”وه‌رزێ كه‌ركه‌دا‌ني”يێ به‌همه‌ن قوبادي ل سه‌رانسه‌رى ژاپۆنێ دێ هێته نيشاندان
فلمێ سينه‌مايي يێ ”وه‌رزێ كه‌ركه‌ده‌ن” ژ ده‌رهێنانا سينه‌ماكارێ ناڤدارێ كورد به‌همه‌ن قوبادي ژ بال كۆمپانيا مه‌زنا بلاڤكرنێ يا ژاپۆني ”كۆميستاك گرووپ” ل سينه‌مايێن سه‌رانسه‌ري وه‌لاتێ ژاپۆنێ هاته نيشاندان.
فلمێ سينه‌مايي يێ ”وه‌رزێ كه‌ركه‌ده‌ن” Rhino Season دووماهى به‌رهه‌مێ درێژێ سينه‌ماكارێ خودان ئه‌زموونێ كورد به‌همه‌ن قوبادي، پشتى چوونه سه‌ر په‌رده‌يێ سينه‌مايێن وه‌لاتێن جيهانێ و نمايشا وى د فێستيڤالێن جۆراوجۆرێن فلمان دا لسه‌ر ئاستێ جيهانێ و بده‌ست ڤه‌ئينانا چه‌ندين خه‌لاتێن گرنگێ نێڤده‌وله‌تي، د هه‌يامه‌كا نێزيك دا ژ بال كۆمپانيا مه‌زنا بلاڤكرنێ يا ژاپۆنى ”كۆميستاك گرووپ” Comstuck Group ڤه ل سينه‌مايێن سه‌رانسه‌رى وه‌لاتێ ژاپۆنێ دێ هێته نيشاندان.
فلمێ سينه‌مايي يێ ”وه‌رزێ كه‌ركه‌ده‌ن” پشتى نيشاندانێ د چه‌ندين فێستيڤالێن جۆراوجۆر دا و ل وه‌لاتێن جودايێن جيهانێ، ژ بال ره‌خنه‌گران، كارناسان و پسپۆڕێن بوارێ سينه‌مايێ ڤه پێشوازي لێ هاته كرن و د كۆڤار و ڕۆژنامه‌يێن گرنگێن نێڤده‌وله‌تى دا ره‌نخنه‌يێن گه‌له‌ك باش لسه‌ر ڤى فلمى هاتينه نڤيسين.
مافێ بلاڤكرنا ”وه‌رزێ كه‌ركه‌ده‌ن” د ستوويێ كۆمپانيا مه‌زنا بلاڤكرنێ يا فه‌ڕه‌نسي ”وايلدبانچ” Wildbunch دايه كو هه‌تا نوكه مافێ بلاڤكرنا ڤى فلمى ب پترى 13 كۆمپانيايێن بلاڤكرنا فلمان ل وه‌لاتێن جۆراوجۆرێن جيهانێ، هاتييه دان، ژ وان: به‌ڕازيل، كۆريا باشوور و پۆڵه‌ندا، كو ئه‌ڤ فلمێ نوويێ قوبادى د سرايا بلاڤكرنێ يا ڤان وه‌لاتان دايه.
ئا: كوردۆ رۆژهات- وار
- 2583 خوێندنەوە
