هونه‌رمه‌ند و پێشمه‌رگه‌يێ دێرين خه‌ليل باكۆزي وه‌غه‌را دووماهيێ كر
پشتي ململانه‌كا دژۆار دگه‌ل نه‌خۆشييا په‌نجه‌شێرا دلي، ل ده‌مژمێر 1 شه‌ڤا 2012013 ل نه‌خۆشخانه‌يا ته‌نگاڤييان ل دهۆكێ هونه‌رمه‌ند خه‌ليل باكۆزي وه‌غه‌را دووماهيێ كر و ل سپێده‌يا دوهي د رێوره‌سمه‌كێ دا ب به‌رهه‌ڤبوونا هژماره‌يه‌كا به‌رپرسێن حزبي و حوكومي و جه‌ماوه‌رێ دهۆكێ و هونه‌رمه‌ند و هه‌ڤال و كه‌سوكارێن وي، پاشان داوي مالئاڤاهي ل گۆڕستانا شاخكێ ل باكۆزي هاته کرن.
عه‌بدولخالق بابيري به‌رپرسێ لقا ئێكا پارتي ديمۆكراتي كوردستان د په‌يڤه‌كێ سه‌ره‌خۆشي ل مالبات و كه‌سوكارێن وه‌غه‌ركري كر و په‌سنا رۆلێ وي د قادا هونه‌ري و پێشمه‌رگايه‌تييێ دا كر و گۆت: كا چاوا وه‌غه‌ركري خه‌ليل باكۆزي هونه‌رمه‌ندێ ناڤدارێ ده‌ڤه‌را به‌هدينان بوويه؛ وه‌سا د رێبازا پارتي و نه‌ته‌وه‌يي دا مرۆڤه‌كێ مه‌زن بوو، كو د شۆرشا ئيلۆنێ دا پێشمه‌رگه بوويه و د سه‌رهلدانێ دا و پشتي هينگێ ژي رۆله‌كێ مه‌زن و به‌رچاڤ د پێشمه‌رگايه‌تييێ دا هه‌بوويه.
بابيري گۆت ژي، نه ب تنێ وه‌ك پێشمه‌رگه ئه‌ركێ خوه بجهدئينا، به‌لكو خه‌ليل باكۆزي ل پێشييا سه‌ران و د ناڤ پێشمه‌رگه‌يان دا ره‌وش بوويه و بۆ پێشمه‌رگه‌يان پالده‌ر و رۆحه‌كا مه‌عنه‌وي بوويه.
به‌رپرسێ لقا ئێك دازانين ژي كو ل ڤێ دووماهييێ ژي خه‌ليل كادره‌كێ تێكۆشه‌ر و ژێهاتيێ هێزا ژينگه‌ها دهۆكێ بوو.
زياد عابد سه‌رۆكێ لقا دهۆك يا سه‌نديكا هونه‌رمه‌ندێن كوردستانێ راگه‌هاند كو هونه‌رمه‌ند خه‌ليل باكۆزي خودان شێواز و ستايله‌كێ تايبه‌ت بوو و د هه‌ر ماله‌كێ دا حه‌ژێكه‌رێن ده‌نگێ خوه هه‌بوون، زێده‌تر گۆت: ئه‌ز ب باوه‌رم ژي كو چو مال نينن كو گوهـ نه‌دابنه سترانێن باكۆزي و كارتێكرن لێ نه‌كربت.
سترانبێژ هوشيار سندۆري ژي گۆت: خه‌ليل باكۆزي هه‌ڤاله‌كێ گه‌له‌ك نێزيكي من بوو و هندي من ديتي و گوهـ لێ بووي خه‌ليلي دلێ كه‌سێ نه‌هێلايه، ديسان ئه‌ز دبينم كو هونه‌رمه‌نده‌كێ گه‌له‌ك مه‌زن بوو و جه‌ماره‌كێ زێده هه‌يه، و هه‌ر وه‌كو سترانبێژێن مه‌زنێن كه‌ڤن وه‌كو ته‌حسين ته‌ها و ئه‌رده‌وان زاخۆيي و ئه‌ياز يووسفي ستايله‌كێ تايبه‌ت هه‌بوو و به‌رهه‌مه‌كێ زێده ل پاش خوه هێلا.
دهێته زانين خه‌ليل باكۆزي ناڤێ وي يێ دروست خه‌ليل مسته‌فا داوده و ل سالا 1932ێ ل گوندێ باكۆزێ يێ سه‌ر ب پارێزگه‌ها دهۆكێ ڤه ژدايكبوويه.
هه‌ژي گۆتنێيه ژي كو هونه‌رمه‌ندێ وه‌غه‌ركري د ژيێ 15 ساليێ دا ده‌ست ب گۆتنا سترانان كرييه و د چه‌ند به‌رنامه و شه‌ڤبێريێن فولكلۆري دا سترانێن كۆچك و ديوانان گۆتينه. ديسان پتري 30 به‌رهه‌مان ل پشت خوه هێلاينه.
پێدڤي گۆتنێيه كو خه‌ليل باكۆزي ژيانا هه‌ڤژينيێ دگه‌ل سێ ژنان پێكئينايه.
پله‌يا رائيد ژي ل هێزا پێشمه‌رگه‌يێ پاراستنا ژينگه‌هێ ل دهۆكێ هه‌بوو.
ديسان خه‌ليل باكۆزي، ئه‌ندامێ لقا دهۆك يا سه‌نديكا هونه‌رمه‌ندێن كوردستانێ بوو، و د سالا 2012 ڤێسته‌ڤاله‌كێ رێزگرتنێ ل دهۆكێ بۆ هاتبوو سازكرن و بڕياره په‌يكه‌ره‌ك بۆ بهێته چێكرن.
وار: هه‌لگر به‌هائه‌ددين
- 2200 خوێندنەوە
