فلمه فیسته‌ڤالا دهوكێ - چار پیشانگه‌ه هاتنه ڤه‌كرن
د چالاكیێن فلمه‌فیسته‌ڤالا دهوك یا نێڤده‌وله‌تی دا، چار پیشانگه‌هێن هونه‌ری هاتنه ڤه‌كرن.
ئێك ژ وان پیشانگه‌هان، پیشانگه‌هه‌كا فۆتۆگرافه‌ر شكری به‌رواری، بوو، ل بن ناڤێ "خانم دانیال میتران و كورد و ئه‌نفال، تێدا چه‌ندین وێنه‌یێن دۆستا كورد یا فه‌ره‌نسی دانیال میتران هاتبوونه نیشان دان، ل ده‌مێ سه‌ره‌دانا وێ بو كوردستانێ.
ژ ئالیێه‌كێ دی ڤه، پیشانگه‌هه‌كا فۆتۆگرافی بو فۆتۆگرافه‌ر محه‌مه‌د مه‌عسوم سوێر، هاته ڤه‌كرن، تێدا چه‌ندین وێنه‌یێن فۆتۆگرافی یێ باژێرێ ئامه‌ێ نیشان دان.
پیشانگه‌ها "ئالیێن كوردستانێ"، پیشانگه‌هه‌كا دی بو كو د چالاكیێن فیسته‌ڤالێ دا هاته ڤه‌كرن، تێدا چه‌ندین وێنه‌یێن ئالیێ كوردستانێ د قۆناغێن جودا جودا هاتبوونه نیشان دان كو ژ ئاماده‌كرنا یوسف سه‌بری بوو.
پیشانگه‌هه‌كا دی یا فۆتۆگرافی، بو فۆتۆگرافه‌ر شڤان ته‌وفیق، هاته ڤه‌كرن، تێدا چه‌ندین وێنه‌یێن فۆتۆگرافیێن كه‌ڤنێن باژێرێ دهوكێ هاتبوونه نیشان دان.
ئه‌ڤ چار پیشانگه‌هه ئه‌ڤرو ئێكشه‌مبی، د چالاكیێن رۆژا ئێكێ یا فیسته‌ڤالێ ل هۆلا كۆنگران هاته ڤه‌كرن.
چالاكیێن گه‌رِا ئێكێ یا فلمه فیسته‌ڤالا دهوك یا ده‌وله‌تی، ل 9-16 ئه‌یلوول/ سه‌پته‌مبه‌ر 2012، ب نیشاندانا 78 فلمێن سینه‌مایی، دیكۆمێنتاری و كورته‌فلمێن بیانی و كوردستانی دێ یا به‌رده‌وام بیت.
ئه‌ڤ فیسته‌ڤاله ب چاڤدێریا سه‌روكێ حكومه‌تا هه‌رێما كوردستانێ نێچیرڤان بارزانی و ژ ئالیێ رێڤه‌به‌راتیا سینه‌مای دهوكێ یا سه‌ر ب رێڤه‌به‌راتیا ره‌وشه‌نبیری و هونه‌ری یا پارێزگه‌ها دهوكێ، فیسته‌ڤالا فلمێن دهوك به‌رلین و سپونسه‌ریا چه‌ندین كۆمپانیا و كه‌ساتیێن سه‌رمایه‌دارێن دهوكێ دهێته سازكرن.
بيامنير - په‌سار فایه‌ق/ پ. ف
- 2681 خوێندنەوە
