ستار عه‌لی.. نیگارکێشێ ب رەنگێ کەڤری* …دیدار: محسن عەبدلڕەحمان

هۆنه‌رمه‌ند نوینه‌راتییا ژێوارێ‌ جڤاكی دكه‌ن، هۆنه‌رمه‌ندێن‌ كورد ژی شیانێن هۆنه‌رمه‌ندێن جیهانی هه‌نه‌، لێ‌ هۆنه‌رمه‌ندێن كورد نه‌شیاینه‌ پره‌كێ‌ د ناڤبه‌را تاكی و هۆنه‌ریدا ئاڤابكه‌ن، ئانكو هۆنه‌ر مایه‌ بێ‌ ناڤه‌ند و هۆنەرمه‌ند بێ پشتەڤان،

هۆنه‌رمه‌ند ب پراكتیكی ل سه‌ر هۆنه‌ری كاردكه‌ن، لێ‌ ئه‌و كار دچوارچۆڤه‌كێ‌ به‌رته‌نگدا د سنۆرداركرینه‌ و هۆنه‌ر ڤیابیت ل پێش جڤاكی یێ‌ ڤه‌كری بیت! كرنگترین ئاسته‌نگێن پێش هۆنه‌رمه‌ندێ‌ كورد، دژایه‌تیكرنا وییه‌ ژ لایێ‌ ده‌ستهه‌لاتا دینی و دونیایی ڤه‌، چنكو هۆنه‌ر هشیاركه‌ر و جوانی به‌خشه‌ و ده‌ستهه‌لاتا سیاسی دژی هشیاریێ‌ یه‌ و ده‌ستهه‌لاتا دینی دژی جوانیێ‌ یه‌! لەورا ستار ل سڕتا چیا سواربوو، دا چریسکا ژیانێ د دەمارێن بیردانکا کوردینیێدا هەلبکەت، ژیاننامەیا ستاری ئەفسانەیا لێگەڕیانێیە ل نهێنییا رەنگی و پیرۆزییا دەربڕینێ، د سەردەمێ هەلپەرست و خۆپەرێس و سالیسکاندایە.

کەڤال پەناگەهـ و رەنگ و دەنگێ دەربڕینێ، هەمبەر گۆمبەدێن ستەمکاریێ بانگێ بێدادیێ هەلدێرا. سەردەمێ تراژیدیێن کوردینیێ خۆرستییا چیا و رەنگێ ئەنفالێ و گیانێ بەرخۆدانێ ل سەر کانفاسێ دکێشا و پەیاما خۆ دگەهاند، ئەوژی کوردستانێ ژ دلی بۆ هزرێ و ژ دەڤی بۆ چاڤی ڤەگۆهێزین!

هەر ژ بجویکاتی و بێی ئاراستەک دەستنیشانکری و رێنیشاندەرەک، ل رێکەکێ بۆ دەربڕینێ گەڕیا، ئاشۆپا خۆ ب بایی ئێخست، ب بورینا دەمی و بێی بزانیت، سنۆرێ ئەلندێ بەر ب کۆمتێن بلند، ئاسۆیین بێی داوی مینا بازەکێ زاگرۆسی بەزاندن، دا د جیهانا رەنگاندا ب نیگارکرنا وێرانییا کوردستانێ و ئازارێن کوردان داهێنانێ بکەت! ب زمانێ چاڤان، رەنگان بدەت پەیڤاندن.

ب هەر پنییەکێ ل سەر کانفاسی کێشەیەکێ کورتدکەت، دیمەن ب ژیانێ ژ جوانناسیێ داگرتن و ئەگەر تراژیدی بن، ل پشت کەڤران داکوکی و موکۆڕی ل سەر مان و هەبوون و بەردەوامیێ د ئالنکاری و هەڤڕکییا هەبوونێدا کر، ل پێش کەڤران هێز و ل ژێر بەفرێ پەلێن کەش. د کەڤالیدا ب وێنەیێ کەڤران کوردبوون ب جوانترین رەنگ و شێوەیێ پیشانددەی، هەچکو کەڤرێن هشک ڤەدژینی، تاکو ددەی پەیڤاندن.

وەکو عیسایێ ناڤێ شاگردێ خۆ (سەمعان – لەڤەن)، بۆ (پاتروس)ی گۆهارتی، پاتروس ب زمانێ گریکی (کەڤر)! کەڤر ئانکو رەقاتی،هێز، خۆراگری هەمبەر پێلان. تۆ هەمبەر پێلێن ماسک و دەستکەفتان کەڤربووی، لەورا هەڤالێ دێرێن (حکمەت ئەلحاج) ب شاسوارێ رەنگان ناساندی.

ل مه‌یدانا هۆنه‌رێ‌ شێوه‌كاری ستار عه‌لی ئێك ژ ناڤێن هه‌ره‌ دیاره‌، دلداری و ڤیانا هۆنه‌ری ده‌رازینكا سه‌ركه‌فتنا وی بوو، به‌هره‌یا وی ب ره‌نگان هاتییه‌ نیگاركرن، لێ‌ مخابن د جڤاك و كاودانه‌ك نه‌خۆش و ژ قه‌یرانێن جڤاكی و سیاسی ئاڤزدا، كو هۆنه‌ر و هه‌ر داهێنانه‌ك یا مانده‌لكری یان بكێمی ناپه‌سه‌ند هێلایه‌! چاوا ژیانا خۆ هه‌می ب ڤێهه‌لچوونا ئه‌ڤرازییان بوراند، هه‌ڤته‌ریب دگه‌ل ڤێ‌ ڤێهه‌لچوونێ‌ ناڤێ‌ خۆ ب رەنگەکی ل سەر کانڤاسی و ب نه‌ینوكان د كه‌ڤرێ‌ كوردبوونێ‌ دا نكراندییه‌، بۆ پتر ئاشنابوونێ‌ ب ئاسته‌نگیێن پێش هۆنه‌ری و هۆنه‌رمه‌ندان ب گشتی، مه‌ ئه‌ڤ پڕسه‌ ئاراسته‌ی هۆنه‌رمه‌ندی ب خۆ كرن.

پ1: ئێكه‌م نێگارێ‌ ته‌كێشای، چ ئاسته‌نگه‌ كه‌تنه‌ پیشییا ته‌؟

ب: هه‌ر ل ده‌ستپێكا چوونا من بۆ خواندنگه‌هێ‌ ل باژێرێ‌ مویسل، وه‌كو به‌هره‌یه‌ك من وێنه‌ دكێشان، ئێكه‌م وێنه‌ وه‌كو خویندكار ژ لایێ‌ ماموستای ڤه‌ پێ‌ هاتمه‌ راسپاردن، وێنه‌كرنا داره‌كێ‌ كو ل ناڤ باخچه‌یێ‌ خواندنگه‌هێ‌ بوو، مخابن ده‌مێ‌ من وێنه‌كێشای و نیشادای، ئه‌وی وێنه‌ هاڤێت و گۆت ته‌ ئه‌ڤ وێنه‌ چێنه‌كریه‌، ئانكو باوه‌رنه‌كر كو من یێ‌ چێكری، لێ‌ خویندكاران به‌ره‌ڤانی ژ من كر و گۆتنه‌ سه‌یدای وی ئه‌ڤ‌ وێنه‌ كێشایه‌، ئینا سه‌یدای گۆته‌ من پا خواندنگه‌هێ‌ وێنه‌بكه‌، ئه‌ز كه‌تمه‌ به‌ر و من پشكه‌ك ژ خواندنگه‌هێ‌ نیگاركر و وانه‌ بدووماهی هات بوو. ئه‌ڤ وێنه‌ ئێكه‌مین وێنه‌بوو من نیگاركری و بیرهاتنه‌ك تال و گه‌له‌ك نه‌خۆشه‌. ژ هه‌می لایانڤه‌ كوسپه‌ و ئاسته‌نگ هه‌بوون. خێزانێ‌ و ته‌بایا جڤاكی و تاكو ژماره‌كا مه‌زنا ماموستایان ب ئاڤڕییا حه‌رامكرنێ‌ ل نیگاركرنێ‌ و وێنه‌ی دنێرین و وێنه‌كرن ب چاڤێ‌ گۆننه‌هێ‌ ددیتن.

خێزانێ‌ و ته‌بایا جڤاكی و تاكو ژماره‌كا مه‌زنا ماموستایان ب ئاڤڕییا حه‌رامكرنێ‌ ل نیگاركرنێ‌ و وێنه‌ی دنێرین و وێنه‌كرن ب چاڤێ‌ گۆننه‌هێ‌ ددیتن.

پ2/ ب كێش تابلۆیێ‌ پتر داخباربووی و كارتێكرن ل ته‌ كر؟

ب/ د هه‌ر قۆناخه‌كا خۆ یا هۆنه‌ری دا، ب هنده‌ك كه‌ڤالان داخباربوویمه‌، بۆ نموونه‌: كه‌ڤالێ‌ (ئازادی سه‌ركێشییا گه‌لان دكه‌ت) یا هۆنه‌رمه‌ندێ‌ فره‌نسی دیلاكروا و كه‌ڤالێن هۆنه‌رمه‌ندێن روس، كه‌ڤالێن ماینه‌ لبیرا من بتایبه‌تی كه‌ڤالێ‌ (فراڤینه‌ك ل سه‌ر گیای)، كه‌ڤالێن هۆنه‌رمه‌ند سلڤادور دالی، كه‌ڤالێن هۆنه‌رمه‌ندێن ئیراقی فائق حه‌سه‌ن و نه‌جیب یونس.

پ3/ تشته‌ك هه‌بوویه‌ ته‌ ڤیایه‌ نیگاربكه‌ی، یان كاره‌ك هۆنه‌ری ته‌ ڤیایه‌ ئه‌نجامبده‌ی و نه‌شیای؟

تشتێ‌ من ڤیای من یێ‌ نیگاركری چ هاتبیته‌ نیشاندان یان نه، من گۆهـ نه‌دایه‌ چ سانسۆران، چ سیاسی یان جڤاكی بن.

ب/ تشتێ‌ من ڤیای من یێ‌ نیگاركری چ هاتبیته‌ نیشاندان یان نه، من گۆهـ نه‌دایه‌ چ سانسۆران چ سیاسی یان جڤاكی بن، بۆ نموونه‌: د پێشانگه‌هه‌كا خۆ دا ل مویسل من وێنه‌یێ‌ شێخ مه‌حمودێ‌ نه‌مر و یێ‌ شۆره‌شگێرێ‌ جیهانی گیڤارای و یێ‌ چه‌ند پێشمه‌رگه‌هه‌كان و گۆندێن وێرانكریێن كوردستانێ‌ پشتی نسكۆیا 1975ێ‌ نیگاركربوون. دیسان ل سالا 1990ێ‌ من پێشانگه‌هه‌كا تایبه‌ت لدور ئه‌نفالان ل ژێر ناڤێ‌ (ئه‌فسانه‌یێن چیا) ڤه‌كر.

پ4/ نیكار ل ده‌ڤ ته‌ كاره‌ یان ئاره‌زوویه‌؟ و نیگاركرنا تابلۆیه‌كی چه‌ند ده‌مێ‌ ژ ته‌ دبه‌ت؟

ب/ نیگار ل ده‌ڤ من كاره‌ و حه‌زه‌ و ئاره‌زوویه‌ و هه‌ر تشته‌ و پێدڤییه‌كا منه‌، ئه‌ز كه‌ساتییا خۆ پێ‌ دنیاسم و ئاڤادكه‌م و ده‌ربڕینێ‌ ژێ‌ دكه‌م. هه‌ر كه‌ڤاله‌كی ده‌مێ‌ خۆ هه‌یه‌، لدویڤ بابه‌ت و قه‌بارێ‌ كه‌ڤالی و بارێ‌ ده‌روونی و ئاماده‌ییا مرۆڤی و سه‌قایێ‌ گشتی‌.

پ5/ نیگارێن ته‌ پتر وه‌كو كه‌ڤر دیاردبن، ژیانا باژێران و خواندنا زانكۆیێ،‌ كارتێكرنا گۆندێ‌ ل سه‌ر ته‌ كێمنه‌كر؟

ب/ من زارۆكینییا خۆ ب هه‌می نه‌خۆشیانڤه‌ تا شه‌ش سالیێ‌ ل گۆندی بره‌سه‌ر و ئه‌ڤێ‌ كارتێكرنه‌كا مه‌زن ل من كر، مه‌ژی و وژدانا من ڤه‌گرت كو د كه‌ڤالێن من دا ره‌نگڤه‌دانا وێ‌ دیاربوو، لێ‌ ژیانا باژێری ده‌رفه‌تێن مه‌زن بۆ من په‌یداكرن و ده‌رگه‌هێن نوی بۆ من ڤه‌كرن، كو ئالاڤ و ئامراز ئێخستنه‌ به‌رده‌ستێ‌ من ژ خواندن و دیتنا پێشانگه‌هان و بده‌ستئێخستنا ژێده‌رێن هۆنه‌ری ئه‌وێن بووینه‌ ئه‌گه‌رێ‌ شاره‌زابوونێ‌ د خواندنگه‌هێن هۆنه‌ری دا بتایبه‌ت هۆنه‌رێ‌ ئه‌ورۆپی، لێ‌ كه‌ره‌ستێن سه‌ره‌تایی و سه‌ره‌كی وه‌كو سرۆشتێ‌ كوردستانێ‌، بیرهاتنێن زارۆكینیێ‌ و روودانێن ب سه‌ر ملله‌تی دا هاتین، مان وه‌ك كه‌ره‌سته‌ و ئه‌له‌منتێن سه‌ره‌كی د كارێن من دا.‌ راسته‌ ئه‌و كه‌س و فیگه‌رێن ئه‌ز دروستدكه‌م، وه‌كو كه‌ڤران وێنه‌دكه‌م، دیسان ئه‌و كه‌ڤرێن وێنه‌دكه‌م شێوه‌یێ‌ مرۆڤان دده‌مێ‌، ئانكو لده‌ڤ من هاوكێشه‌ مرۆڤێ‌ = كه‌ڤر، لێ‌ كه‌ڤره‌ ب خۆراگرییا خۆ و گرێدانا وی ب ئاخ و وه‌لاتی ڤه‌، كو پڕانییا وه‌لاتێ‌ مه‌ چیا و كه‌ڤرن.

پ6/ دبێژن نیگاركرن وێنه‌كرنا ژیواری یه‌؟

ب/ هه‌می بیاڤێن ژیانێ‌ پێكڤه‌ د گرێداینه‌ و هه‌ڤبه‌ندی بهه‌ڤرا هه‌یه‌ و كارتێكرنێ‌ ل سه‌ر هه‌ڤدوو دكه‌ن، ئابوور، جڤاك، سیاسه‌ت، كلتور، ژیوار… ژیوار ئێكه‌ ژ وان بیاڤێن گرنگ كو كاریگه‌رییه‌كا مه‌زن و راسته‌وخۆ و به‌رچاڤ ل سه‌ر هه‌می بوارێن ژیانێ‌ هه‌ی، ره‌وش و بارێ‌ ئابووری، پێكهاتێ جڤاكی و بوارێ‌ ره‌وشه‌نبیری و هۆنه‌ری و تا ستایلێ‌ هۆنه‌رمه‌ندی و ئه‌له‌مینت و كه‌رستێن وی… ب كورتی هۆنه‌ر بزاڤ و چالاكییه‌كا مرۆڤی یه‌ ژ ئه‌نجامێ‌ كارلێكا (تفاعل) مرۆڤی دگه‌ل ژیوارێ‌ مرۆڤ تێدا دژیت و كه‌ره‌ستێن وی، ئانكو ژیواری كارتێكرنه‌كا مه‌زن ب هه‌می شێوازێن خۆڤه‌ هه‌یه‌، ژیوار پێكهاتییه‌ ژ : 1- سرۆشت 2- ژیوارێ‌ جڤاكی 3- ژیوارێ‌ ره‌ۆشه‌نبیری و شارستانی و كلتوری 4- ژیوارێ‌ گشتی.

هۆنه‌رمه‌ندێن روس ب حوكمێ‌ سرۆشتێ‌ وان یێ‌ به‌فرین گه‌له‌ك وێنه‌یێن به‌فرێ‌ و زڤستانێ‌ دكێشن و هۆنه‌رمه‌ندێن ئه‌ره‌ب گه‌له‌ك وێنه‌یێن بیابان و هه‌سپان دكێشن، هۆنه‌رمه‌ندێن كورد گه‌له‌ك چیا و ره‌نگان بكاردئینن، چنكو سرۆشته‌كێ‌ جوان و ره‌نگین هه‌یه‌ و كاردانه‌ڤێ‌ ئێكێ‌ د جلكێن وان دا دیاره‌، هۆنه‌رمه‌ندێن رۆژهه‌لاتی رۆناهییه‌كا بهێز ل ده‌ڤه‌را وان هه‌یه‌، له‌و ره‌نگێن گه‌رم بكاردئینن و ب گشتی كه‌ڤالێن وان پڕ رۆناهینه‌.

پ7/ نیگاركیشه‌ك د بێژیت: ئه‌ز نیگاردكه‌م.. ئه‌ز یێ‌ هه‌یم! تو چ دبێژی؟

ب/ به‌لێ‌ راسته‌، چاوا په‌یڤا ئه‌ز هزردكه‌م ئه‌ز یێ‌ هه‌یم بۆ بیرمه‌نده‌كی دروسته‌، ئه‌و په‌یڤ بۆ هۆنه‌رمه‌نده‌كی ژی دروسته‌، ئه‌ز نیگاردكه‌م، ئه‌ز یێ هه‌یم. هۆنه‌رمه‌ند برێكا كارێ‌ خۆ یێ‌ هۆنه‌ری كه‌ساتییا خۆ پێ‌ ئاڤادكه‌ت و ده‌ربڕینێ‌ ژێ‌ دكه‌ت، ئانكو هه‌بوونا خۆ دیاردكه‌ت و نیشادده‌ت.

پ8/ نیگاركرن به‌هره‌یه‌، پیشه‌یه‌ یان هایدانه‌، كه‌نگی پتر هه‌ستپێدكه‌ی كو پێدڤییه‌ نیكاربكه‌ی؟

ئه‌ز نیگاردكه‌م، ئه‌ز یێ هه‌یم. هۆنه‌رمه‌ند برێكا كارێ‌ خۆ یێ‌ هۆنه‌ری كه‌ساتییا خۆ‌ ئاڤادكه‌ت و ده‌ربڕینێ‌ ژێ‌ دكه‌ت، ئانكو هه‌بوونا خۆ دیاردكه‌ت و نیشادده‌ت.

ب/ مه‌سه‌لا ئه‌گه‌رێن پێدڤیبوون ب نیگاركێشانێ‌ مه‌سه‌له‌كا گه‌له‌ك رۆهن و بساناهی نینه‌، دبیت هزره‌ك یان بیرهاتنه‌ك یان خواندنا دێره‌كێ‌ د په‌رتووكه‌كێ‌ دا یان جهێ‌ بچویكاتی یان رابوراندنه‌ك ببیته‌ ئه‌گه‌ر، دیسان به‌رده‌وامییا هۆنه‌رمه‌ندی ل سه‌ر كارێ‌ هۆنه‌ری دبیته‌ ئه‌گه‌ر كو هزر بۆ په‌یداببن، وه‌ك زنجیره‌ هزر بۆ په‌یداببن، ئانكو كه‌ڤال ژ كه‌ڤالی بزێت.

پ9/ نیگارێن ته‌ پتر چ بابه‌ت ب خۆڤه‌دگرن، ئانكو سه‌باره‌ت چنه‌؟

ب/ هۆنه‌رمه‌ند كه‌سه‌كێ‌ نازكتر و هه‌ستیارتره‌ ژ خه‌لكێ‌ ساده‌ و ئاسایی، له‌و هه‌می روودان كارتێكرنێ‌ لێدكه‌ن، روودانێن تراژیدیێن ب سه‌رێ‌ ملله‌تێ‌ مه‌ هاتین، بابه‌تێ‌ سه‌ره‌كیێ‌ كه‌ڤالێن منه‌، لێ‌ بشێوازێ‌ تایبه‌تێ‌ من، نه‌ك ب شێوازێ‌ ریالستی فوتۆگرافی.

پ10/ پشته‌ڤانێ‌ ته‌ یێ‌ ئێكێ‌ كی بوو؟

ب/ پشته‌ڤانێ‌ من یێ‌ ئێكێ‌ ماموستایه‌كێ‌ هۆنه‌ری ل خواندنگه‌ها سه‌ره‌تایی بوو، گه‌له‌ك پشته‌ڤانێ‌ من و هنده‌ك خویندكارێن دی بوو، ئه‌وی ژبلی هاندانێ‌ كه‌رسته‌ ژی بۆ مه‌ دئینان، هه‌روه‌سا ماموستایه‌كێ‌ دی یێ‌ هۆنه‌ری ل قوناخا ئاماده‌یی پشته‌ڤانییا من دكر و هانددام كو به‌رده‌وام بم و ژ وی فێری گه‌له‌ك تشتان بووم.

پ11/ ئێكه‌م پشكدارییا ته‌، یان ئێكه‌م پێنگاڤا ته‌ ل جیهانا هۆنه‌ری؟

ب/ هه‌ر ل قۆناخا سه‌رتایی یا خواندنێ‌ من پشكداری د پێشانگه‌هێن سالانه‌یێن خواندنگه‌هێن سه‌ره‌تایی دا دكر و ئێكه‌م پشكدارییا من ده‌مێ‌ ئه‌ز خویندكارێ‌ سالا پێنچێ‌ سه‌ره‌تایی بووم و من خه‌لاته‌ك ژی وه‌رگرت.

پ12/ ئه‌گه‌ر ژیێ‌ ته‌ یێ‌ هۆنه‌ری لێكبده‌ین، ته‌ ڤیایه‌ چ په‌یام بگه‌هینی؟

ب/ هۆنه‌ر ب هه‌می ره‌نگێن خۆڤه‌ خۆدان په‌یامه‌، ئه‌وژی به‌لاڤكرن و نیشاندانا جوانیێ‌ و بهایێن مرۆڤینی و ئازار و هیڤیێن مرۆڤی و ده‌ربڕین ژ كه‌ساتی و خه‌ونێن هۆنه‌رمه‌ندی ب خۆیه‌، په‌یاما من یا به‌رده‌وام د هه‌می قۆناخێن من یێن هۆنه‌ری دا، نیشاندانا جوانییا سرۆشتێ‌ كوردستانێ‌ و ئێش و ئازارێن ملله‌تێ‌ مه‌ و راوه‌ستیان هه‌مبه‌ر زۆرداری و داگیركاریێ‌ بوویه‌، لێ‌ ل هه‌ر قۆناخه‌كێ‌ ب شێواز و ستایله‌كێ جودا.

ل چوارشه‌مبا پیرۆزا جه‌ژنا چله‌یێ‌ زڤستانا 2021ێ‌ ئه‌ڤ دیداره‌ هاتییه‌كرن.

ستار عه‌لي**

ل سالا 1957 ێ ل گوندێ زێوێ (زێوا شێخ پیرمیس) ل بنیا چیایێ مەتینا ل قەزا ئامێدیێ ژ دایك بوویە.

هەرسێ قۆناغێن سەرەتایی، ناڤنجی و ئامادەیی ل مووسل تمام كرینە و پشكداری د چالاكییێن هونەری یێن وان قۆناغێن خواندنێ دا كریە.

(1979-1980)ێ پشكا جیۆلۆجی یا كولیژا زانستی ـــ زانكۆیا مووسل تمام كریە و هەر ل وێ زانكۆیێ دوو پیشانگەهێن هەڤپشك دگەل هونەرمەند گارا رەسول ڤەكرینە، (هونەرمەند گارا رەسول ل رۆژا 13 ی گولانا ئەڤ سالە ل ئەلمانیا وەغەرا دووماهییێ كریە).

ل سالا 1983 ێ ئێكەم پیشانگەها خۆیا تایبەت ل باژێڕێ دهۆك ڤەكریە.

ل سالا 1986 ێ ل باژێڕێ هەولێر پشكداری د پیشانگەها هونەرمەندێن دهۆك دا كریە.

ل سالا 1990 ێ ل هۆلا خواندنگەها گولستان ل باژێڕێ دهۆك پیشانگەها خۆیا دووێ ب ناڤونیشانێن (ئەفسانەیێن چیا) ڤەكریە.

هەر وێ سالێ ل گەلەرییا (ئەربیللا) ل باژێڕێ هەولێر پشكداری د پیشانگەها هەڤپشكا هونەرمەندێن كورد دا كریە.

ل سالا (؟) ل ئەلمانیا پشكداری د پیشانگەها هونەرمەندێن كورد دا كریە.

ئێكەمین رێڤەبەرێ تێلەڤزیۆنا گەلێ كوردستان ــــ دهۆك بوو كو ل سالا 1991 ێ وەك ئێكەمین تێلەڤزیۆنا كوردی ژ لایێ (ی.ن.ك) ڤە پشتی سەرهلدانێ ل هەرێما كوردستانێ هاتییە ڤەكرن.

ل سالێن نۆتان سەرنڤیسەرێ كۆڤارا (سەرهلدان) و بەری وێ ژی یێ رۆژنامەیا (سەرهلدان) بوو كو ل دهۆك دەردكەفتن.

ئەندامێ سەندیكا هونەرمەندێن كوردستانێ ـــ تایێ دهۆك و ئەندامێ ئێكەتییا نڤیسەرێن كورد ـــ تایێ دهۆك بوو.

ل سالا 1998 ێ پیشانگەها خۆیا تایبەت یا سێیێ ل هۆلا ئێكەتییا نڤیسەرێن كورد ـــ دهۆك ڤەكریە كو ئەو ژی پۆرترێتێن هژمارەكا نڤیسەران و مۆتیف بوون.

ل سالا 2008 ێ پیشانگەها خۆیا تایبەت یا چارێ ل باژێڕێ دهۆك ڤەكریە كو ئەو ژی پۆرترێتێن نڤیسەرێن كورد بوون.

ل سالا 2009 ێ ل هۆلا شەهید سەلمان ل باژێڕێ دهۆك پیشانگەها خۆیا تایبەت یا پێنجێ ڤەكریە كو 20 كەڤالێن زەیتی بوون.

هەر ژ سالا 2005 ێ هەتا 2010 ێ ب هەڤپشكی دیزاینەرێ رۆژنامەیا (بەهدینان) بوویە كو ل دهۆك دەردكەفت و چەند سالەكان ژی دیزاینەرێ كۆڤارا (مەتین) بوو.

ل سالا 2010 ێ ل پانۆراما ئازادی ل دهۆك پشكداری د پیشانگەها هەڤپشكا هونەرمەندێن دهۆك دا كریە.

چەند سالەكان ل رێڤەبەرییا شێوەكاری ل دهۆك كار كریە و پشكداری د هژمارەكا خولێن گەلەرییا دهۆك و گەلەرییا زاموا یا سلێمانیێ دا كریە.

چەندین گۆتار و ڤەكۆلین ب هەردوو زمانێن كوردی و عەرەبی د كۆڤار و رۆژنامەیان دا بەلاڤ كرینە و سمینار ل سەر هونەرێ شێوەكاری هەبووینە.

ل سالا 2005 ێ پەرتووكەك ب ناڤێ (چەند خواندنەك شێوەكاری) بەلاڤ كریە.

هەر ژ سالا 1997 ێ و هەتا وەغەرا خۆ یا دووماهییێ دیزاینەر و رێڤەبەرێ هونەرییێ كۆڤارا (پەیڤ) یا ئێكەتییا نڤیسەرێن كورد ـــ تایێ دهۆك بوویە، هەڤدەم ل سەر كارێن خۆ یێن هونەری و نڤیسینێ ژی بەردەوام بوویە.

ل سالا 2012 ێ پیشانگەها خۆیا شەشێ یا تایبەت ل هۆلا گەلەرییا دهۆك ڤەكریە، كو ئەو ژی 20 كەڤالێن شێوەكاری بوون، هەروەسا ل هەیڤا تیرمەها وێ سالێ هەر ئەو پیشانگەه ل هۆلا (تەوار) ل باژێڕێ سلێمانیێ ژی ڤەكریە.

ل هەیڤا شواتا سالا 2015 ێ پشكداری د سیمپۆزیۆما ئامەدێ یا باكوورێ كوردستانێ دا كریە كو هونەرمەندێن هەر چوار پارچێن كوردستانێ پشكداری تێدا كربوون.

ل هەیڤا گولانا سالا 2016 ێ پیشانگەها خۆیا (7)ێ ل هۆلا شێوەكاری ل گەلەرییا دهۆك ڤەكریە.

ل هەیڤا نیسانا سالا 2019 ێ هەر ئەو پیشانگەه ل هۆلا گەلەرییا (ئەمنە سوورەكە) ل سلێمانیێ ڤەكریە.

ل هەیڤا تەباخا سالا 2019 ێ پشكداری د سیمپۆزیۆما سەرگەلۆ دا كریە ل سلێمانیێ كو هژمارەكا شێوەكارێن كوردستانێ و عیراقێ پشكداری تێدا كربوون.

ل هەیڤا ئیلۆنا سالا 2021 ێ ل سلێمانیێ دگەل هژمارەكا هونەرمەندێن دی پشكداری د سیمپۆزیۆما سێیێ یا گەلەرییا زاموا دا ل هۆلا گەلەرییا (ئەمنە سوورەكە) دا كریە.

ل سالا 2022 ێ ل سلێمانیێ پشكداری د سیمپۆزیۆما سەرگەلۆ دا كریە.

پسمامێ وی هونەرمەندێ شێوەكار ئیبراهیم یاسین دیار دكەت كو چەند رۆژەكان بەری وەغەركرنێ پەیوەندی دگەل ستار عەلی كریە و خودێ ژێ رازی ژی دیار كریە كو مژویلی پڕۆژێ دروستكرنا پۆرترێتێن چەندین كەسایەتییان بوویە و پڕۆژەیێن دی یێن هونەری ژی بۆ پاشەڕۆژێ هەبووینە، لێ وەغەرا وی یا دووماهیێ ل رۆژا 4 ی ئیلۆنا 2023 ێ نەهێلایە ئەو خەون بجهـ بهێن.

**(بادينان) ژياننامه‌يا هونه‌رمه‌ندى ئاماده‌ كريه‌.