ڕۆژین حاج حوسێن
ڕۆژین حاج حوسێن بۆ گوڵان:تابلۆكانم دەبنە میوزیكێكی دەنگدار و بیستراو كە بانگەوازی ئازادی دەكەن
ڕۆژین كچێكی ڕۆژئاوای كوردستانە كە چەندین ساڵە لە هەرێمی كوردستان سەرقاڵی تابلۆ و وێنە كێشانە، تا ئێستا چەندین پیشانگەی كردووەتەوە، هەوڵ دەدات لە ڕێگەی تابلۆكانییەوە گوزارشت لە ژیان و قوربانیدانی میللەتی كورد و خەباتی بێوچانی بۆ ئازادی بكات، گوڵان چەند پرسیارێكی ئاراستە كرد لەسەر چەند پرسێكی تایبەت بە هونەری شێوەكاری.
* زیاتر لە چ قوتابخانەیەكی شێوەكاری نزیكیت؟
-باوەڕم وایە كە گیانی هونەرمەند ئەو قوتابخانە هونەرییە هەڵدەبژێرێ كە خۆی تێیدا دەبینێتەوە كە داهێنانی تێدا بكات، ئەمەش جۆرە چینراوێكێ هونەرییە كە هەوڵ دەدات دروستی بكات، دابڕێت و بە خەیاڵ و بیركردنەوەی خۆی بیكات. كاتێك بیرۆكەیەك بە خەیاڵێكی سادە و قووڵ و شاراوە دەر دەبڕم، سووریالیزمەكە دەبێتە پەناگەی من، كاتێك بە شێوەیەكی ساكار ئەوەی دەژیم و ئەوەی لەسەر زەوی ڕاستی ڕوو دەدات دەكێشم، یان ئەوەی دەمەوێ دەری ببڕم یان ئارەزوویەك بەبێ ترس و نیگەرانی دەربڕم، بەڵام ئەبستراكتیزم بۆ من بواری فراوانترە كە ئازادییەكی بێ سنوور و بێ مەرجم پێ دەبەخشێت، كە سنووری جووڵە و خەیاڵەكانم لەسەر تابلۆ سپییەكە كەم دەكات. ئەبستراكتیزم لە شتە ئاشناكان دوورە و نزیكە لەوەی گیانی هونەرمەند دەیڵێت.
ڕۆژین حاج حوسێن بۆ گوڵان:تابلۆكانم دەبنە میوزیكێكی دەنگدار و بیستراو كە بانگەوازی ئازادی دەكەن
*لە ڕێگە تابلۆكانت دەتەوێ چ پەیامێك بگەیەنی؟
-هونەر پەیامێكی مرۆییە پێش هەموو شت، وەك ناسنامەی مرۆڤە كەیە كە هەڵی دەگرێت. دەبێ لە پلەی یەكەمدا خزمەت بە پرسی مرۆیی بكات، لە ئازارەكانی، پێداویستییەكانی، هیواكانی، چونكە لەوەوە دەست پێدەكات و لە دوورەوە كۆتایی دێت، هەر هونەرمەندێك دەبێ ئەم خەسڵەتە بەرزەی هەبێت. ناتوانم تابلۆ بكێشم بەبێ ئەوەی كاریگەریی لەسەرم ببێت بەوەی دەوروبەرمە یان هەستم پێ دەكات، چونكە من بۆ مرۆڤ دەكێشم كە بنەمای هەموو شتە. كۆمەڵگە دەبێ وەك ئاوێنەیەك بێت بۆ گەلەكەی، هەروەك تابلۆیەك كە ئاوێنەی گیانی هونەرمەندە و وەرگێڕانی خەیاڵەكەیەتی.
*پێتوایە هونەر ئامرازێكە بۆ گۆڕینیكۆمەڵایەتی و سیاسی یان تەنیا بریتییە لە دەربڕینی ناخی هونەرمەن؟
-هونەر ڕێگەیەكی ئارامە كە بە شێوەیەكی جوانتر، ئازادتر و بوێرانەتر دەربڕین لە پرسی سیاسی و كۆمەڵایەتی دەكات. من بۆ خۆم و ئەوەی هەستم پێ دەكات دەكێشم بۆ گەلەكەم و وڵاتەكەم و ئەوەی دەیبینم و كاریگەری لەسەرم دەبێت، چونكە من لە هەمووانم و هەمووان منن. هونەر دەنگی من و دەنگی ئەوانە كە بەهۆی هۆكارێكەوە كز بوون. بۆ هەژار و دەوڵەمەند، خۆشەویست و شەهید تابلۆم كێشاوە، هەروەها بۆ دایك و وڵات. من بەشێكم لە هەموو و هەموو بەشێكە لە من. هونەر بە سەلامەتترین ڕێگە دەزانم بۆ دەربڕین و گۆڕانكاری و چارەسەری پرسی كۆمەڵایەتی و سیاسی، كە لە واقعدا ڕۆڵێكی كاریگەر و ئەرێنیی هەبووە.
ڕۆژین حاج حوسێن بۆ گوڵان:تابلۆكانم دەبنە میوزیكێكی دەنگدار و بیستراو كە بانگەوازی ئازادی دەكەن
*ئایا توانیوتە ببیت بە دەنگی میللەتەكەت و دەربڕینی مەینەتییەكانی؟
-لە ماڵێك و كۆمەڵگەیەكی كوردیدا لەدایك بووم و گەورە بووم، كە سەرچاوەی ئیلهام بوو كە كەمێك خۆشی و زۆر ئازار و ستەم و نەهامەتیی لەگەڵ خۆیدا هێنابوو، كە لەوێ زۆرێك لە ئازادییەكانم لەدەست چووبوو، چ لەسەر ئاستی ناسنامە، زمان یان وەك مێینە. هاواری ئازادی و ئاشتی گەلەكەم. ڕەنگەكانم كە لەسەر تابلۆكانم دەسوڕێنەوە، لە بەهار و ڕەنگە هاوڕێژ كراوەكانی سەر پارچە و زەخرەفە و قاڵییەكان و جلە ڕەنگاوڕەنگەكان وەرگیراون كە ماڵەكانمان بێ بەش نین لێیان. ڕەنگەكانم وەك پەلكە زێڕینەیە كە دەبێ بە ڕەنگی شادی و هیواوە دەربكەوێت لە فۆلكلۆر و ماڵەكانماندا. هەروەها لە هەندێك كاری هونەریدا، نیشانە و سیمبوولە مێژووییەكانمان بەكارهێناوە كە مۆركە كوردییەكە و جوانییەكەی دەردەخات.
*چۆن وێنای ئافرەت دەكەی؟
-ئافرەت وڵاتە، خۆشەویستە، سرووشتە، ئەو دایكە خەباتكارەیە كە بەرگەی زۆر لە ئازار و قوربانیی گرتووە، بە هەموو شێوەیەك خەباتی كردووە بۆ دابینكردنی ئاشتی و ئاسایش و پاراستنی منداڵەكان، ماڵ و وڵاتەكەی، بە تایبەتی ئافرەتی كورد كە تووشی زۆر ئازار، بێسەروشوێنبوون، ئاوارەیی و جەنگ بووەتەوە، بەڵام بە شایستەیی توانیویەتی خۆی بسەلمێنێت، هەر وەك پیاو، لە وەرگرتنی پۆستەكان، بەدەستهێنانی سەركەوتنەكان و پاراستنی وڵات لە پاڵ پیاودا. لە هەر جوانییەكدا ئافرەتێك دەبینم، چونكە ئەو ڕەنگە جوانەكەی ژیانە.
*تابلۆكانت چۆن ڕەنگدانەوەی ئاوات و ئالنگارییەكانی بەردەم ئافرەتن؟
-ئەوەی زۆرتر ئاستەنگ بۆ بیر و پێشكەوتن و داهێنانی ئافرەت درووست دەكات، ئەو كۆتوبەندانەن كە بەسەریدا سەپێندراون، نەبوونی ئازادیی پێویست و هەندێك لە نەریت و كەلتوورەكان، چ لە خێزانەكەیەوە یان كۆمەڵگە و ئەو ژینگەیەی كە تێیدا دەژی. دەنگی لاوازی بە زۆری لەسەر تابلۆكانم دەبێتە میوزیكێكی دەنگدار و بیستراو كە بانگەوازی ئازادی دەكات.
ئەو تابلۆیانە ئازارە بەردەوامەكانی ئافرەت لە توندوتیژی، سەندنەوەی مافەكان و پێداویستییەكانی دەگێڕنەوە، هەروەها جوانییە ناوەكی و دەرەكییەكەی دەردەخەن.
*تا چەند پێتوایە تێڕوانینی كۆمەڵگەی كورد لە پیاوی هونەرمەند جیاوازە بۆ ئافرەتی هونەرمەند؟
-بە دڵنیاییەوە جیاوازی هەیە، هونەرمەندی ئافرەت بەرامبەر ئافرەت وەك ئاوێنەیەك دەڕوانێت كە ڕۆحی خۆی دەرئەخات، چونكە لە هەبوونی خۆیەوە زیاتر هەست بە ئاوات و ئازارەكانی دەكات و بە وردی و قووڵتر كار دەكات بۆ دەرخستنیان، بە بەراورد بە هونەرمەندی پیاو كە لەوانەیە زیاتر سەرنج بداتە شێوەی دەرەكی و ڕۆڵی ئافرەت لە ژیاندا وەك دایك، خۆشەویست یان هاوسەر، بەبێ ئەوەی زۆر بچێتە ناو تێگەیشتن لەوەی كە لە ناوەوەی ئافرەتدا دەگوزەرێت.
*هونەرمەندی كورد بە گشتی زیاتر پێویستی بە چییە پاڵپشتی ماددی، بونیادنانی ژێرخان وەك هۆڵ و مۆزەخانە، یان هۆشیاریی كۆمەڵگە، بەتایبەتی بۆ هونەری شێوەكاری؟
-هونەرمەند تووشی كەمیی دەرفەتی دارایی و پاڵپشتی و كەمیی بازاڕەكان دەبێت، كە كارە هونەرییەكان پیشان دەدەن، هەروەها كەمیی هوشیاری لە گرنگیی هونەر و ئەوەی هونەرمەند پێشكەشی دەكات و ڕۆڵەی لە كۆمەڵگەدا هەیەتی.
گوڵان میدیا
- 13 خوێندنەوە
