ناسینەک د دەربارێ مەلە ئەحمەدێ عەینبەرانی ( خودانێ مەزنترین پرتووکا پەندێن پێشیان ل کوردستانێ )

ھۆزان ئەمین-  مەلێ ئەحمەدێ عەینبەرانی د 1946 ل گوندێ عەینبەران گرێدایی باژارێ سێرتێ ل باکورێ کوردستانێ ژ دایکبوویە . ب رێکا باڤێ خوە ھينی خوەندانا قورانا پیرۆز  بوویە ،

پشتی ھینبوونا خوەندنا قورانێ، وەکی ئادەت و تیتالێن مەدرەسەیێن کوردستانێ باڤێ وی داتینە بەر دەستێ مەلا و فێری رێزمانا عەرەبی دبە ( صرف و نحو ) نێزیکی ٨ سالان ل دەف مەلە خالدێ قادی خوەندنا خوە قەداندییە ، د سالا 1969 و ژ بۆ کو زەکات و سەدەقەیێن گوندیان نەخوە د دەما مەلەتیا خوە دە، خوەستیە ب فەرمی د دیانەتا تورکیێ جھ بگرە و وەکە وەزیفەدار کار بکە ، ل عەنتابێ ل گوندەکی کوردان سالەکێ مەلەتیێ دکە ، لێ حەزکرنا وی ژ وەلات و خوەستەکا خزمەتا ملەتێ خوە، ئەو ئەگەر بوون کو نەھەشت ئەو ل عەنتابێ بمینە  و نەقلا خوە ئانی گوندێ سوسکێ ل دەڤەرا ئەرۆه و سێرتێ (ھەرێما بۆتان) و 8 سالان ل ور مەلەتیێ دکە، ئەو دەم بوو دەما کو زمانێ کوردی قەدەخە بوو و ملەتێ کورد نەدکاری  ب ھەسانی ب زمانێ خوە باخڤە ، د ڤی دەرباری دە دبێژە( من بەرێ خوە دایێ کو مەسەلا کوردەوارییێ د ناڤ کوردان دە قەلس دبه و کورد ئەسمیلە دبن ، من دەست ئاڤێت کۆمکرنا گۆتنێن پێشیێن کوردا دا ئەز وان ژ مرنێ قورتال کم)، و د بەر کارێ خوەدە دەست ب کۆمکرنا   وان کر و پاشێ وی  نەقلا خوە ئانی گوندێ  خوە دەڤەرا لێ ژ دایک بوویە (عەینبەران) و مەلەتیا گوندیان دکە، ل ور ژی کارێ خوە بەردەوام دکە ، لێ ب ئاواکی ڤەشارتی ، ژ بەر شەرت و مەرجێن سیاسی یێ وێ دەمێ کو دەولەتا تورک ھەر تشت ژ بۆ کوردان قەدەخە دکر و نەخاسمە د ئالیێ سیاسی و چاندی دە، دبێژە ( من ھەر مەھەکێ ئەو ( پەند و شیرەت ، چیرۆک و مەتلۆک و ھەلبەست ) کۆم دکرن و من دخستن کووپا و ڤەدشارتن ل بن ئەردێ) ھەیا سالا 1988 ، دەولەتا تورک قەدەخە کر کو مەلەتیا مەزگەفتێ کوردان بکە، و وی ئاڤێتن گوندەکێ ئەدەنێ ، ل ور ژی خەباتا خوە بەردەوام دکە و تشتێن کو کۆم کربوون ژ سەر  کاخەزێن پچووک ئاڤێتن سەرە دەفتەرێ، ھەتا سالا 1993 دە نەجار دبە دەرکەڤە دەرڤەیی وەلات و وان دەستخەتێن خوە تەسلیمی پەرلەمەنتەرەکی کورد دکە دا کو ل پێشیا وی دەرباسی ئەوروپا بکە ، ئەو ژی کۆچبەری وەلاتێ ئەلمانیا دبە و نێزی  8 سالان مەلەتیا کوردا دکە ، ل ور ژی  کارێ خوە بەردەوام دکە ، ژ بەر کو ژ ھەر دەڤەرێن کوردستانێ مرۆڤ ل ور ھەبوون و ژ دەڤێن وان گۆتن و پێندێن کوردی وەردگرتن.

ھەیا سالا 2003 مەلە ئەحمەدێ عەینبەرانی مەلەتی دھێلە و خوە ڤالا دکە ژ بۆ وان نڤیس و دەستخەتان دەرباسی ناڤا کۆمبیۆتەرێ بکە ، ئەوێن ژ وەلات بربوون 7000 بوون و د ئەنجاما کەدا  8 سالان ل ئەوروپا ژی 1500 گۆتن کۆمکربوون و وان دخە  قالبێ پرتووکەکێ لێ ب مژار و د مژارێ دە ژ رێزا تیپان ،  و ب رستەک یان ب ھەڤۆکێن درێژ وان شرۆڤە دکر ئەگەر نەزانیبا ژی  ژ شارەزایا دپرسی، د وی واری دە دبێژە(من بەرێ خوە دایێ کو کتێبەکە وسا نەھاتیێ چێکرن، و ئەو کتێبێن ل بازارێ ھەنە د دەربارێ گۆتنێن پێشیا کو ھەژمارا وان دگهێ 23 یەک ب یەک من ب دەست خستیە و من لێکۆلین ل سەر کریە تشتێ کو ل جەم من تونەبا من ل کتێبا خوە زەدەکریە).

ھەر وەھا بەردەوام دکە و دبێژە(من دیت کو ئەڤ پرۆژا د دەست من دە ئەوقاس مەزن بوو کو  خەبات و زەحمەتی و  ب کەدا 43 سالان ئەنجام دا ، و ھەژمارا گۆتنێن کو من دانە ھەڤ گھانە نێزیکی 58  ھەزارن ، ئەڤ ژمار ھاتیە پارڤەکرن ل سەر 1600 مژارا و گھایە نەزی 4 ھەزار رووپه لێن  A4).

ژ بۆ کو ئەڤ کەد و زەحمەتیا کو مەلایێ ھێژا کشاندیە ب سالان، بگهێ ئەنجامەکێ کو کورد ژێ سوودێ وەربگرن و ببە چاڤکانی ژ وان رە ، مەلا ئەڤ دەمەکە ژ ئەلمانیا بەرێ خوە دایە ھەرێما کوردستانێ و ل باژارێ دھۆکێ یە، تا کو ڤێ بەرھەما گرانبوھا چاپ و بەلاڤ بکە.

و ب رێکا وەزاراتا رەوشەنبی ، د گەل رێڤەبرێ چاپ و وەشانێ ل ھەولێرێ ھەڤدیتن پێک ئانیە ، لێ ژ بەر کو بەرھەما وی ب زاراڤایێ کورمناجیا ژوورینە، وی رەوانەیی رێڤەبەریا چاپ و وەشانا دھۆکێ دکن، و بەرھەما خوە سپارتیە وان ، و ل سەر سۆزا کو وێ چاپ و بەلاڤ بکن، و د داویێ دە دبێژە( ئەز سپاسیا وان دکم کو تەقدیرا ڤی کاری کرن و باەیاخ دان و ب نرخ لێ نەرین دا کو چاپ ببە و رۆنیێ ببینە و ژ کوردان رە ببە ژێدەر و وەرە پاراستن و وندا نەبە(  .

Rojnama WAR

--------------------------