هونه‌رمه‌ندێ كورد يێ ناڤدار جوان حاجۆ: دێ هه‌تا مرنێ كوردستان خه‌ونا من بيت
ئا/ گولبهار عه‌لي
هونه‌رمه‌ندێ كورد يێ ناڤدار جوان حاجۆ، د هه‌ڤپه‌يڤينه‌كا تايبه‌ت ده بۆ مالپه‌را ئاڤه‌ستا كورد به‌حسا كار و خه‌بات و په‌يوه‌ندييێن خوه يێن دگه‌ل هونه‌رمه‌ندا كوردا باكۆرێ كوردستانێ هوليا ئاڤشار و ئه‌لبۆما خوه يا نوو يا ب ناڤێ (ڤه‌گه‌ڕ) كر، هه‌روه‌سان به‌حسا پڕۆژه‌يێن خوه يێن نوو دكه‌ت.
هه‌ڤپه‌يڤينا كو رۆژنامه‌ڤان دلبخوين دارا ژ مالپه‌را ئاڤه‌ستا كورد دگه‌ل جوان حاجۆ كري، د ڤان رۆژێن دووماهيكێ ده ئه‌لبۆما خوه يا نوو به‌لاڤكر و ب كه‌يفخوه‌شي به‌حسا خوه كر.
ئالبۆما جوان حاجۆ يا نوو ب ناڤێ ڤه‌گه‌ڕ ژ چه‌ند سترانێن وي يێن كه‌ڤن هاتييه به‌رهه‌ڤكرن و وه‌سان دبێژيت: ده‌ما كو من ده‌ست ب ته‌مبوورێ كري، من گه‌له‌كي ل راديۆيا دياربه‌كرێ گوهداري دكر، چه‌ند سترانێن من خووشكا من ديلبه‌رێ بۆ من نڤيساندينه و هنه‌ك دن من دنڤيساندن. ده‌ما كو ژييێ من (14) سال بوون من كاسێته‌ك ب ناڤێ (ئه‌مينه ئه‌مينه) ده‌رخست. گه‌له‌ك سترانێن من يێن ڤێ ئه‌لبۆما نوو يێن وى ده‌مينه.
هه‌روه‌سان هونه‌رمه‌ند جوان حاجۆ د هه‌ڤپه‌يڤينا خوه ده به‌حسا بيرئانينێن خوه يێن كه‌ڤن دكه‌ت و وان ده‌مێن بڕييا ڤه‌گه‌ڕێ ژي و وه‌سان دئينته زمان كو ئه‌و سه‌ربۆرێن وي پارچه‌يه‌كي گرنگن ژ داهاتييا وي. دبێژيت من چ جاران خوه ژ ده‌مێن خوه يێن بۆري و سه‌ربۆرێن خوه دوور نه‌ئێخستييه.
د ده‌ربارێ ئالبۆما ڤه‌گه‌ڕ ده جوان حاجۆ دبێژيت كو ئه‌و ب دلێ وي چێبوويه و ب ده‌رخستنا وێ گه‌له‌كي كه‌يفخوه‌شه. ئه‌ڤه ده‌مه‌ك درێژه هه‌سكريێ وي پرسيارا وي دكرن. جوان حاجۆ دبێژيت: ب راستي ئه‌م ئێدي د گه‌ل خه‌لكێ خوه بوونه ئێك مالبات، ژبه‌ر ڤێ يه‌كێ هه‌رده‌م پرسياردكه‌ن گه‌لۆ كا كه‌نگي ئالبۆما ته دێ ده‌ركه‌ڤيت، ئه‌م چاوا دشێن به‌رهه‌مێ ته ببينن. به‌لێ ئه‌ز بهێڤيمه كو دلێ كه‌سێن ژمن هه‌سدكه‌ن هه‌رده‌م گه‌شبين و ژيانا وان خوه‌شتر بيت.
جوان حاجۆ ل سه‌ر ڤه‌گه‌ڕا وه‌لات ژي دئاخڤيت و دبێژيت كو ئه‌و بيرييا وه‌لات دكه‌ت و داخوازا ڤه‌گه‌ڕێ ده‌كه‌ت لێ به‌لێ راستييه‌كا دن ژي هه‌يه كو ئه‌ڤه (33) سالن ئه‌و ل وه‌لاتێن ئه‌ورۆپايێ دژيت و نها دو كه‌چێ، وي ژي هه‌نه و هێشتا زاڕۆنه، ئه‌و نه‌شێت ب ره‌وشا خوه يا نها ڤه‌گه‌ريته كوردستانێ و ب گه‌له‌ك ئالييان ڤه ب ئه‌ورۆپايێ ڤه گرێداييه. هه‌روه‌سان ئه‌وژي گۆت "كوردستان هه‌م خه‌ون هه‌م ژي ئارمانجا منه و هه‌تا دووماهيكێ دێ دگه‌ل منده ژيان كه‌ت، نه مومكنه ئه‌ز ده‌ڤ ژێ به‌رده‌م.
هونه‌رمه‌ند جوان حاجۆ د به‌رده‌وامييا هه‌ڤپه‌يڤينێن خوه ده ل دۆر ره‌وشا رۆژئاڤايێ كوردستانێ ئه‌وژي گۆت: ژ عه‌فرينێ هه‌تا دێروكێ هێڤي دكه‌م تشتێن باش چێببن. زۆردارييه‌كا مه‌زن ل هه‌ر چار پارچه‌يێن كوردستانێ چێدبن ب تايبه‌تي ل سه‌ر كوردستانا رۆژئاڤا دوژمنان ئه‌م گه‌له‌كي بچووك كرن ب تايبه‌تي ژ ئالييێ جۆگرافي ڤه لێ ئه‌م چ جاران د دلێ خوه ده بچووك نه‌بوون. كوردێن رۆژئاڤا خزمه‌ت و كاره‌كي مه‌زن كرينه و هه‌ر كه‌س ڤێ راستييێ دزانيت. ژبه‌ر ڤێ يه‌كێ ئه‌ز ب هيڤي مه ل دووڤ نه‌خوه‌شييێن ديتين وه‌سان خوه‌شييێ ژي ببينن.
- بۆچوونێکی نوێ بنووسه
- 3087 خوێندنەوە
