ھەلبەستڤان ئارژەن ئارێ ئەڤ نە ئۆخرا داویێیە
ھۆزان ئەمین - ئامەد
وێژەیا کوردی يه ک ژ نڤیساکرێن خوەیێ گرینگ وندا کر، ئارژەن ئاری پشتی نەخوەشیەک گران، چاڤێن خوە ل ژیانێ گرت، و ل نیڤرۆیا رۆژا سێشەمبێ ٣٠-١٠-٢٠١٢ ل نەخوەشخانا سەیران تەپە ل باژارێ ئامەدێ وفات كر.
ل دەما بەلاڤبوونا نووچەیا کۆچکرنا وی نڤیسکار و رەوشەنبیرێن ئامەد و دەردۆرا وێ ب لەز بەر ب نەخوەشخانەیێ ڤێ چوون، و جەنازەیێ وی بەر مالا وی ڤێ برن، و پاشێ برن گۆرستانا یەنی کۆی.
ل رۆژا دن ھەسکری و دۆست و ھەڤالێن ھەلبەستڤان ئارژەن ئاری، ل سەر گۆرا وی کۆم بوون و ب ئاوایەکی فەرمی بەرناماک ھاتبوو ئامادەکرن، ژ ئالیێ شارەداریا مەزنا ئامەدێ ، و کۆمەلەیا نڤیسکارێن کورد، و بەشداریا بەژارتەیەک مەزن ژ خەلکێ دەڤەرێ و دەردۆرا وێ .
ب حەسرەتەک مەزن و ھەسترێن ب کول و کەدەر ل سەر ئۆغرکرنا ھەلبەستڤانەکی کو د زرڤا دانا خوە دە، کو بار کر بێ خاترخوەستن و ل سەر رویێن وان ماتماینبوونەک مەزن ل سەر ڤێ کۆچا ب لەزیا کو ئارژەن ئاری کر.
گەلەک پەیڤ و ئاخافتن ھاتن پێشکێش کرن، ل دەستپێکێ پەیڤا مالباتێ ژ ئالیێ کورێ وی ڤە ھاتە کرن، و ب کەلەک گری سپاسیا خوە پێشکێشی ھەر کەسێ کو ھەڤپاری ب خەم و شینا وان رە کر، و ل سەر ناڤێ ھەڤالێن وی ھەلبەستڤان ئەحمەد حوسەینی ھەلبەستەک پێشکێش کر و ل سەر ناڤێ کۆمەلا نڤیساکرێن کورد ل ئامەدێ، سەرۆکێ وێ شێخمووس سەفەر ئاخفتنەک کر، ھەر وەھا مەراسیم ب بەشداریا شاندەکێ ژ باژارێ دھۆکێ ب سەرۆکاتیا حەسەن سلیڤانی سەرۆکێ یەکیتیا نڤیسکارێن کورد، تایێ دھۆک و شاندەک پێرە، و ئاخافتنەک پێشکێش کر ، ل سەر ناڤێ پەنێ شەخمووس دیکەن و سەرۆکێ شارەداریا مەزنا ئامەدێ ئۆسمان بایدەمر، ئاخافتن کرن، و تەڤا بەحسا قەنجی و باشیێن ھەلبەستڤانەکی کو خەما وی ئەو بوو کو خزمەتا ئەدەب و چاندی کوردی بکە و ب خەم ل سەر ژیان و ئۆغرکرنا وییا بێ دەم و سۆز ، و ل داویێ ھاتە ڤەشارتن و گۆرا وی ب کولیلکان ھاتە خەملاندن.
ژیانا ئارژەن ئاری:
ل سالا ١٩٥٦ ل گوندێ چالێ، گرێدایی باژارێ نسێبین ژ دایک بوویە، و د سالا ١٩٧٩ دە ئەنستتویا پەروەردەیییا ئامەدێ بەشا زمانێ ترکی قەداندیە. وەکە گەلەک ھەلبەستڤان و نڤیسکارێن کورد وی ژی ب ترکی دەست ب ھەلبەستێ کر. د سالا ١٩٧٦ دە ل نسێبینێ ژ بەر بەلاڤکرنا بەلاڤۆکەکێ ھاتە گرتن. وێ دەمێ پۆلیسان دەست دانین سەر ھەلبەستێن وییێن ب ترکی و کوردی. قاسی ھەفتەیەکێ د حەپسێ دە ما. ئەو بەردان، لێ ھەلبەستێن وی تا نھا د مەخزەنا دادگەھا نسێبینێ دە ھەپسی نە. و جارا پێشین د کۆڤارا تیرێژێ دە ھەلبەستێن وی ھاتن وەشاندن.
پشتی ١٢ ئیلۆنێ دە ئەو ل وەلێت ما، ھەلبەستێن وی د کۆڤارێن ل دەرڤەیی وەلێت وەکی بەربانگ، کوردستان پرەسس، نوودەم، چرا، پەلین و رەوشەنێ دە ھاتن وەشاندن. د سالا ١٩٩٢ دە ل ناڤچەیا نسێبینێ ل بەر دەریێ مالا خوە راستی ئێرشەکە چەکی بوو و بریندار راکرن نەخوەشخانەیا زانینگەھا دیجلەیێ. ژ وێ بوویەرێ دە ئارژەن ئاری ل ئامەدێ دژی ھەیا کۆچا خوەیا داوی کر.
بەرھەمێن وی :
١٩٩٩ رامووسان من ڤەشارتن ل گەلیەکی، وەشانێن ئاڤەستا، ھەلبەست
٢٠٠٢ ئەڤ چیا رووسپی نە، وەشانێن ئاڤەستا، ھەلبەست
٢٠٠٣ دەستانا کاوا، وەشانێن ئەلما، ھەلبەست
٢٠٠٦ ئەرۆووتیکا، وەشانێن لیس، ھەلبەست
٢٠٠٨باکوورێ ھەلبەستێ / ئانتۆلۆژیا ھەلبەستا باکوور، وەشانێن یەکیتیا نڤیسکارێن کورد-دھۆک.
٢٠٠٨ شێرگەلە، وەشانێن ئاڤەستا، ھەلبەست
٢٠٠٩ چل چارین، وەشانێن ئەنستیتویا کوردییا ئامەدێ، ھەلبەست
٢٠١٠ بیھۆکا ل پشت سینۆر، ئاڤەستا، چیرۆک
٢٠١١ پاییزا پەیڤێ، وەشانێن بەلکی، ئامەد، ھەلبەست
٢٠١٢ کولیلکێن بەهیڤان، وەشانێن رۆناھی، ئامەد، ھەلبەست
Rojnama war
- 2777 خوێندنەوە
