ھەڤپەیڤین ب ھونەرمەند رۆنى جان حسو ره… ھۆزان ئەمین

ھونەرەمەند رۆنی جان ژ باشوور رۆژاڤایێ کوردستانێ یە، د تەمەنک بچووک دە دامارێ ھونەرێ پێرە خوە دا دەر، ل گەل کۆمێن ھونەری د شاھی و ھەلکەفتێن نەتەوی ستران دگۆتۆن، ب دەنگێ خوەیی زەلال و نازک ناڤدار بوو، و ل شەھیان و ئاھەنگێن تەڤایی ھەرێما جەزیرێ بەشداریا وی ھەبوو،

گۆتن و ئاوازێن سترانێن خوە ئەو داتینە، ژ بەر ھن ئەگەران نەچار دبە وەلات تەرک بکە و بەرێ خوە بدە وەلاتێن خەریبیێ و ل ئەلمانیا نەشتەجیه دبە، و ھەر ل ور ژی ھونەرا خوە ددۆمینە، و ل تەڤایی وەلاتێ ئەوروپا ئاھەنگ و شەھیان ل دارخستنە، ھەیا نھا 7 ئەلبۆم دەرخستنە، 4 ل وەلات و 3 ل دەرڤەیی وەلات، مە د دەربارێ چالاکیێن وی و ھونەرا وی ئەڤ ھەڤپەیڤین پێرە چێکر.

- تو ب خێر ھاتی ھەرێما کوردستانێ، تو کارێ ئەرمانجێن سەرەدانا خوە ژ خوەندەڤانان رە ئەشکەرە بکە؟

-سپاس ھوون خێردار بن، مەرەما من ژ ڤێ سەردانێ ئەوە کو پشتی من دیت ب سەد ھەزاران ژ گەلێ مەیی رۆژاڤا پەنابەر بوونە ل باشوورێ کوردستانێ نەشتەجیه بوونە، ھەروەھا پشتی 14 سالان کو ئەز ژ وان دوور کەتبووم، من خوەست ب ئرکێ خوەیی نەتوی رابم و خزمەتەکێ بۆ وان بکم دەرباری ھونەرا خوە دە و چەند کۆنسێرتان بۆ وان بگێرم، ژ بەر ئەز لاوێ ڤی ملەتی مە، پێویستە ئەز دلێ وان ب سترانێن خوە خوەش بکم، و گرێنگە ھەر ھونەرمەند د خوەشی و نەخوەشیێ ب گەلێ خوە رەبم.

- د ڤان کۆنسەرتان دە ئالاقەیا گەل چاوا بوو ؟

- باش بوو د ھەر کۆنسەرەکێ دە ھسترێ من دھاتن خوار، لێ باوەرم من دلێ وان خوەش دکر ب سترانێن خوە و وژدانێ من رەحەت دبوو و بارەک ژ سەر ملێ من رادبوو

-  ل گۆرا ھونەرا کوردی ل رۆژاڤا، د چ ئاستێ دەیە ؟

-رۆژاڤا زەنگینە ب ھونەر و ھونەرمەندان، لێ پێویستە ھونەرمەندێن ب راستی و کەسێن کو دبێژن ئەم ھونەرمەندن ژ ھەڤ جودا ببن، ژ بەر کو تەڤھەڤیەک د ناڤ وان دە چێبوویە و د ناڤ ھەڤدە وەندا بوونە.

- تو ل گەل وێ چەندێیە کو ھونەرمەند گەرەکە، ژ فۆلکلۆرە و کەڤنەتۆرا خوە سوودێ وەرگرە؟

-وێ گەلەکی باش بە کو د دەستپێکێ دە ھەر ھوەرمەند ژ کانیا فۆلکلۆرا کوردی ڤەخوە، ئەو دبە بنگەھەک خورت ژبۆ ھونەرا وی، لێ ئەڤ نایێ وێ واتەیێ گۆ بمینە ھێسیرێ فۆلکلۆر دڤێ ئەو ب خوە تشتەکی نوو بافرینە و تایبەتیەک وی چێببە.

- تو ب چ ستایلێ دسترێ، تو چقاس کارێ ھەزکریێن خوە کێفخوەش بکە؟

- ئەز فۆلکلۆر و ھەر سترانەک ھەستێن من بلڤینە دبێژم و ئەز باوەرم تایبەتیەک من ژی جێبوویە و تایبەتی نە ب ھەسانی تێ و ھم ژی دانا خوەدایی یە نادە ھەرکەسی.

- چەند بەرھەمێن تە ھەنە ؟

- وەک ھەرەمی 7 بەرھەمن لێ گەلەک ئاھنگێن منیێ تۆمار کری ژی ھەنە.

-خەبات و پیلانێن تەیێن پێشەرۆژێ چنە، گەلۆ ھوون نافکرن بەرھەمەک خوەیا نوو دەرخینن؟

-ئەز نھا مژوولی بەرھەمەک نوو مە، و ئەز دخوازم ل ھەرێما کوردساتنێ ڤێ بەرھەمێ دەرخینم، و کار و بارێن وێ ئەز ل ستودیا ھونرمەند لەزگین خالد دکم.

--------------------------------