رۆژنامەڤان و ھەلبەستڤانێ ناڤدار خەلەفێ زێباری کۆچا داوی کر

رۆژنامەڤانێ ناڤدار خەلەف زێباری کو یەک ژ دامێزرەنەرێ پشکا کوردییا دەنگێ ئامەریکا بوو ل واشنگتۆنێ کۆچا داوی کر.

زێباری کو ٢٠ سالان د رادیۆیێ دە کار کر، د مەھا گولانا ٢٠١٢ان دە ژبەر نەخوەشییا پشکێ و کێماھییا نەفەسێ نەچار مە کارێ خوە بەردە. دەنگێ وییێ تایبەت گەلەک باندۆر ل سەر گوھداران دھێشت و ئەو دکشاندن بەر خوە.

زێباری بەری دەنگێ ئامەریکا ژی ل کوردستانا ئیراقێ بێژەری کربوو و تێکۆشینا کوردانیا دژی ساددام دە رۆلەکە گرینگ لیستیبوو.

 سترانا نەسرین کو ب دەنگێ مھەمەد شێخۆ ل سەرانسەر کوردان ھاتیە ناسین، یەک ژ ھەلبەستێن زێبارییە.

دیسا، سترانا پێشمەرگەیا مھەمەد تاھرێ ئاکرەیی و سترانا بۆ کێ بکم گازی و ھاوار کو ماھاباد ل سەر مالوێرانییا ھەلەبجێیە، بەرھەمێن وی نە.

گەلەک ھەلبەستێن وییێن چاپکری و نەچاپکری ھەنە کو ب پرانی ل سەر وەلاتپارێزی و ئەڤینا ئازادی و کوردستانێ نە.

زێباری د ١٢عێ ئادارا ١٩٤٨ێ دە، ل دەڤەرا زێبارییا ل کوردستانا ئیراقێ ھاتە دنێ. وی د سالا ١٩٧٠عان دە زانینگەھا مووسلێ قەداند. پشتی سێ سالان تەڤ ل دۆزا ئازادییا گەێ خوە بوو و د شەرتێن دژوار دە بێژەری کر.

وی د ١٩٧٥ن دە، پشتی تێکچوونا تەڤگەرا کوردی، وەک ھەزاران کوردان نەچار دمینە وەلێت بتەرکینە و پێشی دھەرە ئیرانێ و دوو رە ژی تێ ئامەریکا. ل ئامەریکا ژی د ناڤ خەباتێن سەر زمان و وێژەیا کوردی سالێن درێژ دخەبتە، کۆڤاران دەردخە و زمانێ کوردی فێری زارۆک و مەزنان دکە.

زێباری، د خیزمەتێن خوەیێن دەما بەشا کوردییا رادیۆیا دەنگێ ئامەریکا دە، گەلەک کلاسیکێن کوردییێن ئەھمەدێ خانی، مەلایێ جزیری و فەقییێ تەیران ژ خوەندەڤانان رە خوەند.

وی سالێن درێژ بەرنامەیەکە ھەفتەیییا ب ناڤێ فەرھەنگ و کۆرەیا کوردی ئامادە کر و بەرھەمێن ھونەرمەند و کەدکارێن زمانێ کوردی دگھاند ھەمی جیھانێ.

دەنگێ ئامریکا