ھونەرمەند شیار ئاگری (نە ھەر ئاواز و تام کو د مووزیکا ل ستەنبۆلێ تێ ئافراندن کوردی یە(

ھۆزان ئەمین- شیار ئاگری ناڤەکی خویایە د ناڤا موزیکا کوردی ل رۆژاڤایێ کوردستانێ و سینۆر بەزاندنە و ئاستا ناڤداریا وی گھشتیێ باکوورێ کوردستانێ و ل ناڤا کوردێن ئەوروپا، شەھرەزایا شیار ئاگری نە تەنێ د ژەنینا ئامورێ تەمبوور و باخلەمێیە و ئاواز دانان و دابەشکرنا مووزیکێ دەیە،

 لێ بەلێ  شەھرەزایا وی د بەوارێ تۆمارکرنا سترانان ب شێوەیەکی مودێرن، و ب دەھان ستران  بۆ گەلەک ھونەرمەندێن ناڤدار تۆمار کرنە و د گەل وان دە دەرکەتیە شاھی و شەڤێن کوردان ل سووریێ و لوبنانێ و باکورێ کوردستانێ، نھا ل باژارێ دھۆکێ د گەل مامۆستە و محەمەد فەرحا کو زانا و مامۆستەیە، د فێرکرنا موزیکێ و نۆتەداینا سترنانێ دە ، و خوە ئامادە دکن بۆ تۆمارکرنا سترانان بۆ ھونەرمەندان.

مە ل سەر ڤێ بابەتێ پێوەندی ب شیار ئاگری رە دانی و ل سەر کار و خەباتێن وان ، و پرۆژەیێن وان ل دھۆکێ وەھا ژ رۆژناما ئه ڤرو ره ئاخڤی.

شیار ئاگری ژ باژارێ عاموودێ رۆژاڤایێ کوردستانێ یە ، و ژ بچوکاتیا خوە دە، دامارێن ھونەرێ پێرە دیار دبوون و حەز و خوەستەکا ژەنینا موزیکێ پێرە پەیدا بوویە، و دبێژە “ موزیک د ناڤا دامارێن من دە و د ناڤا خوینا من دە دگەریا“

ژ تەمەنەک بچووک دە تەڤلی کۆما سەرخوەبوون دبە، و ل عاموورێ ئۆرگێ دخست، و پشتی وێ خوە فێری ژەنینا تەمبوورێ دکە، و خوە پێش دخە و گەلەک داھێنانێ د باخلەمێ و تەمبوورێ دکە ، و خوە یەکەم کەس ددە ناسکرن، کو باخلەمە دەرباسی ناڤا کوردێن رۆژاڤا کریە، و د ناڤا خەباتا کۆمێن ھونەری مینا کۆما ئاگری، و ب ھەڤکاریا برادەران گەلەک کاسێتا و بەھەمان دەردخە، ھەیا سالا ١٩٩٤ بەرێ خوە ددە باژارێ حەلەبێ و دبێژە ژ وێ دەمە حەیا نھا من ٧ بەرھەمێن دەرخستنە ، و ل ور دەست ب تۆمارکرنا دەنگ و موزیکا سترانان دکە، و دبێژە ب تەکنینکا نوو من دەست ب تۆمارکرنا سترنان کر، ب ئاموورێن نوو کو وێ دەمێ دەرکەتبوون، و ب رەنگێ ئارنژۆریا نوو ب کەمان و گیتار باس و بلوور و زرنە و دەف ….ھود من ئانی و داخست ناڤا سترانا کوردی ل رۆژاڤا ، و ب ستایەلکی نوو مە موزیک تۆمار کر، و مە ھونەرا کوردی ژ وێ شەوەیێ کلاسیک کو ب تەمبوور و دەربەکەکێ کاسێت دھاتە تۆمار کرن خەلاس کر.

و د دەربابرێ بەشداریا وی ب ھونەرمەندان رە وەک سازڤان د ئاھەنگ و شاھیان دە ، گۆت کو تەڤی ھونەرمەند شڤان پەروەر ئەز ب گەلەک سترانبێژێن کورد رە دەرکەتییە سەر دکا شانۆیێ و ب وان رە من  مووزیک ژەنی کریە، وەک ئارام دکران- ئارمانج- زەریفە – جەمال تیرێژ- گولیستان پەروەر- خەلیل خەمگین- شەمدین- بەسەر شاھین- خەمگین بیرھات- مەحموود ئەزیز- پەیوان  و برادەر.

د سالا ٢٠٠٠ دە کاسێتا خوەیا ب ناڤە ( حکمەتا خوەدێ) ژ پەیڤێ میرە ھەلبەستا کوردی ئەحمەدێ خانی دەرخستیە، و ل باژارێ سلێمانیێ ئەو ستران کلیپ کر، ھەر وەھا سترانێن وییێ خویا ( حجرا تاری) و (راستی) د ناڤا وێ کاسێتە دە جھ دگرتن.

د دەربارێ سترانێن وییێ ناڤدار کو گەلەک سترانبێژان گۆتنە ، دبێژە “ راستە من ستران چێکرن لێ ھونەرمەندن دن پێ ناڤدار بوونە ، وەک ھجرا تاری کو ھونەرمەند کاوا سترایە و ناڤە من ژی نانینیە زامان و ستران (عەرەبا من ) ژی یا ناڤدار کو برادەر گۆتیێ من ئارانژۆریا وێ کریە”

د سالا ٢٠٠٥  ڤەدگەرە باژارێ قامشلۆ، پشتی گەلەک ھەولدانا بۆ کۆچبەر ببە و بەر ب ئەوروپا ڤە بچە، کو د ڤی واری دە دبێژە “ من دخواست ئەز ھەرم بەر ب رۆژاڤا ڤە تا کو ئەز ھونەرا خوە ھین بەھتر پێش بخم ، ژ بەر پەیدابوونا ئمکانان و تکنۆلۆجیەک پێشکەتی “ لێ پشتی ئەز چووم باکورێ کوردستانێ و پێشوازیا خەلک و جەماوەری بۆ من، من ھەست کر کو ئەڤ کەد و جەفایا مە دییە، د بەر موزیکا کوردی و خزمەتا کو مە ژێرە کریە ، ھێژایی بوو و من ھەست کر کو من تشتەک پێک ئانییە”

د دەربارێ ناڤداریێ و خویاکرنا ھونەرمەندەکی ل سەر حەسابێێ دن دبێژە کو ھونەر تشتەکی ب ھەست و دلێ مرۆڤان گرێدایییە دڤە پێ نەیێ لیستن، و مەرە رێزێ ژ کەدا ھونەرمەندان رە بگرە، و تم و تم مەرە ل سەر ھونەر و کارێ ھونەری ھشیار بە، لۆما لازمە مەرە ب کەد و ئمکان و زیرەکبوونا خوە دەرکەڤە، نە ل سەر مل و کەدائێ دن، و ب مخابنی ئەز دبێژم ڤە دەمێ گەلەک کەس دەرکەتنە و ناڤدار ژی بوونە ، دبە کو نە ئەوقاس شەھرەزا بن ژی لێ دەرفەت بۆ وان پەیدا بوونە ، و خوە خویا کرنە”

د دەربارێ ھاتنا خوەیا ھەرێم کوردستانێ و سەکنا وی ل باژارێ دھۆکێ گۆت کو “ دبێژە ڤێ گاڤێ مە ل بەرە کو ئەم سترانان ژ ھونەرمەندار رە تۆمار بکن، ئەز و ھونەرمەند محەمەد فەرحا کو ژ رۆژاڤایێ کوردستانێ د گەل من دە ھاتیە، مە ستودیۆ دامەزراندیە، تا کو ئەم ئالیکاریێ ب ھونەرمەندێ ڤێ ھەرێمێ رە بکن و ، ئەم ھەول بدن وان ژ ریا ستەنبۆلێ ڤەگەرینن، ژ بەر نە ھەر ئاواز و نە ھەر تام کو د مووزیکا ل ستەنبۆلێ تێ ئافراندن کوردییە، لێ ئەمێ ل ڤر تاما موزیکا کوردی ب ئاوازێن رەسن تۆمار بکن، و ھەر وەھا ئەمێ بەشداری د گەلەک ئاھەنگ و کۆنسەرتان دە بکن، و ئەم ھێڤیدارن ژ سازیێن پێوەندیدار ب ھونەر و موزیکێ رە، ھونەرمەندێن ڤێ دەڤەرێ ھان بدن تا کو ل سەر ئاخا خوە و ل جھێ خوە سترانێن خوە تۆمار بکن و کلیپ بکن ژ بەر کو ستران ل جھێ خوە و ل ناڤ جەماوەرێ خوە خوەشترە.

ئه فرو