پەنجەرا من روي ل پەنجەرا مالا وە يە!....عبدالرحمن بامه‌رنى

دێ شێي بێژيە من،

پەنجەرا مالا وە روي ل پەنجەرا مالا مە

چ رامانا خوە ھەيە!

تشتێ ل پشت پەنجەرا مالا وە

وەکي بانگێ (ئێڤاريان) من ھەمي ژێ ژ بەرن

ل بەرامبەري پەنجەرا مالا وە

ئەزێ ل ھەمي تشتان بەرزەبويم و

ئەزێ ھەمي تشتێن خوە دپشت پەنجەرا مالا وە را دبينم

ياريکێن من ب دەستێن خوە بو تە چێکرين

بيکێن پاتەي

خو سيتافکا تە ژي

ئەزێ ل ھەمي تشتێن خوە دگەرم

پارچەيێن بيرەوەريێن خوە يێن بەلاڤە

ل پارچە موزيکەيێن ژبيرکري!

لێگەريانا بيرەوەريێن دوماھي ئەز و

ئەو دوماھيا پارچەيێن جەستەيێَ من لێ دبژالە..

ل بەرامبەري پەنجەرا مالا وە

چاڤێن من بتنێ قەترەيا پەنجەرەيا وە دکەن

بتنێ د زمانێ بێدەنگيێ دگەھم و

فرينا بالدەيەکي ل بلنداھيا عەسمانا و

دادان ژبيرا خوە بري!

تو چەندا ژ من دويري و چەندا ژ پەنجەرەيا من نێزيک

دەستێ خوە ب پرچا گولان دا بينە خار

دا بێژمە تە عەشقێ چەند ھەناسە ھەنە؟

ئێک ئێکە وان ھەمي مەسجێن

تە نيڤا شەڤان خەو ژ چاڤێن من رەڤاندين

چاڤێن خوە ل رستەيا مەسجێن من يێن بوري دا ب خشينە

دوماھي مەسجا من يا نڤيسي تە نە لبيرە؟

..... (ئەگەر تە ڤيا ھەست ب خوشيا عەشقێ بکەي

رحا خوە ژبير بکە و

بھێلە تو لدويڤ مەشا حەزێن خوە بچي

رويساتيا خوە

بکە دناڤ دەستێن بەلگەکێ وەريايي دا و

دناڤ پێکەکێ مەي دا خوە ژبير بھێلە

ھەمي تشتەک ب بێدەنگي

دێ سەرخوشيا تە ل پاش خوە ھێليت!

دناڤ ھەمي بێھوشيەکێ ژي دا

دێ زاني من چەند تو دڤێي).....

ئەڤە ئێکەم مەسجا من يا عەشقبونێ بو و

دوماھي ڤرێن تە ل پشت پەنجەرێ، لبيرا منن

دوماھي مەسجا من يا کو دێ گەھيتە تە

..... (ھێشتا پەنجەرا من

بير ل خەريبيا پەنجەرا مالا وەيە و

تە ھێشتا خوە د کويراتيا ھەناسەيێن من دا نە ديتي يە

کەس ب کورەييا شەڤان، خەريبيا خوە د پەنجەرا کەسێ دا نابينيت

ھيچ تاڤيەکا بارانێ نەمايە، تە ل ھەناسەيێن من نێزيک بکەت).....

ئەو مەسجا ھێش من نە نڤيسايي ژي

خو ئەگەر تە بير لمن کر

تە ڤيا خوە ژ پەنجەرا خوە نێزيک بکەي

وەک بارانێ ھوير ھوير

ب سەر پەنجەرا من دا وەرە خارێ و

ب دلوڤانيا روژێن بەرێ

دلوپ دلوپ

خوە بەردە دناڤ پێکێ لبەر سينگا من دا

ئەڤە دوماھي شەڤا منە

دوا و سيا و چارا و پێنجان ژي

تا سەرخوش دبم دێ ھەر ڤەخوم و

ئەگەر سەرخوش ژي بوم

بتنێ دێ پەنجەرەيا مالا وە بينم.....!