ل دهۆكێ ساليادا هونه‌رمه‌ند عه‌بدولواحد زاخۆيي هاته ساخكرن
ل ژێرچاڤدێريا ئه‌يووب ره‌مه‌زان رێڤه‌به‌ريا ره‌وشه‌نبيري و هونه‌ري ل دهۆكێ و بهه‌ڤكاري دگه‌ل سه‌نته‌رێ هه‌بوون، ل هۆلا پانۆراما ئازادي ل دهۆكێ رۆژا وه‌غه‌ركرنا هونه‌رمه‌ند عه‌بدولواحد زاخۆيي هاته ساخكرن.
ل ده‌سپێكێ په‌يڤا رێڤه‌به‌رييا ره‌وشه‌نبيرى و يا مالباتا هونه‌رمه‌ندى هاته خواندن و هونه‌رمه‌ند هه‌ژار محه‌مه‌د عه‌لي كار و به‌رهه‌مێن هونه‌رمه‌ندي دانه دياركرن و لدووڤدا فلمه‌كێ ديكۆمێنتي لسه‌ر ژيان و كارێ هونه‌رمه‌ندي هاتنه نيشاندان.
ده‌رباره‌ى ساخكرنا ڤێ ساليداێ، رێڤه‌به‌رێ هونه‌رێ مۆزيكێ ل دهۆكێ، سه‌مه‌دار محه‌مه‌دى گۆت: هه‌لبه‌ت ئه‌ڤ كارێ ئيرۆ رێڤه‌به‌ريا گشتي يا و ره‌وشه‌نبيري و هونه‌ري ل دهۆكێ بۆ ڤي هونه‌رمه‌ندي كري، ب راستي جهێ دلخۆشيا هه‌موويان هونه‌رمه‌ندان بوويه.
سه‌مه‌دار محه‌مه‌د زێده‌تر دبێژيت: هونه‌رمه‌ند عه‌بدولواحدي خزمه‌ته‌كا مه‌زن بۆ هونه‌ري كريه و جهێ خوه د دلێن ته‌ڤا خه‌لكێ دهۆكێدا كريه. ده‌مێ وه‌غه‌ركري خه‌مه‌كا مه‌زن لجه‌م مه هه‌موويان په‌يدا بوو. راسته ئيرۆ ئه‌و دناڤ مه دا نه‌مايه لێ هونه‌رێ وي بوويه ئاوازه‌ك د گۆهێن مه‌دا.
هه‌ر لدۆر ڤێ ساليادێ، لاوين سه‌وري حه‌سه‌ن ئێك ژ ئه‌ندامێن سه‌نته‌رێ هه‌بوون يێ ره‌وشه‌نبيري گۆت: هه‌لبه‌ت مه بفه‌ر زاني ئه‌م ڤي هونه‌رمه‌ندي ژبير نه‌كه‌ين و كاره‌كێ جوان ژێرا بكه‌ين. ئه‌ڤا ئه‌ڤرۆ مه‌كري دبيت دلۆپه‌ك بيت به‌رانبه‌ر هونه‌رێ ڤي هونه‌رمه‌ندي.
لاوين زێده‌تر دبێژيت: ب راستي هونه‌رمه‌ند عه‌بدولواحد ئێك ژ هونه‌رمه‌ندێن مه‌زن و نه‌مره، هه‌رده‌م دێ يێ ساخبيت، چونكه كاره‌كێ جوان ل پاش خوه هێلايه، هيڤيدارم ژ لايه‌نێن په‌يوه‌نديدار هه‌موو جاره‌كێ ئه‌ڤ بيره‌وه‌ريه بهێته ساخكرن نه‌بتنێ بۆ ڤي هونه‌رمه‌ندي، به‌لكو هه‌موو هونه‌رمه‌ندێن نه‌مر داكو ئه‌ڤ هونه‌رمه‌ندێن نها ساخ بزانن ل پشتي وانژي دێ رۆژه‌كێ به‌حسا وانژي هێته كرن.
بێوار سپينداري- وار
- 2491 خوێندنەوە
