پرتووكا "هه‌ڤپه‌یڤین ب دادگه‌رێ شوَره‌شا بارزانی ره" ژ ناڤ وه‌شانێن سه‌ما ده‌ركه‌ت
ژ زنجیره‌یا وه‌شانێن ده‌زگه‌ها سه‌ما یا چاندی و هونه‌ری ل دوبه‌ی, ب ژمارا 32 پرتووكا مه‌له عه‌بدولا مه‌له ره‌شیدێ خه‌رزی یا ب ناڤێ "هه‌ڤپه‌یڤین ب دادگه‌رێ شوَره‌شا بارزانی ره" ده‌ركه‌ت. ئه‌ڤ پرتووك ژ پێشكێشكرن و ئاماده‌كرنا نڤیسكار ابراهیم ئه‌لیووسڤ ئه.
ئه‌ڤ پرتووكا كو ب زمانێ عه‌ره‌بی یه ژ 90 رووپه‌لی پێك تێ. ژیانا زانیار و ئوَلدارێ كورد مه‌له عه‌بدولا, به‌رهه‌م و هه‌ر وه‌ها دیده‌ڤانیا وی ل سه‌ر شوَره‌شێن كوردی, ئێش و ئازارێن وی یێن د ژیانێ ده تینه به‌ر چاڤ مه‌له عه‌بدولا خوه‌دانێ بیره‌وه‌ریه‌ك ئه هین زندی یه. ب زمانێ عه‌ره‌بی وان راوستگه‌هێ د ژیانا خوه ده شروَڤه دكه و به‌رسڤا گه‌له‌ك پرسێن بێ به‌رسڤ مایی دده.
پرتووك, ل سه‌ر وان راوستگان دسه‌كنه و به‌رسڤا به‌هتر ژ 30 پرسێ كو ژ ئالیێ نڤیسكار ابراهیم ئه‌لیوسڤ ڤه هاتنه ئاماده‌كرن دده, ته‌ڤلی چه‌ندین مژارێن گرینگ یێن گرێدایی ئوَل و شه‌ریعه تێ نه و هه‌ر وه‌ها ل سه‌ر ئه‌ده‌بیات و هه‌لبه‌ستا كوردی و دیتنێن وی ل سه‌ر ته‌ریقه‌تێ سوَفی ل كوردستنێ راڤه دكه. د هه‌مان گاڤێ ده ئه‌ڤ پرتووك دیكوَمه‌نته‌كه گرینگ ئه كو ل پرتووكخانا كوردی زێده ببه.
پێده‌چوونا پرتووكێ ژ ئالیێ شاگرتێ مه‌له عه‌بدولا, عه‌بدولره‌حیم مه‌قصوود ڤه هاتیه كرن و گه‌له‌ك تێبینییێن هێژا ب سه‌ر ڤه زێده كرنه و د داویا پرتووكێ ده ژی نڤیسه‌ك ل ژێر ناڤنیشانا "گه‌شته‌ك ل ناڤ مه‌دره‌سه و منهاجێ مه‌له ئه‌بدولا یێ خه‌رزی" نڤیسی یه. هه‌ر وه‌ها ل داویا پرتووكێ ژی چه‌ند وێنه‌یێن مه‌له عه‌بدولا هاتنه وه‌شاندن, ژێده‌رێن وان وێنه‌یان مالپه‌را خه‌رزان یا كو عه‌بدولره‌هیم مه‌قسوود ب رێ ڤه دبه.
هێژایه ئه‌م بینن زمان كو ده‌زگه‌ها سه‌ما مه‌له عه‌بدولا خه‌لات كربوو ل سه‌ر كار و خزمه‌تێن وی یێن نه‌توه‌یی و باوه‌رناماك رێزلێنانێ پێشكێشی وی كربوو, نه‌مازه چاپكرنا ڤێ پرتووكێ ژی نیشانا وێ تێقدیر و احتیرامێ یه بوَ كه‌سایه‌تییێن مینا وی.
مه‌له ئه‌بدولا مه‌لێ ره‌شیدێ خه‌رزی:
ژ مالباته‌كه وه‌لاتپارێز و ته‌كوَشه‌ر ئه. ب ئه‌سلێ خوه ژ باكورێ كودستانێ, ل هه‌رێما خه‌رزانێ هاتیه دونیایێ. باڤێ وی یه‌ك ژ وان له‌هنگێن سه‌رهلدانا ساسوَنێ بوو, پشتی شكه‌ستنا شوَره‌شا شێخ سه‌عید و سه‌رهلدانا ساسوَنێ كوَچی باشوورێ روَژاڤایێ كوردستانێ بوون و ل باژارا قامشلوَ ب جه بوون. ل به‌ر ده‌ستێ باڤێ خوه خوه‌ندن و زانستیا خوه فێر بوویه; فقه, زمانێ ئه‌ره‌بی, مه‌نتق, فه‌لسه‌فه و ئوَلا سلامێ خوه‌ندیه و ها ل مه‌دره‌سا خه‌زنا ل به‌ر ده‌ستێ شێخ عه‌لاالدین ئه‌ل خه‌زنه‌وی خوه‌ندنا خوه به‌رده‌وام كریه و ئیجازا خوه وه‌رگرتیه.
مه‌له عه‌بدولا, ژ بوَ خه‌بات و كارێن خوه‌یی نه‌توه‌یی و ئوَلداری پێك بینه, كه‌تیه زندانێ و ل شكه‌فت و چیان رازایه و د گه‌ل پێشمه‌رگان چه‌ك هلگرتییه, ب سێداره‌دانێ هاتیه دارزاندن ژ ئالیێ رێژیما سه‌دام ڤه د ده‌ما شوَره‌شا كوردستانا راقێ ده و هه‌ر وسا ژ ئالیێ بارازنیێ نه‌مر ڤه وه‌كه دادوه‌رێ هه‌رێما شنگالێ هاتبوو ته‌عیین كرن. پشتی شكه‌ستنا شوَره‌شا كوردستانا عراقێ یا 1975ان ڤه‌گه‌ریایه باژارێ قامشلوَ و هه‌تا نها ته‌ڤی گه‌له‌ك زه‌همه‌تی و خزانی ژیانا خوه ددوَمینه.
هوَزان ئه‌مین
- بۆچوونێکی نوێ بنووسه
- 3069 خوێندنەوە
