Share |

كورته چيرۆك .. جهێ‌ من نه‌بوو!.. .محسن عبدالرحمن

 

 

پشتي پازده‌ سه‌عه‌تێن رۆژييه‌كا د شه‌رگه‌ها چلێ‌ هاڤينا هشكه‌ساليێ‌ دا، ده‌ڤێ‌ وي به‌ستي، ئاڤابوونا رۆژێ‌ ژ نشكه‌كێڤه‌ ژيان سه‌ر ژ نوو ب گه‌هێن وي دا ئينا،

ل پێشيێ‌ ب بێهنبرساتي هه‌ر تشتێ‌ شل به‌ر وێڤه‌ي گه‌روويا خۆ يا هشككر، دا تێهنكا رۆژا ب وه‌ستييان بشكێنيت و خۆها كونيله‌يێن پيستێ‌ وي دێراندين قه‌ره‌بوو بكه‌ت ل سه‌ر هه‌ستيێ‌ پشتێ‌ و ده‌ست و پێ‌ ژبه‌رئێكچوويي، ب چاڤێن گران ل ده‌مژمێرا ب ديواريڤه‌ نێڕي، كچا وي په‌ياله‌كا چايێ‌ ل به‌ر ته‌نيشتێ‌ دانا و گۆتێ‌: (بابۆ.. ما ته‌ نه‌دگۆت دێ‌ چمه‌ مزگه‌فتێ‌)؟ ژێهه‌ل ب تيێ‌ چاڤي لێ‌ مه‌يزه‌كر و ب ئه‌رێ‌ سه‌رێ‌ خۆ هه‌ژاند، دزانيت كچا وي حه‌زدكه‌ت وه‌كو زه‌لامێن هه‌ڤسووي هه‌ما بچيته‌ مزكه‌فتي، ئه‌وژي حه‌زدكه‌ت رابيت هه‌ما كووڤه ‌بيت به‌س ده‌ركه‌ڤيت، لێ‌ وه‌كو هه‌ر رۆژيێ‌ حه‌مه‌ر بووي، ده‌نگێ‌ بانگي و لێدانا ده‌رگه‌هي ژ بال هه‌ڤسوويێ‌ وي، دودلييا وي بداويئينا، ئه‌ڤه‌ نيڤا ره‌مه‌زانێ‌ بۆري و ژ نوو پشتي فتارێ‌ دێ‌ ژ مال ده‌ركه‌ڤيت، ب له‌شێ‌ نيڤ به‌نجبووي ب سه‌ر خۆڤه‌ هات و گۆت: (خوزي مه‌لاي لبه‌ر سپلێتێن ته‌زي و ل سه‌ر مه‌حفوورێن نه‌رم ئێك رۆژ وه‌كو من د ڤێ‌ هشكه‌ساليێ‌ دا لبه‌ر تيرۆژكێن پيستي دكوزرينن بۆراندبا، دا بينين كا چاوا دا رۆژييا گريت و چيته‌ ته‌راويحان)! و ل چه‌رمێ‌ په‌حنكا ده‌ستێن خۆ يێن پاله‌تيێ‌ وه‌كو پشتا كمكمه‌ي لێكرين؛ نێڕي ملێ‌ خۆ دا ملێ‌ حه‌سۆيێ‌ كوسه‌ – ئه‌وێ‌ د چارده‌ چه‌رخان دا چه‌ند په‌سنه‌ك ب ره‌مه‌زانێ‌ و رۆژيێ‌ هاتييه‌ گۆتن نه ‌تنێ‌ دبێژيت و ڤه‌گێريت به‌لكو بسه‌رڤه‌دكه‌ت ژي، به‌ر ب مزگه‌فتێ‌ چوون، ب مه‌نده‌هۆشي ل خه‌لكي مه‌يزه‌دكر، د زارۆيان دهه‌لنگڤت و بڕێن ژنان ژ ده‌هـ سالي تا يا ل سه‌ر گۆپالي ب راپێچا خه‌ليجي ڤه‌درێژانه‌ جادێ‌: (ئه‌ڤ هه‌مي ژن و زارۆيه‌ ژ تاخێ‌ مه‌نه‌)!؟ و كۆڕ و كچه‌كێ‌ ئيشاره‌ت لێكدگوهارتن

-بێژه‌ ماشه‌للا. حه‌سۆي ژ ده‌ڤي ڤه‌گرت و زه‌لامه‌ك ژ كوردێن به‌ري ده‌مێ‌ گه‌نده‌ليێ،‌ به‌ژن بلند و بێ‌ زك، گه‌هشته‌ راستا وان و ب ده‌ف كه‌ني گۆت: ميتۆ، ميرۆ، ئه‌له‌مان. حه‌سۆ و به‌ري وه‌كو هه‌موو دبێژن: سه‌د خوه‌زيكێن وان رۆژان. بێژيت (وه‌رنه‌ ڤێرێ‌ ..نه‌چنه‌ بێرێ‌) هه‌ردو ژ دل كه‌نين (ميتۆ، ميرۆ، ئه‌له‌مان، نه‌چنه‌ بێرێ‌ وه‌رنه‌ ڤێرێ‌) وه‌كو مه‌لايێ‌ گێركاشي و به‌گێ‌ ئه‌رزي گۆت و ته‌ماشه‌ي حه‌سۆيێ‌ چاڤ وير كر، هه‌چكو ل هيڤييا به‌رسڤێ‌ باژێرێن به‌رێ‌ ده‌رگه‌هـ هه‌بوون، ئه‌ڤه ‌ژي ده‌رگه‌هێ‌ قووناغه‌ك گرنگه‌ ژ ژيان و پێكڤه‌ژيانا ساده‌يا خه‌لكێ‌ دهۆكا كه‌ڤن، كو بۆ سالێن ده‌ستپێكا پارێزگه‌هبوونێ‌ ڤه‌دگێريت، كو ميتۆ و ميرۆ و ئه‌له‌مان، سێ‌ هه‌لگرێن به‌رنياسبوون و ل سه‌ر ده‌مێ‌ به‌يانا 11 ئادارێ‌ پشتي جوبارێن خوينێ‌ ل دۆل و نهالێن كوردستانێ‌ چووين و ب قه‌بارێ‌ نه‌ڤيانا ئه‌ره‌با بۆ كوردان، هند ب تۆپ و فرۆكان بارووت لێ‌ باراندي، ب برياره‌كا بلند ته‌خ و تويژ ب تايبه‌ت خويندكارێن و فه‌رمانبه‌ر ده‌ردئێخستن خۆپيشاندانان، كو درووشمێن جودا دهه‌لگرتن و دگۆتن و ڤه‌دگێران (كورد و ئه‌ره‌ب برانه‌...)، حه‌سۆ ژي ئێك ژ خويندكارێن ناڤنجيێ‌ خۆ ژ پێشاندانێ‌ ڤه‌دزي و ل ناڤ گرۆپێن ب رێز دچن، خۆ گيروكر دا بگه‌هيته‌ ژڤانێ‌ سه‌لوايێ‌.. هند ديت يێ‌ ل ناڤ فارگۆنا داويێ‌ ئه‌وێن ئێكي ژ دل گازيدكر (هه‌وه‌ كي دڤێت گه‌لي كوردان) و گرۆپێ‌ هێژ سه‌رێ‌ هنده‌كان به‌رنه‌داي به‌رسڤد دا (ميتۆ، ميرۆ، ئه‌له‌مان) ژ خۆشييا گرۆپێ‌ شوفێران بۆ خۆپيشاندانا د دووڤ دا، پتر ژ نيڤا خويندكارێن ناڤنجيێ‌ خۆ دابوونه‌ دگه‌ل پێشاندانا شوفێران، ئه‌ڤێ‌ ل وي ده‌مي ئاريشه‌يه‌ك مه‌زن چێكر و رێڤهبه‌‌ري سه‌ميانێن وان خويندكاران هاتنه‌ گازيكرن و مامۆستا كرنه‌ چاڤدێر دا ل پاشه‌رۆژێ‌ خۆ نه‌ڤه‌دزن و بگه‌هنه‌ شوفێرێن پترييا وان تا نيڤرۆ د سه‌رخۆش و (نه‌چنه‌ بێرێ‌.. وه‌رنه‌ ڤێرێ‌) دبيت خاله‌كا وه‌رچه‌رخانێ‌ بيت ژ دهۆكا گوند به‌ر ب باژێربوونێ‌، كو مه‌ هه‌موويان يان پترييا په‌ز و مريشك ب خوداندكرن تا رۆژه‌كێ‌ سپێدێ‌ مه‌ ده‌نگێ‌ بۆلبۆليێ‌ عه‌لۆيێ‌ چوير بهيستي يێ‌ گازيدكه‌ت (وه‌رنه‌ ڤێرێ‌.. نه‌چنه‌ بێرێ) دولكێ‌ شيري ب ده‌رهه‌مه‌كي، ئه‌و بانگ ده‌ستپێكه‌ك نوو بوو. به‌س بۆ ته‌راويحا تنێ‌ چه‌ند پيره‌مێره‌ك دچوونه‌ مزگه‌فتي و به‌حسێ‌ ژنان ل پشت كوچك و ته‌نووران هه‌ر نه‌بوو، ل ناڤ ئه‌ره‌بان چاوابوو؟ ب درێژييا ژيێ‌ خۆ ئه‌وێ‌ ل به‌غدا و مووسلێ‌ بۆراندي، بيرا وي ناهێت جاره‌كێ‌ ديت بيت يان بهيست بيت، ژن بۆ نڤێژا ئه‌يني يان ته‌راويحا چووبنه‌ مزگه‌فتێ‌.. هه‌رده‌م پێدڤييه‌ ده‌زييه‌كێ‌ باوه‌ريێ‌ هه‌بيت مرۆڤي خۆ پێڤه‌ بگريت و براكۆژي ژبه‌ربرنا وێ‌ ئومێدێ‌ و قه‌تاندنا وي ده‌زي بوو، ئولداري و بێ‌ باوه‌رييا توند، هه‌رده‌م ژ ژينگه‌ها نه‌دار سه‌رهلدده‌ن. نڤێژا شيڤان ب خۆرتي ئه‌داكر، ل دۆر خۆ زڤري.. نڤێژگه‌هـ ژ بچووك و مه‌زنان يا خه‌تمييه‌، ميزدانك د زكي دا بڤدانكا ل به‌ر په‌قينێ‌ يه‌ و ڤيابيت ده‌ركه‌ڤيت، ب هه‌رحال رێكا خۆ دناڤ رێزێن نڤێژكه‌رێن پترييا وان زارۆ، ئه‌وێن ل گه‌ل لاڤه‌يا مه‌لاي بۆ ته‌راويحا خۆ به‌رهه‌ڤدكر؛ ڤه‌كر، ل ڤه‌گه‌ڕيانێ‌ ل نڤێژگه‌هێ‌ جهـ نه‌مابوو، ل ده‌رڤه‌ سالبه‌ندا ل دۆر مزگه‌فتێ‌ ژي يا پڕبوو.. ب ده‌نگه‌كێ‌ بلند مه‌لاي داخواز ژ ژنان دكر هه‌ما د مالا خودێ‌ ڤه‌ بێده‌نگيێ‌ بپارێزن، ل سه‌رێ‌ كۆلانا به‌رامبه‌ر مزگه‌فتێ،‌ ئه‌و كچ و كۆڕێ‌ ئيشاره‌ت ددانه‌ هه‌ڤ ژڤانێ‌ خۆ ده‌ستپێكربوو، سه‌رێ‌ خۆ هه‌ژاند، نزانيت كيژ خه‌مگينتره‌، مالباتێن باوه‌ر دكه‌ن كو ئه‌ڤ گه‌نج و زارۆيه‌ بۆ په‌رستنێ‌ چووينه‌ مزگه‌فتێ،‌ يان دره‌وا ئه‌ڤ كچ و كوڕێ‌ سنێله‌ ل يه‌كتر دكه‌ن.. هوور ته‌ماشه‌ي رێزێن نڤێژكه‌ران كر و ب ده‌نگه‌كێ‌ نزم گۆت: پا.. كي ل ڤي باژێرێ‌ باوه‌رداران خرابكاره‌!؟ - ما تو نه‌چوويه‌ ته‌راويحا؟ ل مال ژنا وي ژێ‌ پڕسي

- باوه‌ربكه‌ حورمه‌ت ل كۆلانێ‌ ژي جهێ‌ من نه‌بوو!

 

وار