يه‌كبوون ياش چيرۆك و سه‌رهاتيێن كوردان ل سه‌ر سيراميك و چيني دنه‌خشينيت
هۆزان ئه‌مين
يه‌كبوون ياش ژ باكوورێ كوردستانێ يه، ژ باژارێ سێرتێ. دبستانا ئاماده‌يي ل سته‌نبۆلێ، زانينگه‌ها وولووداخێ پشكا چيني و سه‌راميكێ ل باژێرێ بۆرسايێ خوه‌نديه. د سالا 2004ان ده هاتيه دياربه‌كرێ و جهه‌كێ چێكرنا چيني و نيشاندانا به‌رهه‌مێن خوه ڤه‌كريه. هه‌ر وه‌ها مامۆسته‌تيێ دكه‌ت و ژنێن دياربه‌كري فێري ڤێ هونه‌ري دكه‌ت.
ناڤبري ب هونه‌رێ خۆ يێ نه‌خشاندنێ مۆتيفێن مه‌زۆپۆتاميايێ ل سه‌ر قافكێن چيني چێدكه‌ت. پێشه‌نگه‌ها وێ ل دياربه‌كرێ، ل ناڤ ئاڤاهيا خانا حه‌سه‌ن پاشايه و رۆژانه ب ده‌هان كه‌س سه‌ردانا ڤي جهي دكن. ژ باژارێ ئامه‌دێ ب سه‌ره‌دان هاتبوو دهۆكێ، رۆژنامه‌يا ئه‌ڤرۆ ئه‌ڤ هه‌ڤپه‌يڤينه پێره چێكر دا هونه‌را خوه بده‌ته ناسين.
ل دۆر هونه‌رێ چيني يه‌كبوونێ دياركر كو هونه‌رێ چينێ ئاخه، قافكه، نه‌خشه، مۆتيفه، سه‌ربۆره، هۆناندنا رامانێ يه و گۆت: ستراندنا هه‌ڤيرێ چيني ل وه‌لاتێ چينێ ده‌ستپێكريه كو ب بنگه‌ها خوه ره‌هێ وێ دگه‌هيته هه‌زارێن سالان و به‌ر ب رۆژهلاتا ناڤين ڤه هاتيه و د سه‌ر ئۆسمانيان را دگه‌هيته ئورۆپا و دبه نرخه‌ك هێژا، قه‌سر و سه‌رايان دخه‌ملينه.
ل دۆر جوداهيا هونه‌رێ چيني ل گه‌ل يێ ئيراني و ئۆسمانيانيه‌كبوونێ دياركر كو كولتورا شارستانيه‌تا چين، ئيران و ئۆسماني د پێڤاژۆيا ده‌ستهلاتداريا خوه ده ره‌نگێن هه‌بوونا خوه ب نه‌خشاندنا ره‌نگێ ژيانا خوه كرنه مايين ده ل سه‌ر چيني و گۆت: من ژي هونه‌را ژ ره‌نگ، مۆتيف، هێمايێن شارستانيێن ل سه‌ر خاكا مه‌زۆپۆتاميايێ ژيايي هه‌لبژارت و ل سه‌ر چيني دنه‌خشنم. ئه‌ز ب گشتي چيرۆك، سه‌رهاتي، ده‌ستان، خوه‌زا و ديرۆكا گه‌لێ مه‌زۆپۆتاميايێ لێ ب تايبه‌ت يێن كوردان ل سه‌ر چيني دنه‌خشينم.
هونه‌رمه‌ندا ناڤبري گۆت ژي: هه‌تا نها ژي ره‌نگێ چيني يێ كورده‌واري نكارم بێژم كو هاتيه پێ، لێ به‌لێ هه‌ول و ئارمانجا من و يێن كو ئه‌ز وان په‌روه‌رده دكم ئه‌و ئه كو ئه‌م ژي كاربن ره‌نگێ خوه ببينن. ماته‌ريالێن مه گه‌له‌كن، لێ پێكانينا و سازكرنا وان ژ بۆ سه‌ر چيني كار و وه‌ستيانه‌ك رژد ژێ ره دڤێ.
ل سالا 2004ان ده ناڤبري ل دياربه‌كرێ جارا پێشي پشكداري د فه‌ستيڤالا چاند و هونه‌ري كريه، هه‌ر ل هه‌مان سال ل مێردينێ د فه‌ستيڤالا قۆسه‌رێ ده پشكداري ب پێشه‌نگه‌هه‌كێ دا كر، هه‌ر وه‌سا ل سالا 2006ان ده ل هه‌ولێرێ، د پێشه‌نگه‌هێك هه‌ڤپار ده پشكداري كريه. ل دياربه‌كرێ د گه‌له‌ك پێشه‌نگه‌هێن هه‌ڤبه‌ش ده پشكداري كريه، د سالا 2010ان ده ب به‌رهه‌مێن خوه نوونه‌راتيا باژێرێ دياربه‌كرێ د فيسته‌ڤالا نيڤده‌وله‌تي يا ناسناڤێن باژێران ده ل سته‌نبۆلێ كريه.
ل دۆر پرۆژێن خۆيێن پاشه‌رۆژێ يه‌كبوونێ دياركر كو ئه‌و نوكه ل سه‌ر گراوور و لێئانينا وێنه‌يێن د چيرۆك و ده‌ستانێن كوردان ده ده‌رباس دبن و چيرۆك، داستان و گۆتنێن كوردان لێكۆلين و به‌رهه‌ڤكاريێ دكه‌ت كو بشێت ل سه‌ر هه‌ڤيرێ چيني بنه‌خشينيت و بكه‌ته بنياته‌ك كو ببيته مولكێ ملله‌تێ كورد ب هونه‌را چيني دا كو ئه‌ڤ ره‌نگ و مۆتيف ووندا نه‌بن.
ل دووماهيێ هونه‌رمه‌ندا كورد يه‌كبوون ياش دياركر كو هه‌كه ژ ئاليێن دام و ده‌زگه‌هێن چاندي و ره‌وشه‌نبيري ڤه ل باشوورێ كوردستانێ پێشنيازه‌ك وه‌سا بێ كرن و داوه‌تنامه‌يه‌ك بێ سازكرن، ئه‌زێ ب كێفخوه‌شي به‌رهه‌مێن خوه بينم و پێشكێش بكم.
2012-01-12
- بۆچوونێکی نوێ بنووسه
- 2682 خوێندنەوە
