بلند محه‌مه‌د
بلند محه‌مه‌د..بێ ده‌نگ كار دكر و بێ ده‌نگ وه‌غه‌ر كر..! ئيسماعيل بادى
ل ساڵا 1994ێ ده‌ما مه ل باژێرێ دهۆكێ حه‌فتينامه‌يا (په‌يمان) ده‌رئێخستى، وى ده‌مى ل قه‌زا سێمێلێ مه كاك بلند وه‌كو په‌يامنێر هه‌لبژارت كو كارى ژ بۆ حه‌فتينامه‌يێ بكه‌ت، وه‌كو رۆژنامه‌ڤانه‌كێ خۆ پێگه‌هاندى و چه‌له‌نگ كه‌فته كارى، كو به‌رى هينگێ چو تاقيكرنێن رۆژنامه‌ڤانى نه‌بوون، ژبلى ده‌رئێخستنا گۆڤارا (تيرۆژ) ل باژێركێ سێمێلێ ل گه‌ل نڤيسه‌رێن ل وێرێ دئاكنجى.. بلند ب روح و گيانه‌كێ تژى هه‌ست و به‌رپرسيارانه كه‌فته كارى، پاشى هاته باژێرێ دهۆكێ و بوو ئێك ژ نڤيسه‌رێن حه‌فتينامێ و مه هه‌ميان رێزه‌كا تايبه‌ت لێ دگرت، ژ به‌ركو زێده‌بارى هۆزانڤان و نڤيسه‌ره‌كێ زيره‌ك بوويه، ئێك بوويه ژ زيندانييێن سياسى و به‌رى بگه‌هته ژييێ قانوونى كو هه‌ر ياسايه‌كا رژێما به‌عس ل سه‌ر بچه‌سپينن، به‌لێ بۆ ماوه‌يێ 10 ده‌هـ ساڵان كه‌فته به‌ر ئه‌شكه‌نجه و نه‌خۆشى و زيندانێ.
بلند وه‌كو رۆژنامهڤان، ل گه‌ل قه‌له‌مێ خۆ، گه‌له‌كێ راستگۆ بوو، ل گه‌ل كارێ خۆ، يێ ڕژد و پڕ باوه‌ر و خه‌مخۆر بوو.. جاره‌كێ من نه‌ديت كو خه‌مساريێ د وى كارى دا بكه‌ت يێ پێ هاتييه راسپاردن.
ب زيره‌كى و خۆشمرۆڤى و جامێرييا خۆ، شييا ببيته ئه‌ندامێ ده‌سته‌كا نڤيسه‌ران و پاشى بوو سكرتێرێ وێ، پاشى ل رۆژنامه‌يا (وار) ئه‌ندامێ ده‌سته‌كا نڤيسه‌ران بوو. هه‌روه‌سا ئه‌ندامێ ده‌سته‌كا نڤيسه‌رێن رۆژناما (بشكوژ) بوو يا رێڤه‌به‌ريا چالاكييێن قوتابخانا كو ئه‌و ل وێرێ سه‌يدا بوويه. بلندێ رۆژنامهڤان ب شه‌ڤ و رۆژ يێ ب بزاڤ و لڤين بوو سه‌حمه‌راتى بجهـئينانا وێ ئه‌ركێ پێ هاتييه راسپاردن، ديسان بۆ ده‌‌مه‌كى ل گۆڤارا ديجله كار دكر كو ب پيتێن لاتينى دهاته وه‌شاندن، ل دويڤ دا گۆڤارا (نووبوون) هه‌ر ب پيتێن لاتينى ده‌ركه‌فت و بلندێ نه‌دزانى وه‌ستييان چييه، وه‌كو سه‌رنڤيسه‌رێ وێ كه‌فته كارى.
ديسان وه‌كو رۆژنامهڤان، ل گه‌ل چه‌ند ده‌زگه‌هێن ديتر كار كرييه، وه‌كو په‌يامنێر تايبه‌ت ئه‌وێن ل هه‌ولێرێ ده‌ردكه‌ڤتن. ژبلى ل راديۆ و تێله‌فزيۆنێن ل دهۆكێ وه‌كو تێله‌فزيۆنا (خه‌بات) دهۆكا نوكه وى پشكدارى تێدا هه‌بوو.
بلند وه‌كو ئێك ژ ئه‌ندامێن ئێكه‌تيا نڤيسه‌رێن كورد ل دهۆكێ، ل گۆڤارا وێ (په‌يڤ) ژى كار كرييه وه‌كو ئه‌ندامێ ده‌سته‌كا نڤيسه‌ران. هه‌روه‌سا ده‌مێ كه‌نالێ تێله‌فزيۆنا په‌روه‌رده‌يى يا دهۆكێ هاتييه ڤه‌كرن، ئه‌و ئێكه‌مين رێڤه‌به‌رێ وێ بوويه.
بلند ل سالا 1968ێ ژ دايك بوويه، ساڵێن نۆتان شييا خواندنا خو ل په‌يمانگه‌ها مه‌ڵبه‌ندى يا مامۆستايان ل دهۆكێ ب دووماهى بينيت. ئه‌ندامێ چه‌ند سه‌نديكا و ئێكه‌تييان بوويه.
د وارێن هۆزانێ، ڕۆمانێ، چيرۆكێ، بيره‌وه‌رييان، گۆتارێن رۆژنامه‌ڤانى، بوارێ زارۆكان، ديزاينا په‌رتووكان دا كار كرييه و د هه‌مييان دا به‌رهه‌م هه‌بووينه.
بلند وه‌كو ئێك ژ زيندانييێن سياسى، هاتييه نياسين و گه‌له‌ك دژوارى يێن ژيانێ ديتينه، رۆژنامه‌يا (ئه‌ڤرۆ) به‌رى هه‌فتييه‌كێ ديداره‌كا (7) خه‌له‌كه‌يى دا هاتييه به‌لاڤكرن.
مخابن شه‌ڤا دى 14/13 تيرمه‌هێ نيزيكى ده‌مژمێر سێى شه‌ڤێ ساخله‌ميا وى تێك دچيت و گيانێ خۆ ژ ده‌ستدده‌ته، جهێ وى به‌هه‌شت بيت و خودێ صه‌بر و هه‌دارێ بده‌ته كه‌س و كاران و هه‌مى هه‌ڤالان.
ژ به‌رهه‌مێن وى يێن چاپكرى:
- مه‌لا قاسمێ كۆچه‌ر، دو جاران چاپبوويه.
- شه‌ڤ و يادگار، هۆزان ب لاتينى.
- جوگرافيا گوزارى، وه‌رگێڕان بۆ خواندنا فه‌رمى، په‌يمانگه‌ها گوزار و ئوتێلگێرى.
- سۆتنگه‌هـ، ڕۆمان. هاتييه وه‌رگێڕان بۆ زمانێ عه‌ره‌بى ب ناڤێ (المحرقة) ژ لايێ سامى الحاج ڤه.
- ره‌مه‌زان عيسا و هه‌لچوونێن بهاره‌كا به‌هى، كۆمه‌كا هۆزانێن شاعرينه.
- گه‌هنۆم- ڤاڕێبوون ژ بهايان، رۆمان.
- بێهۆده‌يا جانى، هۆزان،
- باخچێ ئاوازان، هۆزان بۆ زارۆكان.
- گوگمێلا- چه‌پا كه‌نيزه‌كێن پايتۆنان، رۆمان.
- تشتێن نه‌مر، هۆزان،
- سه‌ما خوه‌كوشتنێ، هۆزان.
- عشق ل ژێر پراچينۆدێ، هۆزان.
- ژ بيردانكا زيندانێ (بيره‌وه‌رى)، 2024.
- تايا ئێڤارێن ژبير كرى، ڕۆمان. 2025.
چه‌ند به‌رهه‌م ژى به‌رهه‌ڤ كربوون بۆ چاپكرنێ..
********
رۆژناما (ئه‌ڤرۆ)، هژمار 3785 رۆژا چارشه‌مب 2025/7/16
- قرأت 10 مرات
