرێتەوە و پارێزراو بێت، هەروەها هونەرمەند دەبێت بە دۆزی خۆیەوە ببەسترێتەوە و دەنگی خەڵک بێت.

• ئەمە مانای ئەوەیە تۆ وەک هونەرمەندێک پابەندیت بە گوتنی گۆرانی نەتەوەیی و نیشتمانپەروەرانە؟

- بەڵێ من وەک ئەرکێک دەیبینم، هونەرمەندێک گۆرانی بۆ شارەکەی یان نیشتمانەکەی بڵێت، بەشێوەیەکی دیکە پەیامێک لەبارەی کار و خەبات دەنێرێت، من گۆرانیم لەسەر کوردستان و کۆبانێ گوتووە، لەنێو پێشمەرگەشدا گۆرانیم گوتووە، بۆیە هونەرمەند دەبێت شانازی بە کولتوور و هونەر و فۆلکلۆرەکەیەوە بکات.

• ئەو کەسانە کێن کە پشتگیریت دەکەن؟

- ئەوانەی پشتیوانم دەکەن خێزانەکەمن، هاوڕێکانم، هەوادارەکانم، هەروەها ئەو کەسانەن باوەڕیان پێم هەیە و هیوای داهاتوویەکی باشم بۆ دەخوازن، هەرکەسێک پشتگیری کردبم بە لایکێک یان کۆمێنتێک، سوپاسگوزاریانم.

•  چەند بەرهەمی هونەری و کلیپ و گۆرانیت بەرهەمهێناوە؟

- 5 گۆرانیم هەیە کە بە شێوەی کلیپ بڵاوبوونەتەوە، یەکێکیان لەلایەن هونەرمەندی گەورە جوان حاجۆ، و ناوی “بەسە بناڵە”، گۆرانییەکم لەگەڵ باوک و دایکم بەرهەمهێنا بە ناوی “کۆبانێی من” و ئێستا سەرقاڵی ئامادەکردنی ئەلبوومێکی نوێم.

• ئەو هونەرمەندە کێیە زۆرترین کاریگەری لەسەر تۆ هەبووە؟

- من پەیوەستم بە فەرهەنگ و فۆلکلۆری کوردیی و هونەرمەندە کۆنەکانمانەوە، ڕێز لە هەموویان دەگرم.

• ژیانی پەنابەران کاریگەری لەسەر تۆ هەبووە؟

- 12 ساڵە لە هەرێمی کوردستان دەژین، هەرگیز خۆمان بە پەنابەر نەزانیوە، ئەو قۆناغەمان تێپەڕاندووە و هەست بە پەنابەر ناکەین.

•  لەم دواییانەدا سەردانی کۆبانێتان کردووە، هەستتان چۆن بووە و دۆخی ئەوێ چۆنە؟

- لە شەوی سەری ساڵی 2022، سەردانی کۆبانێم کرد، لەوێ گەلەکەمم بینی، کاریگەریی شەڕمان لەسەر گەلەکەم بینی، هیوادارین ئەم شەڕە بەردەوامەی سووریا کۆتایی بێت و هەمووان بگەڕێنەوە زێدی خۆیان.

• پێشبینی دەکەیت ساڵی نوێ ساڵی بەدیهێنانی خەون و ئاواتەکانت بێت؟

- هەمیشە مرۆڤەکان لەسەر هیوا دەژین، بۆیە ئێمە بەگەشبینییەوە دەمێنینەوە. بەهیوای ساڵێکی پڕ لە ئارامی و سەقامگیری بۆ هەموو لایەک، جارێکی دیکە سوپاس بۆ ستافی تەلەفزیۆنی وڵات.

وڵات تیڤی - هەولێر