سۆلین یەکەم ژنە سینەماکارا کوردە دگەل نێتفلێکسێ دا رێزەفلمەك دەرهێنای

سینەماکارا کورد سۆلین یووسف، کو خوەدی چەندین بەرهەمێن سینەمایی و هونەرییە، د دیدارەکا تایبەت دا چەندین ئاگەهییێن نوو ل دۆر کار و هونەرا خوە تایبەت ژبۆ وارمیدیا ئاشکەرا دکەت.

هەڤپەیڤین: روال ناڤگوندی

•  سۆلین کییە؟
•  سۆلین ژنە سینەماکارەکا کوردە و کارێ خوە یێ سینەمایێ وەکە بەرخوەدانەکا سیاسی و جڤاکی دکەم، وەکە سینەماکارەکا کورد هەول ددەم چیرۆکێن کوردی و جیهانی لسەر پەردەیا سپی نیشان بدەم.

•  چەند بەرهەمێن سینەمایی یێن سۆلینێ هەنە؟

•  تا نها چەند بەرهەمێن من هەنە، ئەوژی چەند کورتەفلم، دو بەلگەفلم و فلمەکێ درێژ یێ کوردی. ل دەستپێکێ وەکی دەرهێنەر ئەز ب چیرۆک و فلمێن کوردی ڤە مژوول بووم، لێ بۆ ماوەیێ زێدەتر ژ دو سالانە ئەز زێدەتر ب رێزەفلمێن نێڤدەولەتی ڤە مژوولم و هەول ددەم سەربۆڕا خوە یا دەرهێنەرییێ ب چێکرنا فلمێن جیهانی ژی ڤە زەنگین بکەم و هونەرێ خوە پێشبێخم.

•  ب دیتنا تە سینەمایا کوردی د چ ئاست دایە؟ ئەرێ ناسنامەیا خوە هەیە؟ ب گۆتنەکا دی؛ سینەمایا کوردی مۆرکا خوە هەیە و گەشەکرنا پێدڤی ب خوە ڤە دبینیت یان د پاشڤەمانێ دایە؟
•  ئەز دبینم د ئەڤان 10 سالێن داویێ دا، سینەمایا کوردی پێشڤەچوونەکا باش ب خوە ڤە دیتییە. ئەو ژی ب دیاربوونا چەند دەرهێنەرێن کورد کۆ شیان بابەتێن کوردی ب شێوازەکێ هونەری ل سەر پەردەیا سپی بۆ کوردان و خەلکێ بیانی ژی بەرچاڤ بکەن. ب دیتنا من سینەمایا کوردی ناسنامەیا خوە هەیە!

•  ب دیتنا تە چاوا پەروەردەیا تەماشەکرنا فلمان بۆ بینەری چێکەین؟ ژبۆ کۆ بینەرییا فلمان و چوونا هۆلێن سینەمایێ ببیتە دیاردە؟
•  ب دیتنا من کوردان بینەرێ فلم، رێزەفلم و بەلگەفلمان ژی هەنە، لێ بینەرێن مە جۆرە تێربوونەک یا ژ وان بابەتێن فلمێن مە هەی! کۆ زێدەتر بەحسا دیرۆک و دەردەسەریێن مە دکەن (سەرەرای کو گەلەک یا گرنگە ئەم دیرۆکا خوە ب سینەمایێ نیشانی ملەتێ خوە و جیهانێ بدەین).

ئەز دبینم کۆ ئەڤە کارێ سینەماکارانە کۆ فلمێن خوە لدۆر مژارێن جودا جودا دا چێ بکەن، دا بینەر ژی خوە تێدا ببینن.

ب دیتنا من بینەرێ کورد پێدڤی ب پەروەردەیا تەماشەکرنا میدیا و فلمان نینە، بەلگە ژی ل دۆر گۆتنا من ئەوە کۆ هەردەم بینەرێن مە تەماشەی رێزەفلمێن تورکی، ئەرەبی هەتا ئەمریکی ژی دکەن، لێ ل سەر مە پێدڤییە ئەم چیرۆکێن رۆژانە و هەمەجۆر بۆ بینەرێن خوە چێبکەین.

د سالێن بووری دا مە ئەو هەولە یا دای کو ئەم ناسنامەیا کوردی بۆ جیهانێ ئاشکەرا بکەین، ب گۆتنەکا دی؛ مە فلمێن کوردی بۆ بینەرێن جیهانی چێکرینە دا بزانن کا کورد کینە، ئەز دبینم ئێدی دەم هات کو ئەم بۆ بینەرێن کورد ژی کار بکەین.

پێدڤییە ئەم ل دووڤ ژییێ تەماشەڤانان فلمان چێبکەین کۆ پترییا وان گەنجن.

•  ب شانازیڤە سۆلین یەکەم سینەماکارا کوردە گرێبەند دگەل نێتفلێکسێ هەی. جارێ ل دەستپێکێ نێتفلێکس چییە؟ باس ل سەربۆرا خوە دگەل نێتفلێکسێ بکە؟
•  ب کورتی ئەز دشێم بێژم کۆ نێتلفێکس سینەمایا دیجیتالە.

پرۆژەیێ من دگەل نێتفلێکسێ رێزەفلمەکە ناڤێ وێ (سکایلاینس) کۆ ژ 6 خەلەکان پێک دهێت، درامایەکە ل دۆر مووزیکا هیپهۆپ و بانك و پارە و حەشیشی یە، کارەکتەرێن سەرەکی یێن د درامایێ دا کوردن، 3 خەلەکێن دەستپێکێ دەرهێنەرەکێ دی چێکرینە و من ژی ژمارە 4،5،6 چێکرینە، ل 27\9 ل 107 وەلاتان لسەر نێتفلێکسێ بەلاڤبوو.

ئەڤ پرۆژەیە ژی وەرزێ ئیکی یە، ئەگەر خەلکی ژێ حەز کر، دێ وەرزێن نوو ژی ژێ هێنە چێکرن لێ ئەز نزانم کا دێ من دەم هەبیت دگەل وەرزێن داهاتی دا کار بکەم یان نە.

•  تێکهەلبوونا سینەما کوردی و یا جیهانی چەند گرنگییا خوە هەیە؟

•  تێکەلبوونا سینەما کوردی و یا جیهانی گەلەک گرنگیا خوە هەیە، ئەز دبینم کۆ ئێدی ئەم پتر هزرا خوە د وێ چەندێ دا بکەین کۆ سینەمایێ ب شێوازەکێ سەردەم بکار بینین و چیرۆکێن جیهانی بەرهرهەم بینین، کۆ خەلکێ بیانی ژی خوە تێدا ببینینت و شەرێ کارەکتەرێ سەرەکی ببیتە شەرێ بینەری ژی. نموونە ژی هۆلیۆدە کۆ بینەرێ خوە ل هەمی جیهانێ هەیە، نها فلمێن وان بالا خەلکێ هەموو پارچەیێن جیهانێ دکێشن.

•  نها سینەمایا هونەری یان یا بازرگانی گرنگترە ل کوردستانێ زێدەتر رۆلێ خوە دبینیت و کیژان گرنگترە؟
•  هەتا نها ب دیتنا من سینەمایا کوردی سینەمایەکا هونەری یە، کێم فلمێن بازرگانی، هونەری، رۆمانسی هاتینە چێکرن لێ بۆ پێشکەفتنا سینەمایا کوردی هەردو جۆرێن سینەمایان پێدڤی یە، چونکی هندەک بینەر دێ ژ فلمێن بازرگانی حەزکەن و هندەک ژی ژ فلمێن هونەری.
•  ژنێن سینەماکار ب تبلێن دەستان خزمەتا هونەرێ 7ێ ل کوردستانێ کرییە، کۆ تو ژی یەک ژ وانی، ئەڤە بۆ تە چ واتەیەك هەیە؟
•  
•  گەلەک یا گرنگە کۆ ژن دەستێن خوە بکەنە دناڤ هەموو لڤینان دا، سیاسەت بیت یان ئابۆر یان هونەر یان هەر تشت، ب شێوەیەکێ گشتی ژن د هەموو سەکتەران دا یا کێمە و ئەز دشێم بێژم کۆ جڤاکێ مە جڤاکەکێ نێرە، ئەگەر رێ بۆ ژنێ نەهێتە خۆشکرن کۆ کارێن خوە ئەنجام بدەت، دێ خەلکێ بیانی زانن کا ئاستێ مە یێ رەوشەنبیری و کولتوری چەندە. هەر جڤاکەکێ گرنگییێ نەدەتە ژنێ ئەو کۆمەلگەهـ یا کەفتییە، گەلەک یا گرنگە ژن و گەنج نە ترسن، هێز هەبیت و ب دەست و پێیان خوە پاڤێنە شۆلی و ل سەر ڤیان و حەزا خوە بەردەوام ببیت، چونکی دێ دەمەك هێت ب سەرکەڤیت و بیتە پارچەك ژ گوهەرینا کۆمەلگەهەکێ.

•  فلمەڤیستەڤالا دهۆکێ چەند گرنگییا خوە ژبۆ سینەما کوردی هەیە؟ ب تایبەت بۆ باژێڕێ دهۆکێ؟

•  فلمەفەستیڤالا دهۆکێ فەستیڤالەکا گەلەک ب تامە و گەنجە، ب پرۆگرامێ خوە ناڤدارە و ب رێیا ئەڤێ فەستیڤالێ گەلەك پەیوەندی د ناڤبەرا فلمسازێن کوردی و بیانی دهێنە خورتکرن و و ئەڤە دبیتە ئەگەرێ وێ چەندێ کۆ بزاڤا سینەمایێ ل کوردستانێ پێشڤە بچیت.

فلمەفەستیڤالا دهۆکێ بنگەهەکێ گەلەك گرنگە بۆ هەر سینەماکارەکێ کورد یێ هەر پارچەیەکا کوردستانێ و جهێ شانازییا مەیە.

هەروەسا وێ حەفتییا فەستیڤال تێدا دهێتە ئەنجامدان، دهۆکێ هەستەکا تایبەت یا هەی و هەمی مەدیا و جادە ژی باس ل فەستیڤالێ دکەن و ئەو حەفتی د کەشەکێ کەلتۆری/ هونەری دا دەرباز دبیت.

•  پلانێن تە هەنە تو کەنگی کارەکێ فلمەکێ دی یێ کوردی چێکەی؟
•  پشتی فلمێ مالا بێ بان ل فەستیڤالا دهۆکێ هاتییە نیشاندان، من حەز یا هەی ئەز فلمەکێ دی یێ کوردی چێکەم، لێ د ئەڤان دو سالێن داویێ دا ئەز زێدەتر مژوولی کارێن بازرگانی بووم دا بشێم ژیانا خوە ب رێڤە ببەم و ب وی داهاتی بشێم فلمێن کوردی ین هونەری چێکەم. هەروەسا ب ناڤداربوونا ناڤێ من د جیهانێ دا دێ بیتە ئەگەرەک کۆ ئەز بشێم ب سانەهتر پارا ب دەست خوە بێخم بۆ چێکرنا فلمێ من یێ کوردی، کۆ ئەڤە ماوەیێ چەند سالانە ئەز کار لسەر دکەم. لی 100% ئەز دێ فلمەکێ کوردی ل دەردورێن دهۆکێ چێکەم کۆ بابەتێن رۆمانسی، کۆمێدی و رەنگۆرەنگ بن، چونکی ئارمانجا من یا هەرە مەزن ئەوە ئەز سینەمایا کوردی بەر ب باشتر ڤە ببەم.
•  کارێن کیژان دەرهێنەرێن کوردی و بیانی پتر بالا تە دکێشن؟
•  ئەز گەلەک ژ فلمێن حسێن حەسەنی حەز دکەم، نێرینا وی یا هونەری و کۆمەلگەهی گەلەک یا جوانە، ب شێوازەکێ جوان ژنان ل سەر پەردەیا سپی دیار دکەت. دەمێ ئەز ل فلمێن وی تەماشە دکەم، ئەز هەست پێ دکەم کۆ ئەز ب هەمی هەست و ڤیانا خوە ڤی کاری دکەت و ب راستی وەکی سینەماکار دژیت، ژبەر ئەڤێ چەندی ژی فلمێن وی گەلەک بهێزن.

ئەو کارەکتەرێن ئەز نیشا مە ددەت گەلەک د تایبەتن و تژی کوردایەتی نە.

یێن بیانی ژی؛ ژاکوس ئودیارد و ئەلیخاندرۆ گۆنزالیس، کۆ فلمێن وان د ناڤبەرا بازرگانی و هەنەری دا نە و ئەز ژی خوە د ئەوێ ناڤبەرێ دا دبینم.

WAR